Bautizakurirpis “mushoq imanöpis këta imëka röpatanö” vistikurnin sïgui

1. ¿Imaman pensanqantsikkunatataq parlanqantsik y ruranqantsikkuna rikätsikunqa?

BAUTIZAKUNQANTSIKPITA juk ishkë junaqkuna o mëtsika watakuna pasarishqana kaptimpis, Jehovä kuyanqan nunakunanömi këta munantsik. Tsëpaqqa, imakunata pensanqantsiktam alli rikänantsik. ¿Imanirtan tsëta ruranantsik? Imakunaman pensanqantsik imanö nuna kanqantsikta rikätsikuptinmi. Mana alli munënintsikkunallaman yarparäkushqaqa, imata ninqantsik o ruranqantsikpis mana allikunam kanqa (Efes. 4:17-19). Peru alli kaq rurëkunallaman pensashqaqa, imata ninqantsikpita y ruranqantsikpitam Teytantsik Jehoväqa kushikunqa (Gäl. 5:16).

2. ¿Ima tapukuykunapitataq këchö yachakushun?

² Punta kaqchö yachakunqantsiknöpis, mana alli pensëkunaqa, peqantsikman o umantsikman imë höra karpis chäramunmanmi. Peru tsë pensëkunamannö ruranapaq o mana ruranapaqpis, kikintsikmi decidita puëdintsik. Manaraq bautizakurmi, Jehovä melananqan parlëkunata y portakuyta dejanantsik. Unë imanöpis kanqantsikta dejanapaqqa, tsëkunataran mas puntata ruranantsik. Peru Jehovä chipyëpa kushishqa kanampaqqa, kë mandakunqantam ruranantsik: “Mushoq imanöpis këta imëka röpatanö vistikuyë” (Col. 3:10). Këchömi, kë tapukuykunapita yachakushun: ¿imatan “mushoq imanöpis” këqa? y ¿imanötan röpatanö vistikushwan y mana qotukushwantsu?

¿IMATAN “MUSHOQ IMANÖPIS” KËQA?

3. ¿Ima ninantan imanöpis kënintsikchö mushoq këqa, y imanötan Gälatas 5:22 y 23 ninqannö imëka röpatanö vistikuntsik?

³ Imanöpis këninchö mushoq kaqqa, Jehovänömi pensan y imatapis ruran. Y pënö kanapaqqa, ¿imatataq ruranantsik? Pensënintsikkunachö, sentimientuntsikkunachö y rurënintsikkunachömi santu espïritunwan Dios yanapamänata permitinantsik (leyi Gälatas 5:22, 23). Këkunallaman pensarishun: imanöpis këninchö mushoq kaqqa, Jehoväta y pëta sirweqkunatam kuyan (Mat. 22:36-39). Mana allikunapa pasarpis kushishqallam këkan (Sant. 1:2-4). Llapankunawan yamë kawakunampaqmi yanapakun (Mat. 5:9). Pï mëwampis pacienciakoq y yachanëpaqmi (Col. 3:12, 13). Alli kaq rurëtam kuyan y ruran (Lüc. 6:35). Ruranqankunawanmi llapan shonqunwan Jehoväman markäkunqanta o yärakunqanta rikätsikun (Sant. 2:18). Cöleratsiyaptimpis tranquïlum këkan (Tïtu 3:2). Y tentacionkunaman mana ishkinampaqmi alli tsarakun (1 Cor. 9:25, 27).

4. Gälatas 5:22 y 23 ninqantaqa, ¿imanirtan llapanta juntu ruranantsik?

⁴ “Mushoq imanöpis këta imëka röpatanö” vistikunapaqqa, Gälatas 5:22 y 23 y wakin versïculukunachö ninqannömi alli nuna kanapaq ruranantsik.b Tsë versïculukunachö ninqannö kanapaqqa, manam röpakunata vistikoqnötsu jukllëllapayan tsëkunata ruranapaq kallpachakuntsik. Tsëpa rantinqa, llapantam juntu ruranantsik. Këllaman pensarishun: wakinkunata rasumpa kuyarqa, pacienciakoq y kuyakoqmi kashun. Y rasumpa alli nuna kanapaqqa, yachanëpaq y geniuntsikta dominëta yachaqmi kanantsik.

MUSHOQ IMANÖPIS KËTAQA, ¿IMANÖTAN RÖPATANÖ VISTIKUNTSIK?

