¿Rasumpatsuraq guërrakuna kanqanatsu?

TEYTA DIOSMI LLAPAN GOBIERNUKUNATA USHAKÄTSINQA

Bibliachömi willakun Teyta Diosqa llapan gobiernukunata Armagedona guërrachö ushakätsinampaq kaqta (Apocalipsis 16:16). Bibliachö ninqannömi “entëru patsachö” gobernaqkuna juntakäyanqa, “Teyta Dios nunakunata juzganan tiempuchö” pelyayänampaq (Apocalipsis 16:14). Teyta Diosqa Armagedon guërrachömi, llapan guërrakunata ushakätsinqa.

Teyta Dios ciëluchö patsätsinqan Gobiernutaqa manam ni pï ushakätsinqatsu, tsë Gobiernum nunakunapa gobiernunkunata ushakäratsinqa (Daniel 2:44). Diosqa Tsurin Jesustam akrashqa tsë Gobiernuchö Gobernanti kanampaq (Isaïas 9:6, 7; Mateu 28:18). Tsë Gobiernupaqmib Jesusqa discïpulunkunata parlaparqan (Mateu 6:9, 10). Awmi, Teyta Diosmi Jesusta gobernanti kanampaq churashqa, y pëtam llapan nunakuna cäsuyanqa.

Jesusqa manam kë patsachö gobernantikunanötsu kikinllapaq imatapis munarqan. Pëqa allita ruraq Gobernantim, tsëmi llapanta igualpa rikan y ima kastapita o më nacionpita kayaptimpis manam pitapis sufritsinqatsu (Isaïas 11:3, 4). Jesusqa cada nunapaqmi yarpachakun, tsëmi nunakunaqa derëchunkunata respetatsir huelgakunata ni ima masta rurayanqanatsu. Bibliachömi kënö nin: “Pëmi salvanampaq mañakoq waktsakunata, humildikunata y yanapayänanta munar qayakoqkunata salvanqa […]. Sufritseqninkunapita y maqaqninkunapita[m] salvanqa” (Salmus 72:12-14).

Teyta Diospa Gobiernunchöqa manam mëchöpis armakuna kanqanatsu y nunakunaqa manam wanutsinakuyanqanatsu (Miquëas 4:3). Mana allita ruraq nunakunam jukkuna yamë kawakuyänanta dejayantsu, tsëmi tsë mana allita ruraq nunakunata Teyta Dios ushakätsinqa (Salmus 37:9, 10). Ollqukuna, warmikuna y wamrakunapis mëchö këkarpis segürum kawakuyanqa (Ezequiel 34:28).

Teyta Diospa Gobiernunchöqa llapan nunakunam kushishqa kawakuyanqa. Guërrakuna manana kaptinmi waktsayë ni mallaqëpis kanqanatsu y cada nunapam wayin kanqa. Llapankunapaqmi mëtsika mikuy kanqa y rurayanqan wayikunachöpis kushishqam kawakuyanqa (Salmus 72:16; Isaïas 65:21-23).

Guërrapa culpanmi nunakunaqa sufriyan, alläpa llakikur qeshyayan y imëka mana allikunapa pasayan, peru Diospa Gobiernun kë Patsata gobernamuptinqa manam sufriyanqanatsu. Y wanushqakunapis kawariyämunqam kë Patsachö imëyaqpis kawakuyänampaq (Isaïas 25:8; 26:19; 35:5, 6). Guërrarëkur rakikashqa familiakunapis shamoq tiempuchöqa juntum kawakuyanqa y mana allikunapa pasayanqantapis qonqëkuyanqam (Apocalipsis 21:4).

TEYTA DIOSQA JUTSATAM USHAKÄRATSINQA

Diospa Gobiernunchöqa llapan nunakunam, “kuyakoq y yamë kë kananta munaq” Jehoväc Diosllata adorayanqa (2 Corintius 13:11). Llapankunam yamëna kawakuyanqa (Isaïas 2:3, 4; 11:9). Dios mandakunqanta cäsukoqkunaqa jutsapita y wanuypitam libri këta puëdiyanqa (Romänus 8:20, 21).

TEYTA DIOSQA SATANASTA Y DEMONIUKUNATAM USHAKÄRATSINQA

Teyta Dios Gobernamurqa Satanastawan demoniunkunatam ushakäratsinqa y mananam guërrakuna kanqanatsu (Apocalipsis 20:1-3, 10). Tsënöpam “alli kawakuyanqanqa imëpis ushakanqatsu” (Salmus 72:7).

Teyta Diosmi änimantsik guërrakuna manana kanampaq kaqta y nunakunapis grüpu grüpu juntakëkur manana pelyayänampaq kaqta, Pëqa tsë llapantam cumplimunqa.

• Teyta Dios poderyoq karmi guërrakunata y pelyakunata ushakäratsinqa y musyanmi imanö ruramunampaq kaqta (Job 9:4). Y Pëqa llapan änikunqantam cumplimunqa (Job 42:2).

• Nunakuna sufreqta rikarmi Teyta Diosqa llakikun (Isaïas 63:9). Y “mana allikunata rurëta gustaq nunataqa chikinmi” (Salmus 11:5).

• Teyta Diosqa imëpis rasumpa kaqllatam nin, tsëmi änikunqantapis cumplimunqa (Isaïas 55:10, 11; Tïtu 1:2).