Alli yachatsikoq kë: nunakunaman yarpachakï

Imanirtaq alläpa precisan. Jesusqa wakinkunapaqmi yarpachakoq. Juk kutim mana wiyëta puëdeq nunata kachakätseq ëwarqan, itsa mantsakashqa këkaqta rikarnin nunakuna mana rikäyänan sitiuman aparqan (Mar. 7:31-35). Qateqninkuna mëyaqlla yachakïta puëdiyanqanta cuentaman churarmi, alläpaqa yachatseqtsu (Juan 16:12). Kanampis ciëlupita patsëmi noqantsikpaq yarpachakïkanlla (2 Tim. 4:17). Cristiänukunaqa pënö kanapaqmi kallpachakuntsik (1 Pëd. 2:21; 1 Juan 3:16, 18). Yachatsikunqantsikchö alli yarqapamänapaqqa, nunakuna imanö kawayanqanta, munëninkunata y yarpachakïninkunatam cuentaman churanantsik. Tsëta rurashqaqa nunakuna cuentatam qokuriyanqa yachatseqninllatsu ni publicacionkunata apaqllatsu ëwanqantsikta, sinöqa pëkunaman rasumpa yarpachakurmi.

¿Imanötaq rurashwan?

Alleq preparakï. Ama mantsakïtsu, respëtuwan y kushi kushilla kë.
Alliraqmi rikänëki. ¿Imallapis rikätsikunku wamrayoq kanqanta, plantakuna gustanqanta o animalkunayoq kanqanta? ¿Imallapis rikätsikunku religionnin kanqanta? Itsa tsëta cuentaman churankiman parlapar qallanqëki höra.
Tapuri imata pensanqanta y mana pantatsishllapa shumaq wiyari. Parlapäshuptiki rikarë wiyëkanqëkita musyanampaq. Parlakaramunqampita agradecikuri, mana contrashllapa.
Juknöpapis rurë. Yachatsikurninqa nunakuna yachakïta munayänampaqnölla rurë. Manam alläpa sasatsu, porqui tratäduntsikkunachö, follëtuntsikkunachö y revistantsikkunachöqa tukïläya yachatsikïkunam kan. Itsa imëka rurëninkunawan ocupädu këkan, tsëqa raslla parlapäri.

Entëru killachö këta rurëta procurë:

Yachakï Familiachö Diosta Adorana Hörachö o yachatsikunqëki hörachö, tsënöpa nunakuna munayanqanmannölla imanö parlapärinëkipaq.
Yachatsikoq yarqunapaq reunionta dirigeq wawqim, yachatsikïta puëdin imakunachö mas nunakunata cuentaman churanantsikpaq o juk demostracionta ruratsinman.