Jövin, bautizakushqana karqa mas alli cristiänu kanëkipaq kallpachakuy

1. ¿Imatataq mëtsikaq jövinkuna kananyaq rurayashqa?

LLAPAN watakunam Jehoväta sirwiyänampaq mëtsikaq jövinkuna bautizakuyan. Jövin, qam bautizakushqana kaptikiqa, entëru Patsachö llapan wawqi panikuna y Jehovämi alläpa kushishqa këkäyan (Prov. 27:11). Kananyaq imëkata ruranqëkiman yarpäri. Bibliata estudianëkipaqmi alläpa kallpachakurqunki y itsa tsëtaqa, atska watakunapa rurarqunki. Y tsëta ruranqëkim, Biblia Diospa Palabran kanqanta següru kanëkipaq yanapashurqunki. Peru tsëpitapis mas alliqa, Bibliata qellqatseq Jehoväta kuyëta yachakunqëkim. Tsënö kuyarmi, pëllatana sirwinëkipaq y bautizakunëkipaq churapakarqëki. ¡Alläpam kushikuyä tsëta ruranqëkipita!

2. ¿Imatataq këchö yachakushun?

² Manaraq bautizakurqa, Jehoväta sirwita munanqëkichöqa imëka problëmakunaparaq pasarqëki. Peru watakuna pasanqanmannömi, juk problëmakunapis kanqa. Satanasqa imëkatam ruranqa Jehoväta kuyëta dejanëkipaq y pëpita rakikäkurinëkipaq (Efes. 4:14). Peru ama Satanasta gustun qoytsu. ¿Imatan yanapashunki Jehoväta sirwir sïguinëkipaq y pëta äninqëkita cumplinëkipaq? Diosta sirwinqëkichö mas yanapakunëkipaqmi kallpachakunëki (Heb. 6:1). Këchömi tsëta imanö ruranëkipaq yachakushun.

¿IMATATAQ RURANKIMAN DIOSTA SIRWINQËKICHÖ MAS YANAPAKUNËKIPAQ?

3. ¿Imatataq llapan bautizakoqkuna rurayänan?

³ Ëfesu markachö cristiänukunata apostol Pablu consejanqantam bautizakoq kaqqa wiyakunan. Diosta sirwiyanqanchö “poqushqa nuna” kayänampaqmi consejarqan (Efes. 4:13). Pëqa, “Diosta mas sirwiyänëkipaq kallpachakurnin sïguiyë” neq cuentam karqan. Diosta sirwinqantsikchö mas alliyanqantsiktaqa, juk wamra winanqantawanmi apostol Pabluqa igualatsirqan. Juk wamra yuririptinqa, alläpam teytankuna kushikuyan, peru tsë wamraqa winarmi sïguinqa. Tiempu pasanqanmannömi, ‘pishi wamra këninta’ dejanan (1 Cor. 13:11). Tsë cuentallam bautizakoqkunaqa Diosta mas alli sirwiyänampaq kallpachakurnin sïguiyänan. Tsëta logranëkipaq imakuna yanapashunëkipaq kaqta rikärishun.

4. ¿Imatan yanapashunki Diosta mas alli sirwinëkipaq, y imanir? (Filipensis 1:9).

⁴ Jehoväta mas kuyanëkipaq kallpachakuy. Jehoväta kuyanqëkiqa clärum këkan. Tsënö kaptimpis, Pëta mas kuyanëkipaqmi kallpachakunëki. ¿Imatataq rurankiman? Apostol Pablum Filipensis 1:9 (leyi) ninqanchö imata ruranëkipaq kaqta nirqan. Filïpus markachö cristiänukuna Jehoväta “mas y mas” kuyayänampaq yanapëkunampaqmi pëta mañakurqan. Tsëmi rikätsimantsik, tiempu pasanqanmannö Diostaqa mas kuyëta puëdinqantsikta. Y tsëpaqqa, ¿imatataq rurashwan? Diosnintsikpita mas alli musyanapaq y mas alli entiendinapaqmi kallpachakunantsik. Tsëta rurashqaqa, masmi Jehoväpita yachakushun, masmi kuyashun y masmi imanö kanqanta y imatapis imanö ruranqanta rikäshun. Masmi Pë kushishqa kanampaq kaqkunata rurashun y llakitsinqan cösaskunata mana ruranapaqmi cuidakushun. Noqantsikpita imata shuyaranqanta musyanapaq y Pë munanqannö kawakunapaqmi kallpachakushun.

