¿Pikunataq Jehoväpa munëninta rurëkäyan?
1. ¿Imëtaq wakin congregacionkuna Jehoväpa munënin follëtuta estudiar qallayanqa, y imanötaq estudiayanqan yanapanqa?
1 Wakin congregacionkunachöqa 28 de octubri killapita patsëmi Bibliapita Yachakunapaq reunionchö ¿Pikunataq Jehoväpa munëninta rurëkäyan? neq follëtuta estudiayanqa. Kë publicaciontaqa “Shonquta cuidashun” neq Jatun Asamblëachömi presentayämurqan, kë follëtuqa rurakämushqa estudiantikuna Jehoväpa markanta reqiyänampaqmi. Këta estudianqantsikmi yanapamäshun yachatsikunqantsikchö imanö utilisänapaq y Diospa markanchö këkanqantsikta alläpa valoranapaq (Sal. 48:13).
2. ¿Imanötaq congregacionchö kë follëtuta estudiayanqa?
2 ¿Imanötaq estudiakanqa? Dirigeqkunaqa cada yachatsikïta igual tiempullachö rurayänampaqmi tiemputa alli patsätsiyänan. Qallarninllam cada yachatsikïpa tïtulunta leyir qallayanqa. Qallanan kaq pärrafuta leyeq wawqi leyiramuptinmi, estudiuta dirigeqqa kikin alistanqan tapukïta tapukamunqa. Tsëpitanam, cada pärrafuchö yanarëkaq letrawan subtïtuluta y pärrafunta leyimunqa, nïkurnam dirigimoq tapukamunqa qallanan tapukïta cada pärrafu imanö contestanqanta. Tiempu kaptinqa precisaq textukunallatam leyirayämunqa. Jina, kë follëtuqa mëtsika dibüjukunayoqmi tsëkunapita parlakurinapaq. Juk kaq yachatsikïman manaraq pasarmi yachatsikämoqqa yachakunqantsikta yarpärinapaq urachö këkaq tapukïkunata ruraramunqa. “Musyanëkipaq” neq recuadru kaptinqa, leyeq wawqitam leyimunampaq mañarinqa, tsëpitanam, estudiantikuna tsëchö ninqannölla rurayaptin imanö yanapanampaq kaqta, tsëchö këkaqkuna willakayämunampaq tapukaramunqa. Tiempu kaptinqa, yarpärinapaqmi tïtulukunapa tapukïninkunata ruraramunqa. Peru estudiantikunata yachatsirninqa manam kënö rurashwantsu.
3. ¿Imanötaq kë follëtuta yachakurnin alli provechashwan?
3 Kë reunionta alli provechanapaqqa, puntallapitanam preparakunantsik y parlakuritam procuranantsik. Estudiëkarnin, pensashun kë yachatsikïkuna estudiantikunapaq imanir allinö kanqanman. Kë mushoq follëtuta yachakunqantsikmi, yachatsimäshun wakinkunata Diospa munëninta rurayänampaq y imëyaqpis kawakïta tariyänampaq yanapanapaq (1 Juan 2:17).