Leyeqkuna tapukuyanqan

“Manam yamë këta apamoqtsu shamurqö, sinöqa rakikëta apamoqmi” nirqa, ¿ima nitataq Jesusqa munëkarqan?

Jesusqa pï mëwampis yamë kawakunapaqmi yachatsimarqantsik. Peru juk kutichöqa, apostolninkunatam kënö nirqan: “Ama pensayëtsu patsaman yamë këta apamoq shamunqäta; manam yamë këta apamoqtsu shamurqö, sinöqa rakikëta apamoqmi. Awmi, rakikëta apamoqmi shamurqö, tsëmi tsuriqa teytampa contran kanqa, y warmi wamranam mamampa contran kanqa, y lumtsïnam suegrampa contran kanqa” (Mat. 10:34, 35). ¿Ima nitataq Jesusqa munëkarqan?

Familiakuna rakikäyänantaqa Jesusqa manam munarqantsu. Tsënö karpis, yachatsikunqanman wakin creeqkunapa familiankuna rakikäyänampaq kaqtam musyarqan. Qateqninkuna këta munaqkuna y bautizakoqkunaqa, clärum musyayänan tsëta rurayanqan familiankunata itsapis mana gustanampaq kaqta. Awmi, majan o mëqan familiampis contran churakaptinqa, Jesus yachatsikunqannö kawanampaqqa manam fäciltsu kanqa.

Bibliachöqa llapan cristiänukunapaqmi kënö nin: “Llapan nunakunawan yamë kawakuyë” (Rom. 12:18). Peru Jesus yachatsikunqanqa, wakin familiakunatam rakikätsinan karqan. Tsëqa pasakun, juk familiachö mëqampis Jesus yachatsikunqannö kawar qallëkuptin, wakinkuna michäyaptin o contran churakäyaptinmi. Diospita yachakuykaq nunapa familiankunallam, juk parlakuychöqa, “wayinchö täraqkunallam”, chikeqninkuna tikrariyan (Mat. 10:36).

Cristupa qateqninkunapa familiankuna juk religionpita kayaptinqa, höraqa Jehoväwan Jesus niyanqanta rurayänampaq o familiankuna niyanqanta rurayänampaqmi decidiyänan. Itsa familiankunaqa, Diospa rikëninchö mana alli fiestakunata rurayänampaq obliguëta munayanqa. Tsë hörakunachömi, pita cäsukuyänampaq kaqta decidiyänan. Jesusmi kënö nirqan: “Pipis teytanta o mamanta noqapitapis mas kuyaqqa, manam qatimaqnïpaqnötsu” (Mat. 10:37). Peru qateqninkuna kanapaqqa, manam teytantsikkunata alläpa manana kuyanapaq kaqtatsu Jesusqa nikarqan. Kawënintsikchö pita mas puntaman churanapaq kaqtam pëqa yachatsikuykarqan. Mëqan familiantsikpis Jehoväta adoranantsikta michämashqapis, kuyëkäshunllam, peru kawënintsikchö Diosta mas puntaman churanapaq kaqtam yarpänantsik.

Awmi, Diosta adoranantsikta familiantsik michämashqaqa, alläpa llakikuypaqmi. Peru Jesuspa qateqninkunaqa kënö ninqantam yarpantsik: “Pipis sufritsikoq qerunta mana chaskikoq kaq y mana qatimaq kaqqa, manam qatimaqnïpaqnötsu” (Mat. 10:38). Jesuspa qateqninkunaqa imëka sufrimientukunapa pasanapaq kaqtam musyantsik, hasta familiantsik chikimänapaq kaqtapis. Imapa pasarpis, familiantsikkuna Bibliapita yachakuyänampaq alli portakunqantsik yanapanampaq kaqtam shuyarantsik (1 Pëd. 3:1, 2).