¿Mañakunqäta Jehovä contestamuntsuraq?

1, 2. ¿Imanirtan pensashwan mañakunqantsikta Jehovä mana contestamunqanta?

“TEYTA JEHOVÄTA sirwir kushishqa kë, tsëqa shonquyki llapan munanqantam ruramunqa” (Sal. 37:4). Tsënö ninqanqa, ¡alläpa shumaqmi! Peru ¿tsëwanqa llapan mañakunqantsikta jinan höra contestamunampaq kaqtaku änïkämantsik? Tsëta tapukunantsikqa alläpa allim. Këllaman pensarishun: juk panim Jehoväta mañakun Diospa Gobiernumpita Yachatsikoqkunapaq Escuëlaman ëwëta munar, peru atska watakuna pasariptimpis manam invitayantsu. Juk qeshyëkaq jövinnam congregacionchö maslla yanapakuyta munar alliyëkatsinampaq Jehoväta mañakun, peru manam alliyantsu. Y juk wawqinam warminwan mañakuyan, Jehoväta wamrankuna sirwita mana dejanampaq, peru wamrankunaqa manam Jehoväta sirwita munannatsu.

² Capazchi qampis imata karpis Jehoväta mañakurqunki, peru contestashurqunkitsu. Tsëqa capazchi pensarqunki wakinkuna mañakuyanqanta contestarpis, qam mañakunqëkitaqa mana contestamunqanta o imatapis mana allita rurashqa kaptiki mana contestamunqanta. Tsënömi Janiceb jutiyoq pani sientikurqan. Pëqa qowanwanmi o runanwanmi Betelchö yanapakuyta munar Jehoväman mañakuyarqan. Janicemi kënö nin: “Noqaqa segürum këkarqä imë höra karpis qayarayämänampaq kaqta”. Peru killakuna y watakuna pasariptimpis manam qayayarqantsu. Janicem kënö nin: “Alläpam llakikurqä y manam musyarqätsu ima pasakuykanqanta. ‘¿Ima mana allitataq rurarqö?’ nirmi yarpachakurqä. Jehovätaqa clärum willarqä imata munayanqäta, peru manam entiendirqätsu Betelpita imanir mana qayayämanqanta”.

3. ¿Imatataq këchö yachakushun?

³ Capazchi höraqa pensarquntsik mañakunqantsikta Jehovä imanir mana contestamunqanta. Tsënömi Diosnintsikpa unë sirweqninkunapis yarpachakuyarqan (Job 30:20; Sal. 22:2; Hab. 1:2). Peru ¿imanötan següru kashwan mañakunqantsikta Jehovä contestamunqanta? (Sal. 65:2). Tsëta entiendinapaq puntata kë kimanta yachakurishun: 1) ¿imatataq Jehoväpita shuyarashwan?, 2) ¿imatataq noqantsikpita Jehovä shuyaran?, y 3) ¿imanirtan mañakushqana karpis juknöpana mañakur sïguishwan?

¿IMATATAQ JEHOVÄPITA SHUYARASHWAN?

4. Jeremïas 29:12 ninqannö, ¿imatataq Jehovä änimarquntsik?

⁴ Jehoväqa mañakunqantsikta wiyanampaqmi änimarquntsik (leyi Jeremïas 29:12). Diosnintsikqa sirweqninkunata kuyanmi y llapan mañakuyanqantam wiyan (Sal. 10:17; 37:28). Tsënö karpis, manam llapan mañakunqantsiktatsu kanan witsan ruramunqa. Capazchi wakin mañakunqantsiktaqa Shumaq Patsachöraq ruramunqa.

5. ¿Imatataq Jehoväqa cuentachö katsin mañakunqantsikta contestamunampaq?

⁵ Jehoväqa mañakunqantsikta contestamunampaq imata rurëta munanqantam cuentachö katsin (Is. 55:8, 9). Jehovä Diosnintsikqa munan Shumaq Patsachö warmipis ollqupis, Gobiernunta cäsukur kushishqa y juknölla kawakuyänantam. Peru Satanasqa nin, nunapura gobernanakurnin mas alli kawakuyänampaq kaqtam (Gen. 3:1-5). Satanas ulikoq o llullakoq kanqanta rikätsikunampaqmi Jehoväqa nunakuna kikinkunapura gobernanakuyänanta juk tiempu dejashqa. Tsëmi nunakunaqa imëka problëmakunachö kananyaqpis kawakuyan (Ecl. 8:9). Y musyantsikmi Jehovä Diosnintsikqa, tsë problëmakunata kanan tiempu mana altsamunampaq kaqta. Kanan tiempu altsaramuptinqa, capazchi wakin nunakunaqa pensayanman, nunakunapa gobiernunkuna alli kanqanta y imëka problëmatapis altsëta puëdiyanqanta.

