Masmi Jehoväta alabëta puëdishun
1. ¿Imata patsätsiyämunqantaq yanapamäshun Jehoväta mas “sinchipa” alabanapaq?
1 Kananqa llapan publicadorkunam 30 hörasta rurarnin precursor auxiliar këta puëdiyanqa llapan watakuna marzu y abril killakunachö, jina congregacionkunata watukaq anciänu shamunqan killakunapis. Këta patsatsiyämunqanqa qallëkushqa 2013 marzu killapita patsëmi. Ishkë killa tinkunqanchö visïta kaptinqa, mëqan killallachöpis 30 hörasta rurayänampaqqa publicadorkuna akrëta puëdiyanqam. Congregacionta watukaq anciänu precursor regularkunawan y especialkunawan reunionta ruraptinqa, precursor auxiliarkunaqa llapan reunionchö quedakïta puëdiyanqam. Awmi, precursor auxiliarnö 50 höraskunata mana rurëta puëdishqapis, kananqa watachö chusku killam kapamäshun Jehoväta “sinchipa” alabanapaq 30 höraskunata precursor auxiliarnö ruranapaq (Sal. 109:30; 119:171).
2. ¿Ima bendicionkunatataq chaskiyanqa precursor auxiliarkuna congregacionkunata watukaq anciänu shamunqan witsan?
2 Anciänu watukamanqantsik killa. Congregacionta watukanqan witsanqa atskaq publicadorkunam precursor auxiliar këta puëdiyanqa, tsënöpa yachatsikïchö ‘jucnintsic jucnintsic yanapanacunapaq’ (Rom. 1:11, 12). Itsa wakin precursor auxiliarkunaqa trabäjunkunapita permïsuta mañakurir congregacionkunata watukaq anciänuwan yachatsikoq yarquyanqa. Y lünispita viernisyaq trabajaq wakin precursor auxiliarkunaqa säbadupa o domingupa kar pëwan yarquyänampaqmi mañakuriyanman. Jinamampis, precursor regularkunapa y especialkunapa reunionninkunaman auxiliarkuna ëwarninqa atska yanapakïkunatam chaskiyanqa.
3. Jesus Wanunqan Yarpë witsankunaqa, ¿imanirtaq alläpa alli precursor auxiliar kanapaq?
3 Marzuwan abrilchö. Jesus Wanunqan Yarpë killachö precursor auxiliarnö 30 höraswan këta puëdishqa kaqkunaqa, yapëmi Jehovä Diosta ‘llapan shonquncunawan alabeta’ puëdiyanqa (Heb. 13:15). Marzuwan abril killakunaqa alläpa allim kanqa precursor auxiliar kanapaq. Tsë killakunachömi Jesuspa Wanunqan Yarpëmanqa invitakuntsik. Jina tsë killachö atskaq yachatsikoqkuna kayaptinmi, yanaqänakunapaq atskaq kayanqa. Jesus Wanunqan Yarpë ushariptinmi, tsëman shamushqa kaqkunata animanantsik discursu especialman shayämunampaq. Awmi, kananqa mas killakunam kapamantsik precursor auxiliarnö Jehoväta sirwinapaq. ¿Manatsuraq tsëtaqa shonqupita patsë rurarishwan? (Lüc. 6:45.)