5, 6. ¿Ima mastataq rurashwan Jehoväta mas kuyanapaq?

⁵ Jina Jehovätaqa mas kuyashun, Tsurin Jesuspita yachakurninmi. Pëqa Teytan imanö kanqantam rikätsikurqan (Heb. 1:3). Y Jesus imanö kanqampitaqa mas yachakushun Mateu, Marcus, Lücas y Juan librukunata estudiarninmi. ¿Llapan junaqkunaku Bibliata leyinki? Tsëta manaraq rurarninqa, kanampitam qallëkunkiman. Jesus imata ruranqanta y ima ninqanta leyirnin, imanö kanqanta rikëta procurë. Yachanëllapaq nunam karqan, tsëmi wamrakunatapis mellqarkurnin kuyapaq (Mar. 10:13-16). Jesusqa kuyakoq y alli amïgum kaq. Tsëmi qateqninkunaqa imata pensayanqantapis mana mantsakushpa willayaq (Mat. 16:22). Pëqa tsënö karqan Teytan tsënö kaptinmi. Jehoväqa yachanëllapaq Teytam. Tsëmi Pëman mañakurqa, imanö këkanqantsikta llapanta willëta puëdintsik. Tsëmi noqantsikpaq mana allita mana pensanampaq kaqta següru karnin, Pëman mañakurnin imanö këkanqantsikta llapanta willëta puëdintsik. Pëqa alläpam kuyamantsik y noqantsikpaqmi yarpachakun (1 Pëd. 5:7).

⁶ Jesusqa nunakunatam alläpa ankupaq o llakipaq. Apostol Mateum kënö willakurqan: “Mëtsikaq nunakunata rikëkurmi alläpa ankuparqan, porqui mitseqninnaq üshakunanömi sufritsir ushashqa y ramakashqa këkäyarqan” (Mat. 9:36). Y Jehoväqa, ¿imanötan nunakunata rikan? Teytampaq parlarmi Jesus kënö nirqan: “Tsënöllam ciëluchö këkaq Teytäpis pishi wamranö kaqkunapita jukllaqllapis ushakärinantaqa munantsu” (Mat. 18:14). ¡Jehovä tsëläya kuyamanqantsikpitam alläpa kushikuntsik! Jesuspita mas yachakurqa, Jehovätam mas kuyashun.

7. ¿Imanirtan Diosta alli sirwikaq wawqi panikunawan amïgu kankiman?

⁷ Jina Jehoväta mas kuyanëkipaq y pëta mas alli sirwinëkipaqqa, congregacionchö wawqi panikunawan mas alli amïgu kanëkipaqmi procuranëki. Tsë wawqi panikunaqa imëpis kushishqallam këkäyan. Jehoväta sirwiyänampaq churapakäyanqampitaqa manam pësakuyantsu. Imakunapa pasashqa kayanqanta willayäshunëkipaq niri. Y imatapis alläpa precisaqta decidinëki kaptinqa, consejariyäshunëkipaq pëkunawan parlari. Bibliachömi kënö nin: “Consejaqninkuna mëtsikaq kayaptinqa, imëka rurayanqampis allillam yarqun” (Prov. 11:14, TNM).

8. ¿Imatataq rurankiman Bibliapita yachakuykanqëki rasumpa o mana rasumpa kanqanman pensar qallëkuptikiqa?

⁸ Imatapis imanir creinqëkita alli rikë. Ishkë kaq pärrafuchö rikanqantsiknömi, Satanasqa imëkatam ruranqa Diosta mas alli mana sirwinëkipaq. Pëqa Bibliapita yachakunqëki rasumpa mana kanqanta pensanëkitam munan. Këllaman pensari: imë karpis imapis kikinlla kamakashqa kanqampita parlaqtam wiyanki. Tsënö yachatsikuyanqanqa Diostam mana allichö quedatsin. Itsa wamrallaraq karqa, tsëkunamanqa yarpachakurqëkitsu. Peru jövinyarkuptikiqa, itsapis profesornikikuna imapis kikinlla kamakashqa kanqampita yachatsiyäshunki. Y pëkuna niyanqanqa itsapis rasumpanö kanman. Peru yarpë, pëkunaqa imëkatapis Diosnintsik kamashqa kanqantaqa manam allillaqa estudiayashqatsu. Proverbius 18:17 ninqanta yarpë. Tsëchömi kënö nin: “Puntata quejakuq chaqmi autoridäta ‘kënömi waknömi kashqa’ nir käyiratsin. Contran kaq chärirnam ‘manam tsënötsu’ nishpa declaran”. ¿Imatataq Bibliachö tsënö ninqampita yachakuntsik? Manam escuëlëkichö llapan yachatsiyäshunqëkikuna rasumpa kanqantaqa creinkimantsu. Kikikim Diospa Palabranta mas alli estudianëki. Tsëpaq parlaqta publicacionnintsikkunachö ashi. Imëkapis kikinlla kamakashqa kanqanta puntata creeq wawqi panikunawan parlë, y tsëpitaqa kuyamaqnintsik Diosnintsik imëkatapis kamashqa kanqanta imanir creir qallayanqanta tapuy.b Tsëkunapaq parlanqëkiqa, imëka pruëbakuna kanqanman pensanëkipaqmi yanapashunki.