6. ¿Imanirtan següru kashwan Jehoväqa kuyakoq kar y allita ruraq kar imatapis ruramunqanta?

⁶ Tsë asuntullapaq atskaq nunakuna mañakuyaptimpis, Jehoväqa juknöpa juknöpam mañakuyanqanta contestamunman. Këllaman pensarishun: gobernanti Ezequïasmi alläpa grävi qeshyarirqan y alliyëkatsinampaqmi Jehoväta mañakurqan y Jehoväqa alliyäratsirqanmi (2 Rëy. 20:1-6). Pablupis capazchi qeshyapäkurnin alliyëkatsinampaq Jehovä Diosta mañakurqan, peru manam alliyätsirqantsu (2 Cor. 12:7-9). Santiägutawan Pëdrutanam gobernanti Herödis wanutsita munarqan. Y congregacionchö wawqi panikunaqa Pëdrupaqmi Jehoväman mañakuyarqan, y capazchi Santiägupaqpis mañakuyarqan. Tsënö kaptimpis, Santiägutam wanuratsiyarqan, peru Pëdrutaqa Jehovämi milagruta rurar salvarqan (Hëch. 12:1-11). Tsëqa capazchi kënö tapukuntsik: “¿Imanirtan Jehoväqa Santiäguta salvarqantsu peru Pëdrutaqa salvarqan?”. Bibliachöqa manam willakuntsu imanir Pëdrullata salvanqanta, peru segürum këkantsik Jehovä Diosnintsikqa ‘mana allikunataqa’ mana ruranqanta. Tsëmi següru kantsik Pëdrutapis y Santiägutapis kuyanqanta (Deut. 32:4; Apoc. 21:14).c Capazchi mañakushqapis munanqantsiknöqa Jehovä ruramunqatsu. Tsënö kaptimpis, Jehovä Diosnintsik alläpa kuyakoq kanqanta y allillata ruraq kanqanta musyarmi mañakunqantsikta juknöpa contestamunqampitaqa juzgantsiktsu (Job 33:13).

7. ¿Imatataq rurantsiktsu, y imanirtan rurantsiktsu?

⁷ Manam pasëkanqantsikta wakinkuna pasayanqankunatawan igualatsintsiktsu. Këllaman pensarishun: capaz pasëkanqantsikpaq Jehoväta mañakushwan, peru mañakunqantsikta ruramunmantsu. Tsëpita junaqkuna pasariptinqa musyarishwan, pasëkanqantsikpa pasëkaq wawqi o pani Jehoväman mañakushqa kanqanta y pëpaqqa mañakunqannö rurashqa kanqanta. Tsëmi pasarqan Änna jutiyoq panintsikta. Pëpaqa Matthew jutiyoq qowanmi o runanmi cancer qeshyawan qeshyarqan y Jehovätam mañakurqan alliyëkatsinampaq. Tsë witsankunallam ishkaq mayorna panikunapis cancer qeshyawan qeshyayarqan, y Ännaqa pëkunapaqpis mañakurqanmi. Tsë ishkan panikunaqa alliyäriyarqanmi, peru Matthewqa wanukurqanmi. Tsëmi Ännaqa kënö pensarqan: “¿Tsë ishkan nanakunataqa o ñañakunataqa Jehovätsuraq alliyäyänampaq yanaparqan? Pëkunata yanapashqa këkarqa, ¿imanirtan qowätaqa yanapashqatsu?”. Manam musyantsiktsu tsë panikuna imanir alliyäyanqanta, peru segürum këkantsik shamoq tiempuchöqa llapan sufrimientukunata Jehovä ushakätsinampaq kaqta y wanushqa sirweqninkunatapis kawaritsimunampaq kaqta (Job 14:15).

8. (1) Isaïas 43:2 ninqannö, ¿imanötan Jehoväqa yanapamantsik? (2) ¿Imanötan mana allikunapa pasanqantsik höra Diosman mañakunqantsik yanapamantsik? (Rikäri Diosman mañakunqantsikqa alli tsarakunapaqmi yanapamantsik neq videuta).

⁸ Jehoväqa mañakunqantsikta imëpis wiyanmi. Teytantsik Jehoväqa kuyamantsikmi, y manam sufrinantsikta munantsu (Is. 63:9). Tsënö karpis, mëtsika yakunö y ninanö problëmakunapitaqa manam libramantsiktsu (leyi Isaïas 43:2). Peru tsë problëmakunachö alli tsarakunapaqmi yanapamantsik y manam permitintsu chipyëpa mana allichö ushanantsikta. Tsënöllam Jehoväqa alli aguantanantsikpaq santu espïritunwan yanapamantsik (Lüc. 11:13; Filip. 4:13). Tsëmi imëka mana allikunapa pasarninqa yarpänantsik alli aguantanantsikpaq y tsarakunantsikpaq Jehovä yanapamänantsikpaq kaqta.d

¿IMATATAQ NOQANTSIKPITA JEHOVÄ SHUYARAN?

