Wawqi panikunawan mas amïgu kanantsikpaq kallpachakushun

1, 2. ¿Imatataq Jehoväqa mas väleqpaq churan, y imata ruranatataq munan?

JEHOVÄQA nuna mayintsikta shumaq tratashqam alläpa kushikun. Tsëmi Jesuspis nirqan nuna mayintsikta kikintsiktanö kuyanapaq (Mat. 22:37-39). Nuna mayintsiktaqa, Jehoväta mana adorayaptimpis shumaqmi tratanantsik. Tsëta rurarqa, Teyta Jehovä ruranqannömi rurëkantsik. Pëqa “alli y mana alli nunakunapaqmi intinta o rupayninta yarqatsimun, y [...] tamyatsimun” (Mat. 5:45).

² Llapan nunakunata Jehovä Diosnintsik kuyarpis, masqa kuyan mandakunqankunata cäsukoqkunatam (Juan 14:21). Y Jehoväqa munan pënö kanantsiktam, tsëmi wawqi panintsikkunata llapan shonquntsikwan kuyanapaq mandamantsik (1 Pëd. 4:8; Rom. 12:10). Tsënö rurarqa, wawqi panintsikkunataqa familiantsiktanö y kuyë amïguntsiktanömi kuyëkantsik.

3. ¿Imatataq ruranantsik kuyakoq kanantsikpaq?

³ Imanömi juk plantata alli wayunampaq alliraq cuidantsik, tsënömi wawqi panikunata kuyanantsikpaqpis alliraq kallpachakunantsik. Tsëmi apostol Pabluqa kënö nirqan: “Familiachönö llapan shonquykikunawan kuyanakur sïguiyë” (Heb. 13:1). Jehoväqa munan kuyakoq kanantsikpaq alli kallpachakunatam. Tsëmi këchöqa yachakushun wawqi panintsikkunawan mas amïgu kanantsikpaq imakunata ruranantsikpaq kaqta.

WAWQI PANIKUNAWAN MAS AMÏGU KANAPAQ KALLPACHAKUSHUN

4. ¿Imatan yanapamäshun Salmus 133:1 ninqannöpis wawqi panikunawan juknölla kanqantsikta maslla valoranapaq? (Fötukunata rikäri).

⁴ (Leyi Salmus 133:1). Kë salmusta qellqaq nuna ninqannöpis, Jehoväta kuyaqkunawan amïgu këqa alläpa shumaqmi. Tsënö kaptimpis höraqa, wawqi panikunawan juknölla kawakunqantsiktam mana kaqpaq churar qallëkushwan. Këllaman pensarishun: capazchi juk shumaq plantata o shumaq montita tsëllaraq rikärirqa, shumaq kaptin alläpa kushikushwan. Peru seguïdu rikarninqa, capazchi cäsupashwannatsu. Tsënömi wawqi panintsikkunawan cada semäna rikänakurqa, juknölla kawakunqantsikta valorashwannatsu. Peru ¿imatataq rurashwan juknölla kawakunqantsikta maslla valoranapaq? Tsëpaqqa wawqi panintsikkunata imanir kuyanqantsikmanmi seguïdu pensanantsik.

5. ¿Imanötan wakinkunata yanapan kuyakoq kanqantsik?

⁵ Reunionnintsikkunaman tsëllaraq shamoqkunaqa, kuyakoq kashqam alläpa kushikuyan y rasumpa kaqta yachakuykäyanqantam cuentata qokuyan. Tsëmi Jesuspis nirqan juknintsik juknintsik kuyanakushqa, qateqninkuna kanqantsikta musyayanqanta (Juan 13:35). Universidächö estudiëkaq Chaithra jutiyoq shipashta pasanqanta rikärishun. Pëtaqa Bibliapita yachatseqnin panim jatun asamblëaman invitarqan. Y punta kaq junaq ëwanqanllachönam Bibliapita yachatseqnin panita kënö nirqan: “Papänïwan mamänïqa manam imëpis waquyämashqatsu o makallayämashqatsu. Peru këchöqa tsëllaraq shamushqa këkaptïmi, ¡52 kutipa waquyämashqa! Jehovä kuyamanqanta y shumaq familiachö këkanqätam sientirqö. Noqapis kë familiachömi këta munä”. Chaithra jutiyoq shipashqa 2024 watachömi bautizakurqan. Rikanqantsiknöpis, wakin nunakunaqa kuyakoq kashqam Jehovä Diosnintsikta sirwir qallëkuyan (Mat. 5:16).

