Rasumpa kushishqa kawakuyta puëdinkim

1. “Diosta wanayanqanta” nir Bibliachö qellqarëkanqanqa, ¿ima ninantan, y imanötan kushishqa kanapaq yanapamantsik?

RASUMPA kushishqa kawakuyqa, manam juk rätulla kushishqa këtsu, sinöqa imëpis kushishqa këmi. Jirkapita yachatsikunqanchömi, rasumpa kushishqa kanapaq imata ruranapaq kaqta Jesus kënö nirqan: “Kushikuyätsun Diosta wanayanqanta musyaqkuna” (Mat. 5:3). Pëqa musyarqanmi, Jehoväqa pëpita yachakuyta y pëta adorëta munanapaq kamamashqantsik kanqanta. Bibliachöqa tsëpaqmi, “Diosta wanayanqanta” nir parlan. Y ‘kushishqa Teyta Dios’ kaptinmi, sirweqninkunapis kushishqa këta puëdintsik (1 Tim. 1:11).

2, 3. (1) Jesus ninqannöpis, ¿pikuna mastan kushishqa këta puëdiyan? (2) ¿Imatataq këchö yachakushun, y imanirtan tsëtaqa yachakushwan?

² Kushishqa kanapaqqa, ¿llapampis allillaku kanan? Manam. Jirkapita yachatsikunqanchömi, Jesusqa nirqan jutsankunarëkur o imëka mana allikunapa pasayanqanrëkur “llakikoqkuna” kushishqa këta puëdiyanqanta. Y “alli kaqta rurayanqampita chikishqa kaqkuna” o qateqnin kayanqanrëkur insultashqa kaqkunapis, kushishqa këta puëdiyanqantam nirqan (Mat. 5:4, 10, 11). Peru tsëkunapa pasëkarnin, ¿imanötan rasumpa kushishqa këta puëdintsik?

³ Jesusqa yachatsikurqan rasumpa kushishqa kanapaqqa, kawënintsikchö llapampis allilla kananta mana shuyaränapaq kaqtam. Tsëpa rantinqa, Diosta wanar pëpita yachakunapaq y pëwan mas amïgu kanapaq kallpachakunapaq kaqtam (Sant. 4:8). ¿Y imanötan tsëta rurashwan? Këchömi, rasumpa kushishqa kawakunapaq imata ruranantsikpaq kaqkunapita kimallapita yachakurishun.

DIOSPITA YACHAKUR SÏGUINAPAQ KALLPACHAKUSHUN

4. Rasumpa kushishqa kanapaqqa, ¿imatataq puntata ruranantsik? (Salmus 1:1-3).

⁴ JUK KAQ: Rasumpa kushishqa kanapaqqa, Diospitam yachakunantsik. Nunakuna y animalkuna kawarnin sïguiyänampaqqa, mikuytam wanayan. Peru nunakunallam mikuy cuentata Diospita yachakuyta wanantsik. Tsëmi Jesusqa kënö nirqan: “Nunaqa manam tantallawantsu kawanan, sinöqa Jehovä llapan ninqankunawanmi” (Mat. 4:4). Tsëqa, ama juk junaqllapis Diospa Palabran Bibliapita yachakuyta dejashuntsu. Salmusta qellqaq nunapis kënömi nirqan: “Teyta Diosta cäsukoq nunaqa [...] Jehovä Diospa leynintam kushishqa cäsukun, paqasta junaqtam leyin y leyinqankunamanmi pensan” (leyi Salmus 1:1-3).

5, 6. (1) ¿Imatataq yachakuyta puëdintsik Bibliata leyirninqa? (2) ¿Imanötan Bibliata leyinqantsik yanapamantsik?

⁵ Jehoväqa kuyamarnintsikmi, rasumpa kushishqa kawakunapaq imata ruranapaq kaqta Palabran Bibliachö nimantsik. Këllaman yarpärishun: Pëqa imapaq kamamanqantsikta, Pëpa amïgun imanö këta puëdinqantsikta y jutsantsikkunata perdonamänapaq imata ruranapaq kaqtam yachatsimantsik. Y shamoq tiempuchö shumaq kawakunapaq kaqtapis yachatsimantsikmi (Jer. 29:11). Këkunata Bibliachö yachakunqantsikqa alläpam kushitsimantsik.

⁶ Musyanqantsiknöpis, Bibliachöqa kawënintsikchö yanapamaqnintsik consëjukunatam tarintsik. Tsë consëjukunata wiyakurqa, kushishqam kawakuntsik. Tsëmi, imëka problëmapa pasarnin alläpa yarpachakurninqa, Jehoväpa Palabran Bibliata maslla leyinapaq y leyinqantsikman maslla pensanapaq churapakänantsik. Jesusmi kënö nirqan: “¡Diospa palabranta wiyaqkuna y cäsukoqkunam kushishqaqa kayan!” (Lüc. 11:28).