5. ¿Imanötan ‘Cristupa pensëninta’ katsintsik y imanirtan Jesus imanö kawanqampita yachakushwan? (1 Corintius 2:16).

⁵ (Leyi 1 Corintius 2:16). Imanöpis kënintsikchö mushoq kanapaqqa, ‘Cristupa pensënintam’ katsinantsik. ¿Ima ninantan tsëqa? Jesus pensanqannömi pensanantsik y imatapis ruranantsik. Jesusqa imanö kanqanchömi, Jehoväpa imanö këninta paqwë kanqantanölla rikätsikurqan (Heb. 1:3). Jesus pensanqannö pensanapaq mas kallpachakurqa, pë kanqannömi kashun y imatapis rurashun (Filip. 2:5).

6. Imanöpis kënintsikchö mushoq kanapaq kallpachakuykarqa, ¿imatataq yarpänantsik?

⁶ ¿Peru Jesus kanqannö këtaqa puëdishwantsuraq? Itsapis kënö ninkiman: “Jesusqa imachöpis mana pantaqmi karqan. ¡Manachi ni imëpis pënö këtaqa puëdishaqtsu!”. Tsënö pensarqa, këkunata yarpë: juk, qamqa Jehovänö y Jesusnö kanëkipaqmi kamashqa karqunki. Tsëmi llapanchö pëkunanö mana karpis, pëkunanö kanëkipaq churapakëta y tsëta logrëta puëdinki (Gen. 1:26). Ishkë, Diospa poderninmanqa manam imapis igualëta puëdintsu. Tsë poderninwan yanapashuptikim, japallëkilla logrëta mana puëdinëkipaq kaqta logranki. Kima, Jehoväqa manam llapanchö pënö paqwë kanëkitatsu shuyaran. Kuyakoq Teytantsik Jehoväqa, Patsachö kawayänampaq kaqkuna manana pantaq kayänampaqmi, waranqa watapa shuyaranqa (Rev. 20:1-3). Jehoväqa puëdinqantsikmannö kallpachakunapaq, y pë yanapamänapaq kaqman confiakunantsiktam shuyaran.

7. ¿Imatataq qateqnin kaq pärrafukunachö yachakushun?

⁷ ¿Imakunachötan Jesusnö kanapaq kallpachakushwan? Diosnintsik imanö kanqampita chuskuta yachakurishun. Tsë chuskunta imanö këninchö Jesus rikätsikunqanta y imata yachakunqantsikta rikärishun. Jina juk ishkë tapukuykunatam rikäshun, mushoq imanöpis kënintsikchö mas alliyänapaq y imachö pishipanqantsikta o mana pishipanqantsikta musyanapaq.

8. ¿Imanötan Jesusqa kuyakoq kanqanta rikätsikurqan?

⁸ Jesusqa Jehoväta alläpa kuyarmi, përëkur y noqantsikrëkur imëkata rurarqan (Juan 14:31; 15:13). Y Patsachö kawanqan witsanmi, nunakunata alläpa kuyanqanta rurëninkunawan rikätsikurqan. Pëqa contranchö këkaqkunatapis, kuyëpa y llakipëpam tratarqan. Tsënö kuyakoq kanqantaqa rikätsikurqan, Diospa Gobiernumpita nunakunata parlaparninmi (Lüc. 4:43, 44). Jina Diosta y nunakunata alläpa kuyanqantaqa rikätsikurqan, chikeqninkuna sufritsiyänanta y wanutsiyänanta permitirninmi. Tsëta ruranqampitam nunakunaqa manana wanur kawakuyta puëdiyanqa.

9. ¿Imatataq rurashwan Jesus kuyakunqannö kuyakoq kanapaq?

⁹ Teytantsik Jehoväta alläpa kuyarninmi, pëllatana sirwinapaq änikurir bautizakurqantsik. Tsëmi Jesusnölla nunakunatapis kuyanantsik. Apostol Juanmi kënö qellqarqan: “Pipis creikoq mayinta rikashqa këkar mana kuyaq kaqqa, manam mana rikanqan Diosta kuyëta puëdintsu” (1 Juan 4:20). Kë tapukuykunamanmi pensanantsik: “¿Llapan shonqüwanku wakinkunata kuyä? ¿Mana alli tratayämaptimpis kuyëpaku wakinkunata tratä? ¿Nunakunata kuyarku Diospita parlapänäpaq tiempüta y kapamanqankunata utilizä? Ruranqäta mëtsikaq nunakuna mana valorayaptin o conträ churakëkäyaptimpis, ¿tsëta ruräku? ¿Puëdïmanku tiempüta mas rakita Diospita mas yachatsikunäpaq?” (Efes. 5:15, 16).

