“Alläpa ankupäkoq” Diostam sirwintsik

1. Llakipäkoq nunaman pensarqa, ¿imanö kanqanmantan yarpantsik?

LLAKIPÄKOQ nunaman pensarqa, yachanëpaq, kuyakoq y alli nuna kanqanmanmi yarpantsik. Itsa Samariapita alli nunapaq parlar Jesus yachatsikunqanta yarpantsik. Tsë forastëru nunaqa, ladronkuna maqayanqan judïu nunatam llakipar yanaparqan. Samariapita nunaqa, tsë judïutam “alläpa ankuparqan”, y kuyarninmi atiendiyänampaq pagakurqan (Lüc. 10:29-37). Kë igualatsikuyqa, Diosnintsik alläpa kuyakoq kar, cada junaq imëkachö llakipämanqantsiktam rikätsimantsik.

2. Llakipäkoq nunaqa, ¿ima mastataq ruran?

² Llakipäkoq kanqantaqa juk nuna rikätsikun, pitapis castiganampaq këkarnin pëchö ima allillatapis tarirnin manana castigarmi. Jehoväqa, pantashqa y jutsata rurashqam llakipämantsik. Tsëmi Salmus libruta qellqaq juk nuna kënö nirqan: “Manam jutsata rurashqantsikmannötsu castigamantsik” (Sal. 103:10). Tsënö kaptimpis, juk kutikunachöqa jutsallakoqkunata fuertipam corregin.

3. ¿Ima tapukuykunapitataq këchö yachakushun?

³ Këchöqa, kë kiman tapukuykunapaq Biblia ima ninqantam yachakushun: ¿imanirtan Jehoväqa llakipämantsik?, ¿imanötan fuertipa corregimanqantsikchö llakipäkoq kanqan rikakun? y ¿imatataq ruranantsik Jehovänölla llakipäkoq kanapaq?

¿IMANIRTAN JEHOVÄQA LLAKIPÄKOQ?

4. ¿Imanirtan Jehoväqa llakipäkoq?

⁴ Kuyakoq kar. Dios yanapaptinmi, apostol Pabluqa Dios “alläpa ankupäkoq” kanqanta qellqarqan. Tsëta qellqarqa, pantareq akrashqa sirweqninkuna ciëluchö kawayänampaq kaqta Dios permitinqampitam Pabluqa parlëkarqan (Efes. 2:4-7). Peru Diosqa manam ciëluta ëwayänampaq kaqkunallatatsu llakipan. Davidmi kënö qellqarqan: “TEYTA DIOSQA pïmëpaqpis allitam ruran. Llapan kamashqantapis kuyarmi rikan” (Sal. 145:9). Jehoväqa nunakunata kuyarmi, pëkunachö ima allitapis tarirninqa llakipan.

5. ¿Imanötan Jesusqa Teytan llakipäkoq kanqanta yachakurqan?

⁵ Jehovä llakipäkoq kanqantaqa, pï mëpitapis Jesusllam mas musyan. Pëqa Patsaman manaraq shamurmi, mëtsika waranqa watakuna Teytanwan ciëluchö kawarqan (Prov. 8:30, 31). Mëtsika kutim, jutsallakoq nunakunata imanö llakipanqanta rikarqan (Sal. 78:37-42). Y nunakunata yachatsirqa, Teytan llakipäkoq kanqantam seguïdu yachatsikoq.

6. ¿Ima igualatsikuywantan Teytan alläpa llakipäkoq kanqanta Jesus rikätsikurqan?