7. ¿Imanötan Bibliata leyinapaq patsätsinqantsik tiempuntsikta alli provechashwan?

⁷ Diospa Palabran Bibliata leyirninqa, leyinqantsikman shumaq pensanapaqmi tiempuntsikta patsätsinantsik. ¿Imanötan tsëtaqa rurashwan? Këllaman pensarishun: itsa pillapis mas gustamanqantsik mikuyta ruraramunman. Peru apurädu karnin o imëkapaq yarpachakurnin raslla mikukurkushwan. Y mikurnin usharir-raq, mishkinqanta o mana mishkinqanta cuentaman mana churashpa mikukurkunqantsikta mäkurishwan. Y tsëraq, despaciu mikunqantsik mas alli kanampaq kaqta pensarishwan. Bibliata leyinqantsikchöpis, tsënöllam pasaramashwan. Itsa apurädu leyirnin, imata yachakuykanqantsikta pensanapaq tiempuntsik kanmantsu. Bibliata leyinapaq tiempuntsikta shumaq patsätsishun. Tsënöpa leyikanqantsikchö pasëkanqanta rikaq cuenta kanapaq, parlayanqankunata wiyaq cuenta kanapaq y leyinqantsikman pensanapaq tiempuntsik kanampaq. Tsëkunata rurarqa, mas kushishqam kashun.

8. ¿Imanötan Jesus mandanqantaqa ‘alli juiciuyoq y confiakuypaq sirwipakoqqa’ wiyakuykan? (Nötachö ninqantapis rikäri).

⁸ Jesusmi churashqa ‘alli juiciuyoq y confiakuypaq sirwipakoqta’ tiempunchö mikuy cuentata imëka publicacionkunata ruramunampaq, y tsëmi Jehoväpita alli yachakunapaq yanapamantsik (Mat. 24:45).b Y tsë llapanta rurayämunampaqqa, Diospa Palabran Bibliatam utilizäyan (1 Tes. 2:13). Kë rurayämunqan publicacionkunaqa Biblia ninqannömi, Jehovä imanö pensanqanta musyanapaq yanapamantsik. Tsëmi, Täpakoq y ¡Musyatsikoq! neq revistata y jw.org päginachö yurimoqkunata leyintsik. Jina semänachö kaq reunionpaq y semäna ushë reunionpaqmi preparakuntsik y JW Broadcasting^® progrämakunatapis rikantsik. Alli juiciuyoq y confiakuypaq sirwipakoq ruramunqan publicacionkunata alli provecharqa, rasumpa kushishqa kawakunapaq ishkë kaqta ruranapaqmi yanapamäshun.

JEHOVÄ LLAPAN MANDAKUNQANKUNATA WIYAKUSHUN

9. Ishkë kaqchöqa, ¿imatataq ruranantsik rasumpa kushishqa kawakunantsikpaq?

⁹ ISHKË KAQ: Rasumpa kushishqa kawakunantsikpaqqa, Jehovä llapan mandakunqankunatam cäsukunantsik. Salmus libruta qellqaqmi kënö nirqan: “Teyta Jehoväta respetaqkuna,y pë munanqannö kawakoqkunaqa kushishqam kayan” (Sal. 128:1). Jehoväta mantsëqa, imatapis ruranqantsikwan o pensanqantsikwan llakitsita mana munanqantsikta ninanmi (Prov. 16:6). Tsëmi Jehoväta ima kushitsinqanta o ima llakitsinqanta Bibliachö yachakushqa karnin, imëpis mandakunqankunata cäsukunantsikpaq kallpachakuntsik (2 Cor. 7:1). Jehovä kuyanqan kaqkunata rurar y chikinqan kaqkunata chikirqa, mas kushishqam kawakushun (Sal. 37:27; 97:10; Rom. 12:9).