10. Pïmëwampis yamë kawakunampaqqa, ¿imanötan Jesus yanapakoq?

¹⁰ Jesusqa pïmëwampis yamëmi kawakoq. Mana allipa tratayaptimpis, manam mana allipaqa kutitseqtsu. Nunakunawan yamë kanampaqmi kallpachakoq y problëmankunata altsayänampaqmi wakinta neq. Këllata yarpärishun: adoranqanta Jehovä chaskinanta munarqa, creikoq mayinwanraq amishtanampaq kaqtam Jesusqa yachatsikurqan (Mat. 5:9, 23, 24). Y apostolninkunatam mëqan mas alli kanqanta mana discutiyänampaq kutin kutin consejarqan (Lüc. 9:46-48; 22:24-27).

11. Piwampis yamë kawakunapaqqa, ¿imanötan yanapakushwan?

¹¹ Pïmëwampis yamë kawakunapaqqa, manam mana pelyanallapaqtsu kallpachakunantsik. Piwampis cöleratsinakur o llakitsinakurqa, raslla altsanapaqmi kallpachakunantsik. Y tsënölla rurayänampaqmi wawqi panintsikkunatapis ninantsik (Filip. 4:2, 3; Sant. 3:17, 18). Kë tapukuykunamanmi pensashwan: “¿Piwampis amishtanäpaqqa imata ruranäpaqtan listu këkä? ¿Juk wawqi o pani llakitsimanqanmanku yarparäkü? ¿Llakitsimaq kaqraq parlapämänantaku shuyarä imatapis altsanäpaq? ¿O llakitsimashqa kanqanta pensarpis, noqaku altsayänäpaq parlapëta procurä? Alli kanqantanö rikarqa, ¿shumaq parlar problëmankunata altsayänampaqku wakinkunatapis nï?”.

12. ¿Imanötan Jesusqa kuyakoq kanqanta rikätsikurqan?

¹² Jesusqa nunakunata shumaqmi trataq (Mat. 11:28-30). Mana allikunapa pasëkarpis, kuyakoq y pensëninllachö mana tsarakoqmi karqan. Këllata yarpärishun: warmi wamranta Fenicia markapita juk warmi kachakëkatsinampaq rogakuptin jinan höra mana kachakätsishqa kaptimpis, Jesusqa kuyëllapam parlaparqan y tsëpitam Diosman alläpa markäkunqanta rikarnin wamranta kachakätsirqan (Mat. 15:22-28). Peru kuyakoq karpis, pitapis consejanan kaptinqa, clärum parlapaq. Këllaman pensarishun: Jehoväpa voluntäninta Jesus mana ruranampaq Pëdru juknöpa pensatsita munaptinmi, pëqa wakin qateqninkunapa janankunachö corregirqan (Mar. 8:32, 33). Tsëtaqa, manam Pëdruta penqakatsinampaqtsu rurarqan, sinöqa wakin qateqninkunapis Diospa voluntäninta rurëchö yanapayänampaq kaqta rikätsinampaqmi. Pëdruqa correginqampita penqakurqanchi, peru biennimpaqmi karqan.

13. Rasumpa kuyakoq kanqantsikta rikätsikunapaqqa, ¿imatataq höraqa ruranantsik?

¹³ Pitapis rasumpa kuyanqantsikta rikätsikunapaqqa, höraqa clärum parlapänantsik. Tsëta rurarqa, Jesus ruranqannölla pitapis yachëpa parlapäshun y Diospa Palabranchö ninqanwan consejashun. Jehoväta y noqantsikta kuyamarnintsik kuyëllapa consejanqantsikta wiyakuyänampaq kaqtam shuyaräshun. Kë tapukuykunaman pensashun: “¿Pitapis kuyanqä kaq mana allita rurëkanqanta rikarqä, parlapëtaku procurä? Y parlaparqa, ¿kuyëpaku o llakitsipaku parlapä? ¿Y imanirtan consejä? ¿Cölerashqa këkarninku o pë alli kananta munarku?”.

14. ¿Imanötan Jesusqa alli nuna kanqanta rikätsikurqan?