9. ¿Imatataq Melissa pasanqampita yachakunki?

⁹ Imëkatapis Diosnintsik kamashqa kanqanta alli estudianqanmi, pani Melissata alläpa yanaparqan.c Pëmi kënö willakun: “Imëkapis kikinlla kamakashqa kanqantam profesorkunaqa rasumpatanö yachatsikuyan. Puntataqa, ‘¿rasumpatsuraq o manatsuraq?’ nirmi pensaq kä. Tsë asuntupita maslla yachakurnin Jehoväman manana confiakunäpaq kaqtam pensaq kä. Peru tsëpitaqa, creinqantsikkunaman següru karnin pëta sirwinapaq kaqta Jehovä munanqantam yarparqä. Tsëmi, ¿Existe un Creador que se interese por nosotros? neq libruta y ¿Es la vida obra de un Creador? y El origen de la vida. Cinco cuestiones dignas de análisis neq follëtukunata leyirqä. Tsëkunata estudiëtam wanëkarqä. Puntallata tsëkunata mana estudianqäpitam pësakü”.

10, 11. ¿Imatan yanapashunki mana alli rurëkunaman mana ishkinëkipaq? (1 Tesalonicensis 4:3, 4).

¹⁰ Mana alli munëkunaman mana yarparäkunëkipaq kallpachakuy. Jövin këman chanqëki witsanqa, piwampis pununakuytam alläpa munankiman y höraqa wakinkunam tsëta ruranëkipaq inkitayäshunkiman. Satanasqa, mana alli munënikita rurakunëkitam munan. ¿Imatan yanapashunki tsë jutsaman mana ishkinëkipaq? (Leyi 1 Tesalonicensis 4:3, 4). Jehoväman mañakurqa, tsë munëkunaman pensanqëkita willë y tsarakur sïguinëkipaq pë yanapëkushunëkipaq mañakuy (Mat. 6:13). Yarpë, Pëqa yanapashuynikitam munan y manam castigashuynikitatsu (Sal. 103:13, 14). Bibliachö këkaq consëjukunapis yanapashunkim. Qepa kaq pärrafuchömi Melissapaq parlarqantsik. Pëpis alläpam kallpachakurqan mana alli munëkunaman mana yarparäkunampaq. Pëmi kënö nin: “Bibliata cada junaq leyinqämi tsarakurnin sïguinäpaq yanapamarqan. Tsëmi yarpätsimaq kawënïta Jehoväta entregashqa kanqäta y pëta sirwita munanqäta” (Sal. 119:9).

¹¹ Ima problëmapa pasarpis, manam japallëkillatsu tsarakunëki. Imapa pasëkanqëkita papänikita o mamänikita willë. Rasumpa kaqchöqa, manam fäciltsu mana alli munëkunaman yarparanqëkita wakinkunata willëqa, peru tsëta ruranqëkiqa alläpam yanapashunki. Melissam këta yarpan: “Valienti kanäpaq Jehoväta mañakuykurmi, imakunaman pensanqäpaq papänïwan parlarqä. Willarirqa, mas ankashmi tikrarirqä. Tsëta ruranqäpita Jehovä kushishqa këkanqantam musyarqä”.

12. ¿Imatan yanapashunki alli kaqta decidinëkipaq?