6. ¿Imanö mastan wawqi panikunawan mas amïgu kanqantsik yanapamantsik?

⁶ ¿Imanö mastan yanapamantsik wawqi panikunawan mas amïgu kanqantsik? Apostol Pablum cristiänu mayinkunata kënö nirqan: “Alli aguantayänëkipaq yanapanakur sïguiyë [...]. Tsënöpa engañakoq jutsa puëdeq kanqan shonquykikunata chukruyätsinanta mana dejayänëkipaq” (Heb. 3:13). Imatapis mana allita rurëta munashqaqa o Jehoväta sirwita qelanäkurishqaqa, Jehovämi wawqi panintsikkunawan yanapamantsik (Sal. 73:2, 17, 23). Wawqi panintsikkuna yanapamanqantsiktaqa, ¡alläpam valorantsik!

7. ¿Imanötan kuyakoq kanqantsik y juknölla kanqantsik yanapamantsik? (Colosensis 3:13, 14).

⁷ Noqantsikqa alläpa kuyakoq familiachömi kantsik, tsëmi atska bendicionkunata chaskintsik (1 Juan 4:11). Këllaman pensarishun: kuyakoq karmi ofendinakurpis aguantanakuntsik, y tsënöpam wawqi panikunawanqa juknölla kawakuntsik (Efes. 4:2-6; leyi Colosensis 3:13, 14). Tsëmi yanapamantsik reunionkunachöpis kushishqa sientikunapaq. ¡Tsënö kushishqa këtaqa manam mëchöpis tarita puëdishwantsu!

RESPETANAKUSHUN

8. ¿Imanötan Jehoväqa yanapamantsik wawqi panikunawan juknölla kawakunapaq?

⁸ Diosnintsik yanapamashqam jutsasapa këkarpis wawqi panikunawan juknölla kawakuyta puëdintsik (1 Cor. 12:25). Diospa Palabranmi kënö nin: “Teyta Diosmi jukniki juknikikuna kuyanakuyänëkipaq yachëkätsiyäshunki” (1 Tes. 4:9). ¿Imanötan yachëkätsimantsik? Bibliachömi nimantsik wawqi panikunawan mas amïgu kanapaq imata ruranantsikpaq kaqta. Y noqantsikqa yachatsimänata permitintsik, Palabran Bibliata leyirnin y yachakunqantsiknö kawakurninmi (Heb. 4:12; Sant. 1:25). Y tsëtam Jehoväpa testïgunkunaqa imëpis rurantsik.

9. Wawqi panintsikkunawan mas amïgu kanapaq, ¿imatataq yachakuntsik Romänus 12:9 a 13 textuchö ninqampita?

⁹ ¿Imanötan Diospa consëjunkuna yanapamantsik wawqi panikunawan mas amïgu kanapaq? Leyirishun Romänus 12:9 a 13 (leyi) textuta. Kananqa pensarishun, “jukkunata respetëchö punta puntachö kayë” ninqanman. ¿Ima nitataq munëkarqan? Jukkunata kuyanqantsiktaqa tukuynöpam rikätsikuyta puëdintsik. Këllaman pensarishun: capazchi perdonëkushwan, posadatsikoq kashwan o imachöpis yanapëkushwan (Efes. 4:32). Yanapanapaqqa, manam noqantsikta yanapamänataraqqa shuyaränantsiktsu. Tsëpa rantinqa, noqantsikmi pëkunata puntata yanapanantsik. Tsënöpam Jesus kënö ninqan cumplikanqa: “Imatapis chaskir kushikunqantsikpitaqa, imatapis qarakurmi masqa kushikuntsik” (Hëch. 20:35).