⁶ Punta kaqchö yachakunqantsiknömi, Teytampa wayimpita ëwakushqa jövinpaq parlarnin, Jehovä alläpa llakipäkoq kanqanta Jesus yachatsikurqan. Tsë jövinqa teytampa wayimpita ëwakurmi, “lluta kawakur llapan kapunqankunata usharirqan” (Lüc. 15:13). Tsëpita tiempuwanqa, lluta kawakunqampitam arrepentikurqan, llakikurqan y teytampa wayinman kutirqan. ¿Imanötan teytan chaskirqan? Jesusmi kënö nirqan: “karullachöraq këkaptinmi teytanqa rikëkurqan y alläpa ankuparqan, y ëqipa ëwarmi waqukurkurqan, y alläpa kuyëpam mutsëkurqan”. Piñapänampa rantinmi, teytanqa llakiparqan, perdonarqan y familianman yapë chaskirqan. Alläpa jutsallakushqa kaptimpis, arrepentikushqa kaptinmi teytanqa perdonarqan. Tsë igualatsikuychö teytaqa, Jehovä alläpa llakipäkoq kanqantam rikätsikun. Tsënö yachatsikunqanwanmi, llapan shonqunkunawan arrepentikoqkunata Jehovä perdonanqanta Jesus rikätsikurqan (Lüc. 15:17-24).

7. Jehovä alläpa yachaq kanqanqa, ¿imanötan llakipäkoq këninchö yanapan?

⁷ Alläpa yachaq kar. Alläpa yachaq karpis, Jehoväqa, manam mana kuyakoqtsu. Bibliachömi kënö nin: “Rarapita shamoq yachëqa” nunata tikratsin, ‘alläpa ankupäkoqta y imëka allikunata ruraqtam’ (Sant. 3:17). Juk kuyakoq teytanömi, llakipäkoq kanqan wamrankunata yanapanqanta Jehoväqa musyan (Sal. 103:13; Is. 49:15). Tsënö llakipäkoq kanqanmi, imachöpis pantareq nunakunata shamoq tiempupaq shuyäkuy-yoq kayänampaq yanapan. Alläpa yachaq karmi, nunakunachö ima allitapis tarirqa llakipan, peru mana tarirqa manam llakipantsu.

8. ¿Imatataq hörachöqa rurayänan y imanir?

⁸ Peru këman pensarishun: Diosta sirweq juk nuna, musyëkarnin jutsata rurarnin kawakuyta munanman. Tsëqa, ¿imatataq rurashwan? Dios yanapaptinmi, ‘pëwan manana juntakunapaq’ apostol Pablu qellqarqan (1 Cor. 5:11). Jutsata rurayanqampita mana arrepentikoqkunataqa, congregacionpitam qarquriyan. Wakin wawqi panikuna alli kayänampaq y Jehovä limpiu kanqanta rikätsikuyänampaqmi tsëta rurayan. Peru wakinkunaqa congregacionpita pitapis qarquyanqanqa, Dios llakipäkoq kanqanta mana rikätsikunqantam niyan. ¿Peru rasumpaku tsënö?

¿LLAKIPÄKOQ KËKU CONGREGACIONPITA JUTSALLAKOQTA QARQUYANQAN?

9, 10. (1) Hebrëus 12:5 y 6 ninqannö, ¿imanirtan jutsallakoqta congregacionpita qarquyanqanqa llakipäkoq kayanqanta rikätsikun? (2) ¿Ima igualatsikuytan tsëta mas entiendinapaq yanapamantsik?

⁹ Pipis kuyanqantsik Jehoväpa testïgun manana kanqanta nir reunionchö willakarayämuptinqa, alläpam llakikuntsik. Y itsa, “¿wanarqanku congregacionpita qarquyänan?” nir tapukuntsik. ¿Llakipäkoq këku congregacionpita jutsallakoqta qarquyanqan? Awmi. Wanëkaptin pitapis corregiyanqanqa, yachaq, llakipäkoq y kuyakoq kayanqantam rikätsikun (Prov. 13:24). Congregacionpita jutsallakoqta qarquyanqanqa, ¿mana alli rurëninkunata dejanampaq yanapanmanku? Awmi. Mëtsikaq jutsallakoqkunam niyan, congregacionpita qarqushqa kayänampaq creikoqkunata rikaqkuna decidiyanqan, mana allita rurëkäyanqanta cuentata qokuyänampaq yanapashqa kanqanta. Jina cambiayänampaq y Jehoväpa testïgun këman kutiyämunampaq yanapashqa kanqantam niyan (leyi Hebrëus 12:5, 6).