10. Diospa voluntänin ima kanqanta musyarpis, ¿imatataq rurashwan? (Romänus 12:2).

¹⁰ (Leyi Romänus 12:2). Jehovälla ima alli o mana alli kanqanta decidinampaq autoridäyoq kanqanta itsa pipis musyanman. Tsënö kaptimpis, Jehovä mandakunqankunatam wiyakunan. Këllaman pensarishun: cärruta manejaq juk nunaqa, alläpa mana cörriyänampaq gobiernukuna leykunata patsätsita puëdiyanqanta itsa musyanman. Tsënö kaptimpis, tsë leykunata wiyakuyta manam munanmantsu. Tsëmi ley ninqampitapis mas ras manejan. Tsë cuentallam noqantsikpis, Jehovä mandakunqankuna noqantsikpaq mas alli kanqanta creinqantsikta o mana creinqantsikta, imanö portakunqantsikwan rikätsikushun (Prov. 12:28). Mandakunqankuna alli kanqanta creirmi, Davidpis Jehoväta kënö nirqan: “Imanö kawakunäpaqmi yachatsimanki. Läduykichö karqa alläpa kushishqam kä. Derëcha läduykichö kaqkunaqa imëpis kushishqam kayan” (Sal. 16:11).

11, 12. (1) ¿Imapitataq cuidakunantsik imëka problëmapa pasëkarnin o llakishqa kanqantsik höra? (2) Kushikunapaq imatapis alli akranapaqqa, ¿imanötan Filipensis 4:8 ninqan yanapamantsik?

¹¹ Itsa alläpa yarpachakurnin o llakinarninqa, tsëkunata qonqatsimänantsikpaq imallatapis rurëta munashwan, y tsëqa allillam. Peru Jehovä chikinqankunata mana ruranapaqmi cuidakunantsik (Efes. 5:10-12, 15-17).

¹² Filïpus markachö këkaq cristiänukunaman cartakurninmi, apostol Pabluqa alli kaqta rurayänampaq yanapakoqkunaman, limpiu kaqkunaman, alli kaqkunaman y kuyakoq kanapaq yanapakoqkunaman pensayänampaq nirqan (leyi Filipensis 4:8). Kushikur imata ruranapaq kaqkunapaq mana parlëkashqa kaptimpis, imatapis akranqantsik höraqa ninqankunatam cuentaman churashwan. Tsë versïculu kënö ninqanman pensarishun: “Wiyanqëki cancionkuna limpiu kayätsun, rikanqëki pelïculakuna o leyinqëki librukuna alli kaqkuna kayätsun y pukllanqëki videujuëgukuna alabëpaq kayätsun”. Tsëkunaman pensanqantsikmi, imakunata allipa y imakunata mana allipa Dios rikanqanta cuentata qokunapaq yanapamäshun. Jehovä mandakunqankunata wiyakurmi kawakuyta munantsik (Sal. 119:1-3). Tsëkunachö concienciantsik alli kanqanmi, rasumpa kushishqa kawakunapaq qateqnin kaqta ruranapaq yanapamäshun (Hëch. 23:1).

JEHOVÄTA ADORANQANTSIKMI KAWËNINTSIKCHÖQA PUNTACHÖ KANAN

13. Kima kaqchöqa, ¿imatataq kushishqa kanapaq ruranantsik? (Juan 4:23, 24).

¹³ KIMA KAQ: Kawënintsikchö Jehoväta adoranqantsik mas puntachö kanampaqmi segurakunantsik. Jehovätaqa Kamamaqnintsik kaptinmi adoranantsik (Apoc. 4:11; 14:6, 7). Tsëmi kawënintsikchöqa, Pë munanqannö adoranapaq masqa kallpachakunantsik, juk parlakuychöqa, ‘santu espïritu yanapamänata permitir y rasumpa kaqta Dios musyatsikunqanta chaskikur’ adoranantsiktam shuyaran (leyi Juan 4:23, 24). Tsënö adoranapaqmi kallpachakunantsik. Diosta sirwinantsikta täranqantsik nacionchö michämashqapis, kawënintsikchöqa Jehoväta sirwinqantsikmi mas puntachö kanan. Kanan witsanqa, cienpitapis masmi wawqi panintsikkuna Jehoväpa testïgunkuna kayanqanrëkur prësu këkäyan.c Tsënö karpis, Diosta mañakuyänampaq, Pëpita yachakur sïguiyänampaq y Diospita y Gobiernumpita wakinkunata parlapäyänampaq kallpachakurmi, kushishqa kayan. Insultamashqa o chikir sufritsimashqapis, sirwinqantsikpita Jehovä kushishqa këkanqanta y shamoq tiempuchö bendicimänapaq kaqta musyarmi kushishqa kantsik (Sant. 1:12; 1 Pëd. 4:14).

TIEMPUNTSIKCHÖ PASAKUNQAN

14. ¿Imatan Tayikistan nacionpita juk jövinta pasarqan, y imanir?