¹⁴ Jesusqa manam ima alli kanqanllatatsu musyarqan, sinöqa rurëninkunawanmi rikätsikurqan. Pëqa Teytanta kuyarmi, alli kaqman yarpëkur imatapis rurarqan. Alli kaq nunaqa wakinkunata imallachöpis yanapanampaqmi pensan y pëkunapaq imallatapis ruranampaqmi kallpachakun. Manam ima alli kanqanllatatsu musyanantsik, sinöqa alli kaqman pensëkurmi ruranantsik. Itsapis pipis kë tapukuyman pensanman: “¿Mana alli kaqman pensëkur pillapis alli kaqta rurëta puëdinmantsuraq?”. Awmi, këllaman yarpärishun: waktsakunata limushnankuna qararpis, wakinkuna musyayänanta procuraq nunakunapaqmi Jesusqa parlarqan. Jehoväqa manam tsënö rurayanqampita kushikoqtsu (Mat. 6:1-4).

15. ¿Imanötan alli nuna kanqantsikta rikätsikushwan?

¹⁵ Alli nunaqa kashun wakinkunaman yarpëkurnin, imatapis rurashqam. Kë tapukuykunamanmi pensashwan: “¿Ima alli kanqanta musyäku y imatapis tsëmannöku rurä? ¿Imanirtan allita ruranäpaq kallpachakü?”.

MUSHOQ IMANÖPIS KANQANTSIKTAQA, ¿IMANÖTAN CUIDASHWAN?

16. ¿Imatataq cada junaq ruranantsik y imanir?

¹⁶ Bautizakurir imanöpis kënintsikchö chipyëpa mushoqna kanqantsikmanqa ama pensashuntsu. Mushoq imanöpis kanqantsiktaqa, imëka röpantsiktanömi cuidanantsik. Tsëmi imanöpis kënintsikchö Jehovänö kanapaq cada junaq kallpachakunantsik. Y tsënöqa rurashun Jehoväpa podernin imatapis ruranapaq yanapamashqam (Gen. 1:2). Juk parlakuychöqa, santu espïritupa wayïnin imanö kanqanmi imata ruranapaqpis yanapamashwan. Këllata yarpärishun: Jesuspa qateqnin Santiägum kënö qellqarqan: “Markäkïpis alli rurëkunayoq mana karqa wanushqa cuenta këkan” (Sant. 2:26). Tsënöllam santu espïritupa wayïnin imanö kanqantaqa llapan rurënintsikchö rikätsikunantsik. Tsëkunata rurashqam Diospa podernin yanapëkämanqantsikta rikätsikuntsik.

17. ¿Imatataq rurashwan santu espïritupa wayïnin kanqanmannö mana rurashqaqa?

¹⁷ Mëtsika watapana bautizakushqa wawqi panikunapis, höraqa manam santu espïritupa wayïnin imanö kanqanmannötsu kayan. Tsënö karpis, kallpachakurnin sïguiyanqanmi mas alliqa. Këllaman pensarishun: kuyanqantsik röpantsik paskakäriptinqa, ¿manam jinan höratsu jitarintsik aw? Tsëpa rantinqa, puëdirninqa jinan höran jirarkuntsik. Y tsëpita patsëqa mas cuidanapaqchi kallpachakushwan. Tsënöllam, pitapis shumaq, pacienciawan y kuyëpa mana tratashqa karqa, mana qelanäkurinantsiktsu. Tsënö pasamashqantsik kaptinqa, perdonëkamänapaq mañakunqantsikmi tsë nunawan amïgu kënintsik mana ushakänampaq yanapamäshun. Y yapëpaqqa tsënö manana tratanapaq churapakäshun.

18. ¿Imapitataq següru këkashwan?

¹⁸ ¡Imanö kawanapaq Jesus yachatsimanqantsikpitaqa alläpam agradecikuntsik! Pënö pensanapaq mas kallpachakushqaqa, mas fäcilmi pënö imatapis rurashun. Y tsënömi mushoq imanöpis kënintsikchö mas alliyäshun. Diosnintsik imanö kanqampitaqa, këchöqa chuskullatam yachakurquntsik. Peru allichi kanman Dios imanö kanqampita maskunata yachakunapaq tiempuntsikta patsätsinqantsikqa. Tsëkunataqa, Jehoväpa testïgunkuna yanapakïta ashinapaq neqchö, “Dios munanqannö kawë” y tsëpita “Santu espïritupa wayïnin” neqchömi tarishun. Imanöpis kënintsikchö mushoq kanapaq y tsëkunachö mas alliyar sïguishqaqa, Jehoväqa yanapamäshunmi.