Tapukïkuna kaq

◼ ¿Imanötaq precursorkunata yanaparishwan?

Pasaq 2009 watachömi, casi 800 mil wawqikuna panikuna hinantin patsachö precursor regular y especial serviyashqa. Pëkunaqa imëkata haqirirmi, tiempokunata, kallpankunata, y imëka kayapunqantapis gastayashqa Diospa Gobiernompita yachatsikuyänanrëkur (Pro. 3:9). ¡Imanöraq tsë llapan rurayanqampita Jehová kushikun! Y noqantsikqa ¿Jehovänöllaku kushikuntsik? ¿Imanötaq yanapashwan pëkuna imëpis kushi kushilla y imëkata pasarpis Diospa kaqchö alli yanapakuyänampaq?

Puntataqa, precursor këta mana imëpis haqiyänampaqmi shumaq parlapärishwan (Pro. 25:11). Hina tiempontsiktam patsätsishwan semänachö mëqan hunaqllapis pëkunawan yachatsikoq yarqunapaq. Cärroyoq karninqa, noqantsikwan ëwayänampaqmi nirishwan. Precursorpa cörronwan ëwarninqa ima gastonllapaqpis pasajentsikta pagarishwanmi (1 Cor. 13:5; Fili. 2:4). Hina imallatapis pëkunawan mikurinapaq wayintsikman invitarmi kuyanqantsikta y yanapanqantsikta rikätsikushun (1 Ped. 4:8, 9).

Diospa Gobiernompita yachatsikïta puntaman churaq cristiänokunataqa, wanayanqankunata Jehová qonampaq kaqtam Biblia willakun (Sal. 37:25; Mat. 6:33). Y tsëtaqa ruran kuyakoq cristiano mayintsikkunawanmi (1 Juan 3:16-18). Precursorkunaqa manam imëka gastonkunata hukkuna pagayäpunantatsu shuyaräyan, hina pishipakuyanqantapis itsa willakuyanqatsu. Tsëmi altantolla këkänantsik ‘jucnintsic jucnintsic yanapanacur, iwallla bidata pasanapaq’ (2 Cor. 8:14, 15).

Cencreas congregacionpita alli yachatsikoq Febe shutiyoq pani Römaman viajaptinmi, tsë congregacionchö wawqikunata y panikunata Pablu kënö nirqan: “Wauqicuna panicuna, Febe jutiyoq panintsictam [...] allipa chasquicuyänequi. Tsemi imachopis wananqancho yanapecuyë” (Rom. 16:1, 2). Kanan witsankunapis congregacionchö kaqkunaqa, tsënöllam yanapanantsik llapan tiemponkunawan Diosta sirveq precursor regularkunata y especialkunata (Hech. 5:42).