Shumaq y alli yachatsikushun
1. ¿Imatataq rurashwan Bibliawan alli yachatsikunapaq?
1 Diospa Palabrampita ‘shumag yachatsicunapagga’, manam Bibliallatatsu leinantsik, tsëtam apóstol Pablunö alli yachatsikoq cristiänokunaqa musyayan (2 Timoteu 2:15, NTCN). ¿Imanötaq nunakunata yachatsishwan? (Hech. 28:23.)
2. ¿Imatataq rurashwan nunakuna Bibliata más respetayänampaq?
2 Kikin Bibliapita yachatsikï. Puntataqa, kikin Bibliapitam leinantsik, tsënöpa Diospa yachatsikïninta respetayänampaq. Biblia ninqanllapita yachatsikushqaqa, itsa huk textota leirapushqa nunakuna shumaq wiyaramäshun (Heb. 4:12). Kënömi nirishwan: “Këpaq Dios imatapis pensanqanta musyëmi, noqataqa yanapamashqa. Palabran Biblia ninqanta rikärishun.” Kikin Biblia ninqanta leirapïta tïrë, tsëqa Diospa Palabran parlapëkaq cuentam kanqa.
3. Huk textota leirapurnin, ¿imatataq rurashwan wiyamaqnintsik alli yachakunampaq?
3 Hina textokunata leirapurmi, ima ninqantapis yachatsinantsik. Atska nunakunapaqmi alläpa sasa o aja Bibliapa versïculonta leirayäpuptin, ima ninqantapis yachakuyänan. Y tsë textota imanir leipunqantsikta yachatsinataraqmi wanayan (Luc. 24:26, 27). Yachëkätsinqantsikpaq parlaq textotam kutin kutin alli yachatsinantsik. Hina yachakïkanqanta o mana yachakïkanqanta musyarinapaqqa tapurinantsikmi (Pro. 20:5; Hech. 8:30).
4. Hina, ¿imatataq rurashwan nunakunata alli yachatsinapaq?
4 Bibliawan yanapashun. Hinamampis, wiyamaqnintsikpa pensëninman y shonqunmanmi chätsita tïranantsik. Huk texto imanöpis yanapanqanta yachatsishun. Kikin Bibliapita yachatsishqaqa, itsa nunakuna cuentata qokuriyanqa y hukläyana pensayanqa (Hech. 17:2-4; 19:8). Salmo 83:18 textota leirirmi, piwampis más reqinakunapaq shutinta reqinan alläpa precisanqanta nirishwan. Nïkurnam kënö tapurishwan: “¿Diospa shutinchö mañakuptikeqa, mañakïniki más alliyänampaq kaqta creinkiku?”. Huk textopita tsënö yachatsikushqaqa, Bibliata masmi respetayanqa. Y Jehová Diostam nunakuna adorëta tïrayanqa (Jer. 10:10).