¹⁰ Mitsikoq nuna juk üshan qeshyëkanqanta rikärinqanman pensarishun. Tsë üshata jampinampaqqa, wakin üshakunapitam rakinan. Peru üshakunaqa, wakinkunawan juntu këtam munayan. Tsëmi rakiriyaptinqa, waqayan y tranquïlutsu kayan. Tsëqa, qeshyëkaq üshata wakimpita rakirqa, ¿mitsikoq nuna mana alli kanqantaku rikätsikun? Manam. Qeshyëkaq üshata wakinkunapita mana rakiptinqa, llapankuna qeshyariyänampaq kaqtam musyan. Tsëmi qeshyëkaqta rakirqa, llapan üshankunata cuidëkan (Levïticu 13:3 y 4 ninqantawan igualaratsi).

11. (1) Congregacionpita qarqushqa nunaqa, ¿imanirtan imëka qeshyëkaq üsha cuenta kanman? (2) Congregacionpita qarqushqa nuna Testïgu këman kutimunampaqqa, ¿imakunata ruranqantan yanapanqa?

¹¹ Congregacionpita qarqushqa nunaqa, imëka tsë qeshyëkaq üshanömi kanman (Sant. 5:14). Jutsata rurëqa, wakin muyakoq o shukukoq qeshyakunanömi kanman. Tsëmi jutsallakushqa wakin nunakunataqa, congregacionpita qarquriyan. Tsëta rurayanqanqa alli sirweqninkunata Jehovä kuyanqantam rikätsikun, y jutsallakushqa nunatapis arrepentikunampaqmi yanapanman. Congregacionpita qarqushqa kayaptimpis, reunionkunamanqa ëwëta puëdinmi, y tsëta ruranqanmi, yapë markäkunampaq o yärakunampaq yanapanqa. Jina reunionkunachömi publicacionkunata mañakuyta puëdin y JW Broadcasting^® progrämatapis rikëta puëdinmi. Y creikoqkunata rikaqkuna tsë nuna cambiëkanqanta rikarqa, Jehoväpa amïgun yapë kanampaq y Testïgu këman kutimunampaqmi, höra höra consejëta puëdiyan.b

12. Jutsallakoq mana arrepentikuptinqa, ¿imatataq creikoqkunata rikaqkuna kuyarnin y llakiparnin rurayan?

¹² Yarpäshun, jutsata rurarir mana arrepentikoqkunallatam congregacionpitaqa qarquyan. Creikoqkunata rikaqkunapaqqa, tsëta decidiqa manam fäciltsu. Jina Jehoväqa, ‘jutsata ruranqantsikmannö castigamanqantsiktam’ yarpäyan (Jer. 30:11). Wawqi paninkunatam kuyayan y Jehoväwan amïgu këninkuna mana ushakänampaqmi, imëkanöpa yanapëta procurayan. Peru höraqa, kuyar y llakiparmi congregacionpita qarquriyan.

13. ¿Imanirtan Corintu markachö juk cristiänuta qarquyarqan?

¹³ Apostolkuna kawayanqan witsan, jutsampita mana arrepentikoq nunawan imata rurayänampaq apostol Pablu mandakunqanta rikärishun. Corintu markachö këkaq tsë cristiänuqa, teytampa warmintam wätaq. ¡Tsëqa melanëpaqmi karqan! Unë Israel naciontam Jehoväqa kënö nishqa karqan: “Pipis madrastanwan punurqa tëtanta manam respetantsu. Tsënö nunataqa madrastantawan wanutsiyanki” (Lev. 20:11). Pabluqa, manam tsë jutsallakuykaq nunata wanutsiyänampaq nita puëdeqtsu. Tsënö kaptimpis, congregacionpita qarquyänampaqmi nirqan. Tsë nuna rurëkanqantaqa, tsë congregacionchö wakin cristiänukunaqa melanäyaqmi. Peru wakinqa, manam alläpa jutsatanötsu rikäyaq (1 Cor. 5:1, 2, 13).