¹² Bibliachö këkaq consëjukunata wiyakuy. Watakuna pasanqanmannömi, imatapis ruranëkipaq kikikina decidinki. Peru tsëyaqqa, maslla yachakunëkipaq kaqta pishinqantaran yarpänëki. ¿Imataraq rurankiman Jehoväwan amïgu kënikita imata ruranqëkipis mana ushakätsinampaq? (Prov. 22:3). Kari jutiyoq panim cuentata qokurqan, Diospa Palabranta alli reqeq wawqi panikunaqa imatapis imanö rurayänampaq Bibliachö ninanta, o imatapis decidiyänampaq wakinkuna niyänanta mana shuyaräyanqanta. Karim kënö nin: “Imata decidinäpaqpis, imapis o pipis nimänanta shuyaränäpa rantinmi, tsëkunapaq Jehovä imata pensanqanta entiendinäpaq kallpachakunä karqan”. Bibliata leyirqa, këkunaman pensë: “¿Jehovä imanö pensanqantataq këchö leyinqä yachatsiman? ¿Leyikanqächö ima consëjullapis kanku alli kaqta ruranäpaq yanapamänampaq? Këchö tarinqä consëjuta wiyakurqa, ¿imanöraq yarqapakushaq?” (Sal. 19:7; Is. 48:17, 18). Bibliata leyiptiki y tsëchö këkaq consëjukunaman pensaptikiqa, mas fäcilmi kanqa Jehovä kushishqa kanampaq imatapis decidinëki. Imanö pensanqanta mas alli entiendirmi, imapis o pipis imata decidinëkipaq o imanö ruranëkipaq kaqta nishunëkipaq shuyarankitsu. Tsëmi Diosta mas alli sirweq këman chëkanqëkita rikätsishunki.

13. ¿Imanötan alli amïgukunaqa yanapayäshunkiman? (Proverbius 13:20).

¹³ Jehoväta kuyaq amïgukunata ashi. Qanchis kaq pärrafuchö rikanqantsiknöpis, imanö amïguyoq kanqëkipitam Diosta mas alli sirwinki (leyi Proverbius 13:20). Sära jutiyoq panita ima pasanqanta rikäri. Säraqa mananam kushishqanatsu Jehoväta sirwikarqan. Peru ¿imatan yanaparqan? Säram kënö willakun: “Wanëkanqä höram alli kaq amïgukunata tarirqä. Juk yanasäwanmi Täpakoq revistata juntu estudiayaq kayä y juknin yanasänam, reunionkunachö parlakunäpaq yanapamarqan. Yanasäkuna yanapayämaptinmi, Bibliata japallä mas estudiarqä y Diosmampis mas mañakurqä. Ichikllapa ichikllapam Jehoväwan alli amïgu këman yapë charqä y mas kushishqam sirwir qallëkurqä”.

14. ¿Imanötan Julienqa alli amïgukunata tarirqan?

¹⁴ ¿Imatataq rurankiman alli amïgukunayoq kanëkipaq? Julien jutiyoq anciänum këta yarpan: “Mas jövinllaraq karqa, Diospita yachatsikur kanqächömi alli amïgukunata tarirqä. Pëkunaqa kushi kushillam puriyaq y Diospita yachatsikurnin kushishqa këta puëdinäpaq kaqtam rikätsiyämarqan. Tsëmi llapan tiempüwan Diospita yachatsikunäpaq pensar qallëkurqä. Jina winë mayïkunallawan amïgu karnin noqapita mas mayorna wawqikunawan amïgu mana kanqätam cuentata qokurirqä. Pëkunaqa Diosta mas alli sirwinäpaqmi yanapamëta puëdiyanman karqan. Y tsëpita Betelchö yanapakur qallëkurqa, yapëmi alli amïgukunata tarirqä. Pëkunam kushikunäpaq imatapis ruranqä höra allita akranäpaq yachatsiyämarqan y tsëqa, Jehoväwan mas alli amïgu kanäpaqmi yanapamarqan”.

15. ¿Imapita cuidakunampaqtan Timoteuta Pablu consejarqan? (2 Timoteu 2:20-22).

¹⁵ ¿Y congregacionchö këkaqkunapita pillapis mana alli amïgunö kanqanta rikaptikiqa? Congregacionchö Diosta allilla mana sirwikaqkunapis kayanqantam apostol Pabluqa musyarqan. Tsëmi pëkunapita witikurinampaq Timoteuta consejarqan (leyi 2 Timoteu 2:20-22). Teytantsik Jehoväwan amïgu këqa, manam imawampis igualantsu. Pëwan amïgu kanapaqqa, allim kallpachakurquntsik. Tsëmi mëqan amïguntsikpis Pëwan amïgu kënintsikta ushakäratsinanta munantsiktsu (Sal. 26:4).

