Llapan hunaqkuna Jehoväta alabashun
1. ¿Diosta sirveqkunaqa ima rurëtataq munantsik y imanir?
1 Rey Davidqa, “patsa waranqampita ampenqanyaqmi” Jehoväta imëyaqpis alabëta munarqan (Sal. 145:2, 7, 21). Y tukïta qomanqantsikpitam noqantsikpis llapan hunaqkuna Jehoväta alabanantsik (Sal. 37:10; 145:14, 18; 2 Ped. 3:13).
2. ¿Imanötaq llapan hunaqkuna wayichö Jehoväta alabashwan?
2 Wayintsikchö: Reunionkunapaq yachakur, familiachö Diosta adorar, y cada hunaqpaq textota leir Bibliapita parlakurinapaqqa atska publicacionkunam kapamantsik. Atskaq familiakunam hunaqchö huk kutillapis junto mikuyan, y tsënömi llapankuna shumaq parlakuriyan y Jehoväta alabayan. Teyta kaqkuna Diospita parlar qallayänanmi más alliqa, tsënömi tsurinkunata “shumaq tantiyatsir willapäy[anqa] Teyta Jesucristu munanqanno cawacuyänanpäq” (Efe. 6:4; Deu. 6:5-7).
3. ¿Ima rurëtataq puëdentsik wawqintsikkunawan y panintsikkunawan kanqantsik höra?
3 Wawqikunawan y panikunawan: Wayin wayin yachatsikïnintsikwan reunionnintsikkunaqa, wawqintsikkunawan y panintsikkunawan Jehoväta shumaq alabarinapaqmi (Pro. 15:30; Fili. 4:8; Heb. 13:15). Jehoväta kuyarnin llapantsikpis huknölla karmi, parlakïnintsikcho imëpis rikätsikushwan Jehoväpa alli kënimpita agradecikonqantsikta (Sal. 106:1).
4. ¿Imanötaq Jehoväta alabashwan wayin wayin llapan hunaq mana ëwarpis?
4 Diosta mana sirveq nunakunawan: Llapan hunaqkuna wayin wayin yachatsikïta mana puëderpis, trabajaq mayintsikkunata, estudiaq mayintsikkunata o marka mayintsikkunata parlapärishwanmi Jehoväpita y awnikonqampita, tsënömi alli shonquyoqkunata yanaparishun Dios awnikonqanman markäkuyänampaq o yärakuyänampä (Sal. 27:14; 1 Ped. 3:15). Huk panim avionchö viajaq mayinta Diospita parlaparqan, tsënam warmiqa alläpa kushikurnin mëchö täranqanta y telëfononta qorqan imëpis parlayänampaq. Kë mundochö imëpita más problëmakuna mirakïkaptimpis, llapan wiyakïta munaqkunatam Jehoväpa testïgonkunaqa ‘alli kaq noticiata’ musyëkätsiyan. Tsëta wiyarmi wakinkunaqa kushikuriyan, y Jehoväta alabëtapis munariyan (Isa. 52:7; Rom. 15:11).
5. ¿Imanirtaq Jehoväta alabëta munantsik, y tsëta rurarqa imatataq tarishun?
5 ¡Imaraq Jehová kushikïkun sirveqninkuna llapan hunaqkuna alabaqta rikar! Imanömi llapan kamanqankuna mana shimiyoq këkarpis Diosta alabayan, tsaq tsënöllam noqantsikpis Jehoväta alabashwan wayintsikchö y congregacionchö o manaraq Diosta reqeq nunakunata parlaparnimpis (Sal. 19:1-4).