Jesus Wanunqanta Yarpë witsan qatishun Jehoväwan Jesus shonqupita patsë rurayanqanta
1. ¿Imata rurayänampaqtaq Jehoväpa testïgunkuna kallpachakuyan Jesus Wanunqanta Yarpë witsan?
1 Jehoväqa änikunqantam cumplin shonqupita patsë. Diospa Gobiernun bendicionkunata apamunampaq kaqpita parlarmi, Isaïas 9:7 textu kënö nin: “Alläpa kuyakoq karmi tröpakunapa mandaqnin Jehoväqa shonqupita patsë tsëta ruranqa”. Tsurin Jesuspis shonqupita patsë rasumpa kaq adoracionta kuyanqantam rikätsikurqan (Juan 2:13-17; 4:34). Jesus Wanunqanta Yarpë witsankunam, millonyëpayan Testïgukuna kallpachakuntsik Diospita mas yachatsikunapaq, tsënöpam qatikantsik Jehoväwan Jesus shonqupita patsë rurayanqanta. ¿Tsënötsuraq kë wata ruranki?
2. ¿Imatataq 7 de marzupita patsë rurashun y kushi kushilla rurarqa imatataq lograshun?
2 Jesus Wanunqanta Yarpëman invitakushun. Kë wataqa invitakur qallëkushun säbadu 7 de marzupita patsëmi. Tsëmi precisan kananllapitana churapakänantsik kushi kushilla invitakunapaq. Tsë witsanqa llapan congregacionkunam atska rurëyoq kashun, llapan territoriuntsikkunatam ushëta tïrashun. Estudiantintsikkunata, territoriuchö reqinqantsikkunata, trabajaq y estudiaq mayintsikkunata, y familiantsikkunata invitacionta entreganapaq o jw.org päginachö rikäratsinapaq alistakushun.
3. ¿Imatataq rurëta puëdintsik marzu y abril killakuna mas yachatsikunapaq?
3 Precursor auxiliar. Shonqupita patsë munanqantsikmi yanapamäshun llapan tiempuntsikwan yachatsikunapaq. Awmi, llapantsikmi marzu y abril killa precursor auxiliar këta puëdishun, jina 30 höra ruranapaqpis akrëta puëdintsikmi. Familiachö Diosta Adorana Hörachö o japallantsik estudianqantsik hörachö Diosman mañakurir imanö ruranapaq kaqta rikäshun (Prov. 15:22). Kushi kushilla yanapakunqantsikmi wakinkunatapis yanaparinqa tsënö rurayänampaq. Maslla yachatsikunapaq tiempuntsikta patsätsirqa Jesus shonqupita patsë ruranqantam qatikäshun (Mar. 6:31-34).
4. ¿Imatataq lograshun Jehoväwan Jesus shonqupita patsë rurayanqanta qatirnin?
4 Jesus Wanunqanta Yarpë witsan Jehoväwan Jesus shonqupita patsë rurayanqanta qatishqaqa, alleqmi yarqapamäshun. Mëtsikaqmi territoriuntsikchö wiyamäshun. Jinamampis alläpa kushishqam sientikushun Jehoväta y nuna mayintsikta sirwirnin (Hëch. 20:35). Y Jehovätawan Jesustam kushitsishun.