¿Imanöraq yachakuyanqa?
1. ¿Imanirtaq fácil-llatsu yachatsikunan? ¿Imanirtaq wayinkunaman kutin kutin ëwantsik?
1 Jehoväpa hatun piñakïnenqa chëkämunnam, tsëmi alläpa precisan nunakunata Diospita y ruranampaq kaqpita yachatsinantsik (Juan 17:3; 2 Ped. 3:9, 10). Mana wiyakoqnö kayaptin o burlapämashqa, itsa fäciltsu kanqa nunakunata yachatsinantsik (2 Ped. 3:3, 4). Tsënö karpis, musyantsikmi Diospita yachatsikonqantsikta wiyar chaskikoqpaq kaq nunakuna markantsikchö kayanqantaraq. Pero ¿imanöraq wiyakuyanqa mana pipis yachëkätsiptenqa? (Rom. 10:14, 15.)
2. ¿Imanötaq yanapamantsik apóstol Pablu ruranqan?
2 Chikimashqa: Yachakïta munaq nunakunarëkurmi pitapis mantsëwan yachatsikïta haqinantsiktsu. Rikärishun Europachö këkaq Filipos markallachöraq apóstol Pablu yachatsikur qallaptin pasanqanta. Wakin nunakuna Pablutawan Silasta ulikurkur o llullakurkur tumpayaptinmi, atskaq nunakuna wilur o werur carcelariyarqan (Hech. 16:16-24). ¿Tsënö rurëkuyaptin mantsakartsuraq yachatsikïta haqirerqan Pablu? Manam, tsëllapitanam Tesalónica markaman ëwarqan yachatsikoq, tsëchömi santo espïritunwan Diosnintsik yanapaptin huk mushoq congregacionta kicharqan (1 Tes. 2:2). Kë ruranqan, ¿manaku yanapamantsik mana utishpa yachatsikunapaq? (Gál. 6:9.)
3. ¿Imakunata pasar-raq nunakuna wiyakïta munayanmanna?
3 Diospita yachatsikushqa mana wiyamaqnintsik nunakunapis, kananqa wiyakïta munayannam. ¿Imanir? Qellë ushakaptin, qeshyar, kastankunata wanupakur, o kë mundochö imëka mana alli pasanqankunata wiyarninmi Diospita wiyakïta munayanna (1 Cor. 7:31). Y kanmi nunakuna, teytankuna yachakuyänanta michashqa kayaptimpis, kananqa poqushqana kar wiyakïta munaqkuna. Tiempo kanqanyaqlla yachatsikurmi, wakintapis yanapëkantsik Jehoväpa shutinta alabayänampaq (Rom. 10:13).
4. ¿Imataq yanapamäshun ‘mana jamëta’ yachatsikunapaq?
4 ‘Mana jamëta’: Diosta y nuna mayintsikta kuyëmi yanapamäshun, punta kaq apostolkuna rurayanqannölla ‘mana jamëta’ nunakunata yachatsinapaq y Jesuspa qateqnin këman chayänanrëkur yanapanapaq (Hech. 5:42, QKW). Kanan witsanchö atskaq nunakunam “waqëkäyan y hipëkäyan [ñakaykäyan] alläpa mana allikuna pasaptin” (Eze. 9:4). Tsënö karpis, alli willakïkunata wiyarerqa ¡imanömi kushikïkuyan y yamëmi tikrariyan! Hina yachatsikïkashqa nunakuna mana wiyamashqapis, Jehoväqa allipash kushikun llapan ruranqantsikwan ninmi Bibliaqa (Heb. 13:15, 16).