Nunakunata yachatsirmi Diosta kuyanqantsikta rikätsikuntsik
1. ¿Imatataq kuyakur Jesus rurarqan?
1 Kuyakurmi Jesusqa imëkatapis rurarqan. Mëchö tsëchö këkar y tukïnöpa yachatsikonqanmi rikätsikorqan Jehoväta alläpa kuyanqanta, tsëmi kikin kënö nerqan: “Dios Yayata cuyanqäta nunacuna musyayänanpaqmi mandamashqancunallata rurecä” (Juan 14:31). Tsënöllam noqantsikpis yachatsikunapaq Dios permitishqa kaptin, kuyanqantsikta rikätsikuntsik nunakunata yachatsir (Mat. 22:37; Efe. 5:1, 2).
2. ¿Diosta kuyarqa imanötaq yachatsikuntsik?
2 “Jutillequi allapa respetuwan alabashqa catsun”: Jehoväpita y Gobiernompita mëchö tsëchöpis yachatsikorqa, Diosta kuyanqantsiktam rikätsikuntsik y shutin respëtowan alabashqa kanampaqpis yanapakuntsikmi (Sal. 83:18; Eze. 36:23; Mat. 6:9). Noqantsikpis Jesusnöllam Jehoväpa shutin respëtowan alabashqa kananta y pëpa munënin rurakänanta munar yachatsikuntsik (Mat. 26:39).
3. ¿Jehoväta kuyanqantsik imanötaq yanapamäshun alli tsarakunapaq?
3 Kuyakorqa allim tsarakushun: Jehoväta kuyanqantsikqa yanapamantsik imëkata pasarpis alli tsarakunapaqmi (1 Cor. 13:4, 7). Jesustaqa tukïtam rurayarqan, wakinnö karqa mananachi yachatsikunmannatsu karqan. Y tukïta pasarpis Jehoväta alläpa kuyar y Teytan munanqanta rurëta munarmi alli tsarakorqan (Mar. 3:21; 1 Ped. 2:18-23). Noqantsikpis tukïtam pasantsik, pero Jesusnö kaqpis Diosta kuyarqa allim tsarakushun. Cristu ruranqanta shumaq qaterqa imëpis yachatsikunapaqmi kallpata tarishun. Höraqa kastantsikkuna chikimashqa, qeshyapäkushqa, tsatsayashqa awkinyashqa o nunakuna mana wiyamashqa llakinantsikmi, pero këkunaqa manam arkämashwantsu o tsapämashwantsu Jehoväta kuyar alli yachatsikunantsikta.
4. ¿Imatataq ruranantsik Diosta kuyarqa?
4 Kuyakorqa imëkatapis rurashwanmi; yachatsikorqa Diosta kuyanqantsiktam rikätsikuntsik (1 Cor. 13:13). Hinantin Patsachö Diospa shutin alläpa respëtowan alabashqa kanampaq këllachöna kaptinmi, “waran waran mas cuyaquiyoq” këta tïranantsik (Fili. 1:9; Mat. 22:36-38).