9. Santiägu 1:6 y 7 textu ninqannö, ¿imanirtan Jehovä yanapamänapaq kaqman confiakunantsik?

⁹ Jehoväqa pëman confiakunantsiktam shuyaran (Heb. 11:6). Capazchi alläpa mana allikunapa pasarqa, Jehovä mana yanapamänapaq kaqta pensashwan. Peru Palabran Bibliachömi nimantsik poderninwan yanapamashqaqa, ‘murälla janampapis’ pasëta puëdinapaq kaqta (Sal. 18:29). Tsëmi ni imanöpapis Jehovä mana yanapamänapaq kaqmanqa pensanantsiktsu. Tsëpa rantinqa, llapan shonquntsikwanmi mañakunantsik y mañakunqantsikta contestamunampaq kaqmanmi confiakunantsik (leyi Santiägu 1:6, 7).

10. Diosnintsikman mañakurirqa, ¿ima mastataq rurashwan? Willakaramuy.

¹⁰ Jehoväqa mañakunqantsiknö ruranantsiktam shuyaran. Jatun asamblëaman ëwëta munaq wawqiman pensarishun. Capazchi pëqa patronninta permïsuta mañakuyta mantsan, y tsëchi yanapëkunampaq Jehoväman mañakun. Peru ¿imanöraq Jehoväqa mañakunqanta contestanqa? Capazchi mana mantsapakuypa patronninwan parlanampaq yanapanqa. Tsënö kaptimpis, kë wawqiqa patronninwan parlanampaqmi ëwanan, y capazchi atska kutiraq parlaq ëwanqa. Y parlarninqa capazchi ninqa juk hörakunana trabajanampaq o juk trabajaq mayinwan cambiuta ruranampaq o mana trabajanqan junaqta mana paganampaq.

11. ¿Imanirtan juk asuntupaq kutin kutin mañakushwan?

¹¹ Imapaqpis yarpachakurqa, tsë asuntupaq kutin kutin mañakunantsiktam Jehoväqa shuyaran (1 Tes. 5:17). Tsëtam Jesus entienditsikurqan imatapis mañakunqantsikta jinan höra Jehovä mana contestamunqampaq parlarnin (Lüc. 11:9). Tsëmi juk kutilla mañakurinantsikpa rantinqa, llapan shonquntsikwan kutin kutin mañakunantsik (Lüc. 18:1-7). Juk asuntupaq kutin kutin mañakurqa, tsë asuntuchö Jehovä rasumpa yanapamänantsikta munanqantsikta y yanapamänapaq kaqman confiakunqantsiktam rikätsikuntsik.

¿IMANIRTAN MAÑAKUSHQANA KARPIS JUKNÖPANA MAÑAKUR SÏGUISHWAN?

12. (1) ¿Imatataq tapukushwan, y imanir? (2) ¿Imatataq cuentachö katsinantsik respëtuwan Jehoväta mañakunapaq? (Rikäri “¿Jehoväta mañakurqa respëtuwanku mañakü?” neq recuadruta).

¹² Mañakunqantsikta Jehovä mana contestamuptinqa, kë kiman tapukuykunatam rurakunantsik: “¿Mañakunqäta Jehovä ruramuptinqa rasumpatsuraq yanapamanqa?”. Höraqa pensantsik mañakunqantsikta Jehovä ruramuptinqa yanapamänapaq kaqtam. Peru capazchi tsë mañakunqantsikkunaqa tiempu pasaptinqa yanapamäshunnatsu. Capazchi Jehoväta mañakushwan problëmantsikta imanö altsamunampaq, peru Jehoväqa tukuynöpam problëmantsiktaqa altsamuyta puëdin. Y capazchi mañakunqantsikqa Jehovä munanqannötsu kanqa (1 Juan 5:14). Punta kaq pärrafuchö parlanqantsik wawqiman y paniman yarpärishun. Pëkunam mañakuyarqan Jehoväta mana dejëpa wamrankuna sirwinampaq. Tsënö mañakuyanqan allinö kaptimpis, yarpänantsikmi pï nunatapis sirwinampaq Diosnintsik mana obliganqanta. Pëqa pï nunapis o wamrantsikpis kikinkuna munar sirwiyänantam shuyaran (Deut. 10:12, 13; 30:19, 20). Tsëqa, ¿imanö mañakuyanqanraq mas alliqa kanman? Capazchi mañakuyanman yachatsiyanqan shonqunman chänampaq tsënöpa Jehoväta kuyanampaq (Prov. 22:6; Efes. 6:4).