DIOSTA SIRWINQËKICHÖ MAS YANAPAKUNËKIPAQ CHURAPAKARQA, MAS ALLIM DIOSTA SIRWINKI

16. ¿Imakunata ruranëkipaqtan churapakankiman?

¹⁶ Yanapashunëkipaq kaqkunata ruranëkipaq churapakë. Juk parlakuychöqa, Diosman mas markäkunëkipaq y Pëta mas alli sirwinëkipaq yanapashunëkipaq kaqkunata (Efes. 3:16). Këllaman pensari: itsa Bibliata mas seguïdu estudianëkipaq y leyinëkipaq churapakankiman (Sal. 1:2, 3). O itsa Jehoväta mas seguïdu y llapan shonquykiwan mañakunëkipaq churapakankiman. Jina kushishqa kanëkipaq imatapis ruranqëkita alli akranëkipaq y tiempuykita alli provechanëkipaqpis churapakankimanmi (Efes. 5:15, 16). Puëdinqëkimannö pëta sirwinëkipaq kallpachakuykaqta rikäshurnikim, Jehoväqa alläpa kushikun.

17. ¿Imanirtan wakinkunata yanapanqëkiqa kikikipaq alli kanqa?

¹⁷ Wakinkunata yanaparqa, Diosta mas allim sirwinki. Jesusmi kënö nirqan: “Imatapis qokïmi imata chaskipitapis mas kushikïtaqa apamun” (Hëch. 20:35). Tiempuykiwan y kallpëkiwan wakinkunata yanaparqa, kikikipaqmi mas alli kanqa. ¿Imakunata rurartan wakinkunata yanapankiman? Itsa congregacionnikichö edäna wawqi panikunata rurëninkunachö o celularninkunata o tablëtankunata imanö utilizäyänampaq yachatsirnin yanapankiman. Bautizakushqana jövin karqa, siervu ministerial kanëkipaq kallpachakuy, tsënöpa wawqi panikunata mas yanapanëkipaq (Filip. 2:4). Jina Diospa Gobiernumpita yachatsikurninmi, mana Testïgu kaq nunakunatapis kuyanqëkita rikätsikunki (Mat. 9:36, 37). Y puëdirqa, Jehoväta llapan tiempuykiwan sirwinëkipaq churapakë.

18. ¿Imanötan Diosta llapan tiempuykiwan sirwinqëki Pëta mas alli sirwinëkipaq yanapashunkiman?

¹⁸ Llapan tiempuykiwan Jehoväta sirwinëkipaq churapakarqa, masmi pëta sirwinqëkichö yanapakuyta puëdinki. Precursor karqa, Diospa Gobiernumpita Yachatsikoqkunapaq Escuëlaman, Betelchö o Diosta adoranapaq wayikunata rurarninmi yanapakuyta puëdinkiman. Kaitlyn jutiyoq shipash precursöram kënö nin: “Edäna wawqi panikunawan Diospita yachatsikunqämi, bautizakurirnin Diosta mas alli sirwinäpaq yanapamarqan. Diosta imanö sirwiyanqanta rikanqämi, Bibliata mas estudianäpaq y mas alli yachatsikoq kanäpaq yanapamashqa”.

19. ¿Ima bendicionkunatataq chaskinki Diosta mas alli sirwinëkipaq kallpachakurqa?

¹⁹ Jehoväta mas alli sirwirqa, mëtsika bendicionkunatam chaskinki. Manam jövin kënikichö mana yanapashunëkipaq kaqkunata ashir tiempuykita perdinkitsu (1 Juan 2:17). Manam mana alli kaqkunata akrarnin sufreq jövinkunanötsu kanki. Tsëpa rantinqa, kushishqam kawakunki y imapis allim yarqapushunki (Prov. 16:3). Diosta alli sirwinqëkita rikarmi, congregacionchö wakin jövinkuna y edäna kaqkunapis qampita yachakuyanqa (1 Tim. 4:12). Tsëpitapis masqa, Jehoväpa rikëninchö alli këkanqëkita y pëpa amïgun kanqëkita musyarmi, yamë y mas kushishqa kawakunki (Prov. 23:15, 16).