10. ¿Imanötan wakinkunata yanaparnin trabajador kanqantsikta rikätsikushwan? (Fötuta rikäri).

¹⁰ Apostol Pabluqa “jukkunata respetëchö punta puntachö kayë” niskirmi, kënö nirqan: “Ama qelaqa kayëtsu, sinöqa trabajador kayë”. Juk trabajador nunaqa imatapis gänas gänasllam ruran. Proverbius 3:27 y 28 textum kënö nin: “Yanapëta puëdikarqa, mana allikunapa pasëkaq nuna mayikita juklla yanapë”. Pitapis rikärishwan yanapayänanta wanëkaqta o necesidäpa pasëkaqta, tsëqa jinan höram yanapanantsik. Y manam juk hörakunachöraq yanapanapaqqa dejarinantsiktsu, ni manam pensanantsiktsu jukkuna yanapayänampaq kaqta (1 Juan 3:17, 18).

11. ¿Imatan yanapamäshun wawqi panintsikkunawan mas amïgu kanantsikpaq?

¹¹ Wawqi panintsikkunata respetanqantsiktaqa rikätsikuntsik ofendimashqa jinan höra perdonarninmi. Efesius 4:26 textuchömi kënö nin: “Ama cölerashqallaraq këkäyaptiki inti o rupay jeqarkutsuntsu”. ¿Imanirtan tsënö nimantsik? Mana perdonakoq kashqaqa 27 kaq versïculu ninqannömi, Diabluna controlëkämashwan. Diosnintsikqa kutin kutinmi Palabranchö nimantsik perdonakoq kanantsikpaq. Colosensis 3:13 textuchömi kënö nimantsik: “Jukniki juknikikuna [...] shonqupita perdonanakuyë”. Perdonakoq karqa, wawqi panintsikkunawanmi mas alli amïgu këta puëdishun. Y mas amïgu karqa, santu espïritu yanapamashqam wawqi panintsikkunawan yamë y juknölla kawakushun (Efes. 4:3). Peru yarpänantsikmi, mana perdonakoq karqa manam wawqi panikunawan yamë këta ni juknölla kawakuyta puëdishuntsu.

12. ¿Imanötan Jehovä yanapamantsik perdonakoq kanantsikpaq?

¹² Rasunmi, pitapis perdonananqa manam fäciltsu. Peru santu espïritu yanapamashqam perdonakoq këta puëdishun. Kuyakoq kanapaq y trabajador kanapaq niskirmi, Diospa Palabranqa kënö nimantsik: “Santu espïritu yanapayäshuptiki imatapis gänas gänaslla rurayë”. Awmi, santu espïritu yanapamashqam alli kaqta ruranapaq y kuyakoq kanapaq gänasnintsik kanqa y hasta ofendimaqnintsiktapis kushishqam perdonëkushun (Rom. 12:11). Tsëmi Jehoväta rogakunantsik yanapëkamänantsikpaq (Lüc. 11:13).

“RAKIKASHQA MANA KAYÄNËKIPAQ”

13. ¿Imarëkurtan wawqi panikunapita rakikäkurishwan?

¹³ Congregacionchöqa jukläya jukläyam kantsik (1 Tim. 2:3, 4). Tsëmi vistikunapaq, ima jampiwan jampikunapaq o imakunata rurar kushikunapaqpis jukläya jukläya decidintsik. Tsëmi mana cuidakurqa, noqantsiknö mana rurayaptin pëkunapita rakikar qallëkushwan (Rom. 14:4; 1 Cor. 1:10). Peru Diosnintsikqa juknintsik juknintsik kuyanakunapaqmi yachatsimarquntsik. Tsëmi pensanantsiktsu, decidinqantsikkuna wakinkuna decidiyanqampita mas alli kanqantaqa (Filip. 2:3).

14. ¿Imata ruranapaqtan kallpachakushwan, y imanirtan tsëta rurashwan?