14. ¿Imanötan Corintu congregacionpita qarqushqa nunata Pablu llakiparqan y imanir? (2 Corintius 2:5-8, 11).

¹⁴ Tsëpita tiempuwanqa, tsë nuna rasumpa cambiashqa kanqanta y arrepentikushqa kanqantam Pablu musyarirqan. Tsë nuna, congregacionchö kaqkunata mana allichö quedatsishqa kaptimpis, Pabluqa “alläpa chukru” këta mana munanqantam creikoqkunata rikaqkunata nirqan. Tsëmi imata y tsëta imanir rurayänampaq kaqta kënö nirqan: “Mas alliqa kanqa llakiparnin perdonayänëki y shoqayänëkim, tsënöpa alläpa llakikï mana nitirinampaq”. Pabluqa tsë arrepentikoq nunata llakiparqanmi. Manam alläpa yarpachakur y llakikur, Dios perdonëkunampaq kallpachakuyta dejarinantaqa munarqantsu (leyi 2 Corintius 2:5-8, 11).

15. ¿Imanötan creikoqkunata rikaqkuna jutsallakoqta corregiyan o llakipäyan?

¹⁵ Creikoqkunata rikaqkunaqa, Jehovänöllam llakipäkoq kayan. Jutsallakoq nuna wanaptinqa, corregiyanmi, peru imallatapis allita tariyaptinqa llakipäyanmi. Jutsallakoqta mana corregiyaptinqa, manam llakipäyantsu, sinöqa mana allita rurayanqantam rikaräkuyanman. Peru ¿creikoqkunata rikaqkunallaku llakipäkoq kayanman?

¿IMATAN LLAPANTSIKTAPIS LLAKIPÄKOQ KANAPAQ YANAPAMÄSHUN?

16. Proverbius 21:13 ninqannö, ¿mana llakipäkoq kaqkunata Jehovä wiyanku?

¹⁶ Llapantsikpis Jehovänö llakipäkoq këtam munantsik. ¿Imanir? Mana llakipäkoq kaqkunapa mañakuyninta mana wiyaptinmi (leyi Proverbius 21:13). Mañakunqantsikta Jehovä wiyananta munarmi, wakinkunataqa mana allipa tratantsiktsu. ‘Waktsakuna mañakuyaptin’ mana wiyanantsikpa rantinqa, sufrikaq wawqi panintsikkunata yanapanapaqmi listu këkantsik. Jina Bibliachö kënö ninqantam wiyakuntsik: “Mana ankupäkoq kaqqa, mana ankupashpam juzgashqa kanqa” (Sant. 2:13). Humildi kar y llakipämänantsikta alläpa wananqantsikta yarparqa, wakinkunatapis llakipäshunmi. Y masran Testïgu këman kutimoqta llakipänantsik.

17. ¿Imanötan rey Davidqa llapan shonqunwan llakipäkoq kanqanta rikätsikurqan?

¹⁷ Bibliachöqa, llakipäkoq y wakinkunata shumaq trataqkunapitaqa atskaqpitam yachakuyta puëdintsik. Llapan shonqunwan llakipäkoq rey Davidpaq parlarishun. Jehovä akranqan rey Saul wanutsita munaptimpis, Davidqa llakiparqanmi y manam vengakurqantsu ni mana allita rurarqantsu (1 Sam. 24:9-12, 18, 19).

18, 19. ¿Imakunachötan David mana llakipäkoq kanqanta rikätsikurqan?