13. Hebrëus 4:16 textu ninqannö, ¿imëtan Jehoväqa mañakunqantsikta contestamun?

¹³ Ishkë, kënömi tapukunantsik: “¿Jehoväqa mañakunqäta kanan höra ruramunan mas alli kanqantatsuraq pensan?”. Capaz pensashwan mañakunqantsikta Jehovä jinan höra ruramuptinqa yanapamänantsikpaq kaqta. Peru rasumpa kaqchöqa, Jehoväqa musyanmi imë yanapamanqantsik mas alli kanampaq kaqta (leyi Hebrëus 4:16). Mañakunqantsikta Jehovä mana contestamuptinqa, capaz pensashwan, “manam” nikämanqantsikta. Peru capazchi,Jehoväqa, “kananqa manaran” nikämantsik. Qeshyëkaq jövinpaq parlanqantsikman yarpärishun. Milagruta rurar Jehovä alliyäratsiptinqa, Satanaschi kënö ninman: “Tsë jövinqa alliyätsishqa kaptinllam Jehoväta sirwin” (Job 1:9-11; 2:4). Peru Jehoväqa tiemputa patsätsishqanam llapan qeshyëkaqkunata alliyätsinampaq (Is. 33:24; Apoc. 21:3, 4). Tsëmi kanan witsan milagruta rurar alliyätsimänataqa shuyarantsiktsu. Tsëqa, ¿tsë jövin imata mañakunqanraq mas alliqa kanman? Mana allikunapa pasëkarpis mana dejëpa sirwinampaq y kushishqa kanampaq kallpayoqta tikratsinampaq mañakunqanmi mas alliqa kanman (Sal. 29:11).

14. ¿Imatataq yachakuntsik Janice jutiyoq panipita?

¹⁴ ¿Yarpankiku Betelchö trabajëta munar Jehoväman mañakoq Janice jutiyoq panintsikpaq? Pëqa pitsqa watachöran entiendirqan mañakunqanta Jehovä imanö contestamunqanta. Kënömi nin: “Tsë tiempuchömi Jehoväqa yachatsimarqan mas alli warmi kanäpaq. Jehoväman maslla confiakunämi pishirqan. Y Bibliata y publicacionkunata maslla estudianäpis pishirqanmi, y kushishqa kanqäqa manam ima bendicionkunata chaskinqäpitatsu kanan karqan”. Tiempuwanqa Janiceta y qowantam o runantam invitariyarqan congregacionkunata watukar yanapakuyänampaq. Janicem kënö nin: “Rasumpa kaqchöqa, mañakunqätaqa Jehovä contestamarqanmi, peru manam noqa munanqänötsu karqan. Atska tiempuran pasarqan tsë contestamunqanta valoranäpaq. Alläpam agradecikü kuyakoq kanqanta y alli kanqanta entiendinäta permitimanqampita”.

15. ¿Imanirtan juk asuntupaq Jehoväman mañakurpis maskunapaqpis mañakushwan? (Rikäri fötukunata).

¹⁵ Kima, kënömi tapukunantsik: “¿Juk asuntullapaqtsuraq Jehoväman mañakuykä?”. Imata munanqantsikta Jehoväta cläru willarpis, höraqa tsë munanqantsikllapaq mañakunantsikpa rantinmi, Jehovä imata munanqanta musyanantsikpaq maskunapaqpis mañakushwan. Diospa Gobiernumpita Yachatsikoqkunapaq Escuëlaman ëwëta munaq soltëra paniman pensarishun. Pëqa tsë escuëlaman ëwëta munan yachatsikoqkunata mas wanayanqan markakunachö yanapakuyta munarmi. Tsë asuntupaq mañakurpis, ¿ima mastataq Jehoväta mañakunman? Tsë escuëlaman mana ëwarpis juknöpapis yanapakunampaqmi mañakunman (Hëch. 16:9, 10). Munanqantsikpaq Jehoväta mañakurirqa, congregacionkunata watukaq wawqitam tapurishwan mëqan congregacionchö precursorkunata wanayanqanta. Y yanapakuyta munanqantsikta willakurmi sucursalmampis cartakurishwan.e

16. ¿Imapitataq següru kanantsik?

¹⁶ Yachakurinqantsiknömi, kuyamaqnintsik y alli kaqta ruraq Diosnintsik mañakunqantsikta imëpis contestamunampaq kaqta següru kanantsik (Sal. 4:3; Is. 30:18). Höraqa capazchi munanqantsiknötsu mañakunqantsikta contestamunqa. Peru Teyta Jehoväqa kuyamantsikmi y alli kaqta ruraq Diosmi, tsëmi mañakunqantsiktaqa imëpis wiyamäshun (Sal. 9:10). Tsënö këkaptinqa, Teyta Jehoväman ‘imëpis confiakushun’ y llapan shonquntsikwan mañakushun (Sal. 62:8).