¹⁴ Rasumpa kushishqa kanapaq qepa kaq pärrafukunachö kimata yachakurinqantsik, imapa pasëkashqapis rasumpa yanapakunqanta juk wawqintsik pasanqanwan rikärishun. Tayikistan nacionchö täraq 19 watayoq Yovidon Boboyönov jövin wawqipaq parlarishun. Ejercituman ëwëta mana munaptinmi, 2019 wata 4 de octubri killa, wayimpita mälas apakuyarqan. Atska killakunapam carcelarätsiyarqan y juk delincuentitanömi tratayarqan. Atska nacionkunapa noticiankunachömi mana allipa tratëkäyanqanta willakuyarqan. Militar kanampaq jurëta mana munaptin y uniformita churakuyta mana munaptinmi, maqashqa kayanqantam willakuyarqan. Tsëpitam condenariyarqan y prësukuna trabajayanqanchö mëtsika hörakuna trabajanampaqmi obligayarqan. Tsënömi karqan tsë nacionchö presidenti perdonayänampaq y librita dejariyänampaq mandakunqanyaq. Tsë pruëbakunapa pasanqan witsanqa, Yovidonqa Jehoväta sirwirmi sïguirqan y kushishqam karqan. ¿Imanirtan tsënöqa karqan? Diospita yachakuyta wananqanta mana qonqarmi.

15. ¿Imanötan Yovidonqa carcelchö këkarpis Diospita yachakurnin sïguirqan?

¹⁵ Carcelchö këkar y ni Biblian ni ima publicacionninkuna mana këkaptimpis, Yovidonqa Jehoväpita yachakurninmi sïguirqan. Peru ¿imanötan yachakurqa sïguirqan? Wawqi panikunam mikuyta apapuyanqan bolsaman tsë junaqpaq kaq textuta qellqayaq. Tsënöpam Yovidonqa Bibliata leyita y leyinqanman llapan junaqkuna pensëta puëdeq. Carcelpita libri yarqurirmi, sasa o aja pruëbakunapa manaraq pasashqa kaqkunata kënö consejarqan: “Kanan libri këkäyanqëkita Jehoväpita mas yachakuyänëkipaq provechayë. Y tsëpaqqa, Bibliata y publicacionnintsikkunatam leyiyänëki”.

16. ¿Imamantan Yovidonqa yarpachakoq?

¹⁶ Wawqintsik Yovidonqa, Jehovä mandakunqankunatam cäsukurqan. Mana alli munëkunaman yarparäkunampa rantin y mana alli kaqkunata ruranampa rantinmi, masqa Jehoväman y pë ima alli kanqanta ninqanman pensarqan. Dios kamanqankunata rikänampaqmi tiempunta patsätseq. Patsa waräramuptinmi, pishqukuna cantaqta wiyaq, y paqasyäriptinnam estrëllakunata y Killata rikaq. Kënömi nirqan: “Jehovä kamanqankuna imëka juk qarë cuenta kanqanmi, asiratsimaq y kushitsimaq”. Jehoväpita yachakunqantsikta kuyashqa y imëkantsik mana pishitsimunqampita agradecikushqaqa, masmi kushikuntsik y tsënö kushikunqantsikmi tsarakurnin sïguinapaq yanapamantsik.

17. Yovidon wawqi pasashqa kanqampa pasëkaqkunataqa, ¿imanötan 1 Pëdru 1:6 y 7 ninqan yanapanman?

¹⁷ Jina Yovidonqa, Jehoväta adorëtam kawëninchö mas puntaman churarqan. Diosllata sirwinan alläpa precisanqantam musyarqan. Jesusmi kënö nirqan: “Teyta Jehovätam adoranëki, y pëllatam sirwinëki” (Lüc. 4:8). Tröpakunata mandaq y soldädukunaqa, Diosta sirwita Yovidon dejanantam munayarqan. Peru pëqa, paqasta junaqtam alli tsarakunampaq y sirwir sïguinampaq yanapëkunampaqmi Jehoväta mañakoq. Imëkata rurëkäyaptimpis, Yovidonqa tsarakurninmi sïguirqan. Kananqa, maqayanqanchö y carcelayanqanchö Diosman markäkunqan pruëbaman churakashqa kanqampita y alli tsarakunqampitam alläpa kushikun (leyi 1 Pëdru 1:6, 7).

18. ¿Imanötan kushishqa kawakurnin sïguishun?

¹⁸ Jehoväqa rasumpa kushishqa kanapaq imata wananqantsiktam musyan. Ima problëmapa pasëkashqapis, këchö kimapita yachakunqantsiknölla rurashqaqa kushishqam kashun. Tsëqa noqantsikpis kënömi nishun: “¡Diosninkuna Teyta Jehovä kaptinmi, nunakunaqa kushishqa kawakuyan!” (Sal. 144:15).