Las maravillas de la creación revelan la gloria de Dios
Atskaq nunakunam Diosnintsik tukï kamanqankunata rikar alläpa kushikuyan. Tsënö karpis manam entiendeyantsu llapan rikäyanqankunaqa Diospa yachaq këninta y kuyakoq këninta rikätsikunqanta (Rom. 1:20). Unë witsanmi Jehoväta David reqirqan Palabranta leirnin. Jina llapan kamanqankunata rikarninmi kikin Diosta rikëkaqnö karqan (Sal. 8:3, 4). Las maravillas de la creación revelan la gloria de Dios nishqan DVD-mi, noqantsikta, wamrantsikkunata y Bibliapita yachakïkaqkunata yanapamënintsikta puëden Dios llapan kamanqankunapita yachakunapaq y Kamakoq Dios Yayantsik imanö kanqantapis musyanapaq, tsënöpa pëwan alli këta tarinapaq. Kë DVD-ta rikärirnin kë tapukïkunata contestëta tïrashun.
1) Planëtakuna y qoyllurkuna imanö karu karuchö y alli patsätsishqa kanqanta musyanqantsik, ¿imanötaq yanapamantsik Jehoväta más kuyanapaq? (Isa. 40:26.) 2) Yaku imanö kanqantapis alleq musyarir, ¿imatataq yachakuntsik Kamaqnimpita? (Apo. 14:7.) 3) ¿Imatataq musyatsimantsik Jehoväpa yachënimpita imanö jatun Patsa kanqan y Intipita o Rupaypita karunchö imanö preciso këkanqan? 4) ¿Imachötaq Killa yanapakun? (Sal. 89:37.) 5) ¿Imanötataq Jehová ruramarquntsik kushishqa kawakunapaq? 6) ¿Imataq ADN? (Sal. 139:16.) 7) ¿Imanirtaq nunaqa alläpa jukläya Jehová llapan kamanqampita? (Gén. 1:26.) 8) ¿Mushoq patsachö ima rurëtataq munankiman?
Wakin kaq: 9) ¿Imanötaq colorkuna yurin? 10) ¿Imanötaq juk plantapa jawampita hasta puntanyaq yaku witsan? 11) ¿Nunapa cuerponchö imanötaq yaku yanapakun? 12) ¿Juk animal, juk kasta animaltaku majan kanampaq akran? Igualatsikïkunawan willakaramï. 13) ¿Imanötaq tsëta musyan? 14) ¿Imataq ángulo áureo nishqan, y imanötaq rikakun Jehová kamanqanchö?
Alleq rikäshun Jehová kamanqanta. Jesusmi qateqninkunata nirqan ‘pishqucunata’ y ‘jircacunacho wetacunata’ rikarnin yachakuyänampaq (Mat. 6:26, 28). Noqantsikpis tsëta rurashqaqa markäkïnintsik o yärakuynintsikmi más miranqa, jina más precisaqtam rikäshun Jehoväpa yachëninta, salvamänapaq kallpan kanqanta y kuyakïnintapis. Nunakunapa rurëninkuna pantatsimänata jaqinapa rantinqa, tiempota rakishun Jehová kamanqankunapita yachakunapaq y pë imanö kanqanta yachëkatsimanqantsikman yarparäshun (Sal. 19:1).