¿Imanirtaq yachatsikuntsik?
1. ¿Imataq yanapamantsik llapan shonquntsikwan yachatsikunapaq?
1 Kë tiempuchöqa Diospa alli willakïninta yachatsikïmi imëkapitapis mas alliqa, tsënöpam ishkan jatun mandamientukunata wiyakuntsik, Jehovä Dios kuyëta y nuna mayintsikta kuyëta (Mar. 12:29-31). Kë kuyakïmi yanapamantsik llapan shonquntsikwan yachatsikunapaq (1 Juan 5:3).
2. ¿Imanötaq Jehoväta kuyanqantsikta rikätsikuntsik yachatsikurnin?
2 Jehoväta kuyar. Kuyë amïguntsik Jehoväta kuyanqantsikmi yanapamantsik Satanas 6.000 watapana Jehoväpa jutinta rakchatanqanta defendinapaq (2 Cor. 4:3, 4). Diablupa culpanrëkurmi nunakunaqa creiyan infiernuchö jutsasapa nunata Dios rupëkätsinqanta, mana musyëpaq kima Dios jukllëllachö kanqanta o nunakunata cuentaman mana churanqanta. Tsërëkurmi mëtsikaq nunakuna Diosmampis creiyannatsu. ¡Imanö kushikïpaqraq kanman llapan nunakuna Diospita rasumpa kaqta musyariyanqanqa! Pëpa alli testïgunkunanö këta procurashqaqa shonquntam kushitsishun y Diablu rurëta munëkanqantam ushakätsishun (Prov. 27:11; Heb. 13:15, 16).
3. ¿Imanötaq nuna mayintsikta kuyanqantsikta rikätsikuntsik?
3 Nuna mayintsikta kuyar. Pitapis yachatsirninqa kuyanqantsiktam rikätsintsik. Musyanqantsiknöpis kë sasa o aja tiempukunachöqa nunakuna alläpam wanayan kë alli willakï wiyëta. “Derecha ni itsoq makin jukläya kanqanta” mana musyaq Jonaspa tiempunchö kawaq ninivïtakunanömi wakinqa kayan (Jon. 4:11). Peru alli willakïta yachatsirninmi shumaq y kushishqa kawakuyänampaq yachatsita puëdintsik (Is. 48:17-19). Jina shamoq tiemputa jukläya rikäyänampaqpis yanapantsikmi (Rom. 15:4). Wiyakur yachakuyanqanmannö rurayaptinqa salvaciontam tariyanqa (Rom. 10:13, 14).
4. ¿Imataraq Jehoväqa imëpis qonqanqatsu?
4 Juk alli wamraqa manam munanqankunallachötsu teytanta kuyanqanta rikätsin, sinöqa llapanchömi rikätsin. Tsënöllam Diosnintsikta y nuna mayintsikta kuyarninqa mëchö tsëchö këkarnimpis yachatsikushun, y manam yachatsikoq yarqurllatsu. Tsëmi mana dejëpa yachatsikunantsik (Hëch. 5:42). Tsënö kuyëpa ruranqantsiktaqa Jehovä manam ni imëpis qonqanqatsu (Heb. 6:10).