¹⁴ Tsënöllam wawqi panikunawan imëpis unïdu kanapaqqa, animanantsik y wanayanqankunachö yanapanantsik (1 Tes. 5:11). Kë qepa watakunataqa, mëtsikaqmi Jehoväta sirwita dejashqakuna y congregacionpita rakishqakuna kutiyämushqa y pëkunataqa kushishqam chaskintsik (2 Cor. 2:8). Juk kutim 10 watapana Jehoväta sirwita dejashqa pani reunionman ëwarqan. Y kënömi nin: “Llapankunam alläpa kushishqa saludamaqnï shayämurqan” (Hëch. 3:19). ¿Imanötan tsënö saludayanqan yanaparqan? Kikinmi kënö nin: “Yapë kushishqa kanäpaq Jehovä yanapëkämanqantam sientirqä”. Pitapis animanapaq kallpachakushqaqa, Jesusmi utilizäramashwan mana allipa pasëkaqkunata yanapanapaq (Mat. 11:28, 29).

15. ¿Imanö mastan wawqi panikunawan juknölla kanapaq yanapakushwan? (Fötuta rikäri).

¹⁵ Tsënöllam wawqi panikunawan juknölla kanapaqqa, parlakunqantsikkunawan yanapakunantsik. Job 12:11 textuchömi kënö nin: “Imanömi mikuy mishkinqanta o mana mishkinqanta qalluwan musyantsik. Tsënöllam parlanqantsik alli o mana alli kanqantapis rinriwan musyantsik”. Juk alli cocinëruqa manaraq sirwikurmi cocinanqan mikuy imanö kanqanta musyanampaq puntataqa llamirin o yawarin. Tsënöllam imata parlëta munarpis, alliraq pensanantsik parlëta munanqantsik pitapis yanapanampaq y animanampaq kaqman (Sal. 141:3; Efes. 4:29).

16. ¿Pikunatan masqa parlakuyanqankunawan animakoq këta yachakuyanman?

¹⁶ Masqa casädu ollqukuna, papäkuna y mamäkunam parlakuyanqankunawan animakoq këta yachayänan (Col. 3:19, 21; Tïtu 2:4). Y anciänukunapis parlakuyanqankunawanmi Jehoväpa sirweqninkunata animayänan y consolayänan (Is. 32:1, 2; Gäl. 6:1). Diospa Palabranmi kënö nin: “Conviëneqchö imatapis parlakurinqanqa alläpa shumaqmi” (Prov. 15:23).

RASUMPA KUYAKOQ KANQANTSIKTA RIKÄTSIKUSHUN RURANQANTSIKKUNAWAN

17. ¿Imatataq rurashwan wawqi panintsikkunata rasumpa kuyarninqa?

¹⁷ Apostol Juanmi kënö nirqan: “Parlanqantsikllawan ni shimillapaqa kuyakoq kanqantsikta rikätsikushuntsu, sinöqa ruranqantsikwan y llapan shonquntsikwan rikätsikushun” (1 Juan 3:18). ¿Imatataq rurashwan llapan shonquntsikwan kuyakoq kanqantsikta rikätsikunapaq? Wawqi panintsikkunawanmi mas juntu kanantsik. Tsëta rurarqa, mas amïgum tikrashun y masmi kuyashun. Tsëmi reunionkunachöpis y Diosnintsikpita yachatsikurpis, pëkunawan mas juntu kanapaq kallpachakunantsik. Tsënöllam wayinkunaman visitanantsikpaqpis kallpachakunantsik. Tsëta rurashqaqa, wakin nunakunapis kënömi niyanqa: “Kikin Teyta Diosmi jukniki juknikikuna kuyanakuyänëkipaq yachëkätsiyäshunki” (1 Tes. 4:9). Y kikintsikmi cläru rikäshun Diospa Palabran kënö ninqan cumplikanqanta: “Imanö shumaqmi wawqikuna y panikunaqa, ¡juk kastanölla kushishqa kawakuyan!” (Sal. 133:1).