¹⁸ Tsënö kaptimpis, Davidqa manam llakipäkoqllatsu imëpis karqan. Këllaman pensarishun: mana alli geniuyoq Nabal nuna insultaptin y Davidpa soldädunkunata mikuyninkuna qarëta mana munaptinmi, alläpa cölerakur Nabalta y wayinchö llapan täraqkunata ushakätsinampaq Davidqa nirqan. Peru Nabalpa warmin Abigailqa, alläpa qarakoq y pacienciakoq karmi, Davidpaq jinan höra mikuynin aparqan. Tsëta ruranqampitam, Davidqa jutsannaqkunata wanutsiman charqantsu (1 Sam. 25:9-22, 32-35).

¹⁹ Juk kutichönam Diospa willakoqnin Natan, juk rïcu nuna juk waktsa nunapa jukllëlla kuyë üshanta suwashqa kanqanta nirqan. Tsëmi Davidqa alläpa piñakur kënö nirqan: “Teyta Diospa shutinchömi niq: ‘¡Tsënö rurashqanpita tsë nunata juklla wanutsiyätsun!’” (2 Sam. 12:1-6). Pëqa musyaqmi, juk üshata pipis suwakuptinqa, chusku masta kutitsinampaq Moises Qellqanqan Leychö ninqanta (Ex. 22:1). Peru tsë nunata wanutsiyänampaq mandakunqanqa, llakipäkoq mana kanqantan rikätsikurqan. Rasumpa kaqchöqa, Natanqa tsë igualatsikuypita parlarqan, tsëpitapis mas peor jutsakunata David rurashqa kanqanta rikätsinampaqmi. Peru Jehoväqa, Davidta alläpam llakiparqan, y manam Natan parlanqan igualatsikuychö nunata wanutsiyänampaq David mandakunqannötsu pëta rurarqan (2 Sam. 12:7-13).

20. ¿Imatataq David ruranqampita yachakuntsik?

²⁰ Yarpäshun, Davidqa alläpa cölerakurmi, Nabalta y wayinchö llapan täraqkunata wanutsita munarqan. Y Natan parlanqan igualatsikuychö nunata wanutsiyänampaqpis mandakurqanmi. Llakipäkoq këkarninqa, ¿imanirtan tsë nunata wanutsiyänampaq mandakurqan? David tsë höra imapa pasëkanqanman pensarishun. Pëqa, kikin jutsallakushqa karmi, piñashqa y yarpachakurnin këkarqan. Pitapis mana llakiparnin tratanqantsikqa, Jehoväwan amïgu kënintsik mana alli këkanqantam rikätsikun. Tsëmi Jesusqa kënö consejakurqan: “Amana pitapis juzgayënatsu, kikikikunapis mana juzgashqa kayänëkipaq; porqui juzgayanqëkimannömi qamkunapis juzgashqa kayanki” (Mat. 7:1, 2). Tsëqa, wakinkunata shumaq tratashun y Diosnintsiknö llakipäkoq kanapaq kallpachakushun.

21, 22. ¿Imanötan llakipäkoq kanqantsikta rikätsikushwan?

²¹ Llakipäkoq nunaqa manam parlanllatsu, sinöqa ruranqankunawanmi rikätsikun. Llapantsikmi, familiantsikchö, congregacionchö o markantsikchö pillatapis yanapanapaq pensashwan. ¡Tukuynöpa yanapanapaqchi pensashun! ¿Shoqayänanta wanaqta pillatapis reqintsikku? ¿Pillapaqpis mikuynin aparnin o juknöpa yanaparishwanku? Pipis Testïgu këman kutimoq, ¿shumaq parlapänata o shoqanata wananku? ¿Puëdishwanku Bibliachö këkaq alli noticiakunata wakinkunata willëta? Tsëkunata rurarmi wakinkunata llakipanqantsikta rikätsishun (Job 29:12, 13; Rom. 10:14, 15; Sant. 1:27).

²² Wakinkunaman yarpachakurqa, mas fäcilmi kanqa llakipäkoq kanantsikpaq. Llakipäkoq kashqaqa, “alläpa ankupäkoq” Diosnintsikmi kushikunqa.