Ima asuntutapis mana entiendirqa humildi kashun

1. ¿Imata rurëta puëdeqtataq Jehovä kamamarquntsik, y imapaqtan tsënö kamamarquntsik?

TEYTA JEHOVÄQA kamamarquntsik pensë yachaqta, yachakuyta puëdeqta y yachakunqantsikmannö imatapis rurëta puëdeqtam. Tsënöqa kamamarquntsik ‘pëpita yachakunantsikta’ munar y pëta sirwirnin imatapis alli decidinantsikta munarmi (Prov. 2:1-5; Rom. 12:1).

2. (1) ¿Imatataq yarpänantsik? (Job 37:23, 24; dibüjuta rikäri). (2) Llapanta mana musyanqantsikta cuentachö katsinqantsikqa, ¿imanötan yanapamantsik?

² Yachakuyta puëdeqta Jehovä kamamashqantsik kaptimpis, manam llapantaqa musyantsiktsu (leyi Job 37:23, 24). Pensarishun Jobllaman. Pëqa llapanta musyanqantam pensarqan, peru Jehovä imëkakunapaq tapupaptinqa cuentatam qokurqan llapantaqa mana musyanqanta. Tsëmi yanaparqan pensëkanqanta cambianampaq y mas humildi kanampaq (Job 42:3-6). Y ¿imanötan noqantsiktaqa yanapamantsik llapanta mana musyanqantsikta cuentachö katsinqantsik? Humildi kanapaq y imatapis decidinantsik kaptinqa Jehovä yanapamänapaq kaqman confiakunapaqmi (Prov. 2:6).

3. ¿Imakunatataq këchö yachakushun?

³ ¿Imakuna pasakunampaq kaqtataq musyantsiktsu? ¿Tsëkunaman yarparäkurku Diosnintsikta maslla sirwita qelanantsik? Peru ¿imanötan yanapamantsik pasakunampaq kaqkunata mana musyanqantsik? Tsëtam këchö yachakurishun. Tsëmi yanapamäshun ima asuntutapis musyëta munarqa, Jehovä Diosnintsik yanapamänapaq kaqman confiakunapaq (Job 37:16).

MANAM MUSYANTSIKTSU MANA ALLI NUNAKUNATA DIOSNINTSIK IMË USHAKÄTSINAMPAQ KAQTA

4. Mateu 24:36 ninqannö, ¿imatataq musyantsiktsu?

⁴ (Leyi Mateu 24:36). Manam musyantsiktsu mana alli nunakunata Diosnintsik imë ushakätsinampaq kaqta. Y Jesuspis kë Patsachö këkarqa, mana musyanqantam nirqan.a Y apostolninkunatam nirqan tiempukunata patsätseq Teyta Jehovälla tsë asuntuta musyanqanta (Hëch. 1:6, 7). Jehoväqa decidishqanam mana alli nunakunata imë ushakätsinampaq kaqta, peru noqantsikqa manam imë ushakätsinampaq kaqta musyëta puëdintsiktsu.

5. ¿Imanötan sientikushwan ushakë imë shamunampaq kaqta mana musyar?

⁵ ¿Imatataq Jesus ninqanwan entiendintsik? Ushakë tiemputa imëyaq shuyaränapaq kaqta mana musyanqantsiktam. Tsëman yarpararnin, capazchi atska watapana Jehoväta sirwirpis, tsë tiemputa shuyarëta ajayärishwan o Diosnintsikta sirwitapis qelanärishwan. O capazchi familiantsikkuna o wakin nunakunapis ushakë manaraq chämunqampita burlakuyaptin aguantananqa fäciltsu kanman (2 Pëd. 3:3, 4). Y kënö pensar qallëkushwan: “Ushakë imë shamunampaq kaqta musyarqa, nunakuna burlakuyaptimpis pacienciawanchi aguantäman”.

6. ¿Imanötan yanapamantsik ushakë imë kanampaq kaqta mana musyanqantsik?

⁶ Jehoväqa munan rasumpa kuyarnin sirwinantsikta y pëman confiakunantsiktam, tsëmi ushakëta imë apamunampaq kaqtaqa willamarquntsiktsu. Jehovätaqa manam ushakë chämunqanyaqllatsu sirwita munantsik, sinöqa imëyaqpis mana dejëpam sirwita munantsik. Tsëqa, ¿imamantan masqa pensanantsik? Mana alli nunakuna ushakäriyaptin imakunata Jehovä ruramunampaq kaqmanmi pensanantsik y manam ushakë imë kanampaq kaqllamanqa. Tsëmi yanapamäshun Jehoväpa mas amïgun kanapaq y pë munanqannö kawakunapaq (2 Pëd. 3:11, 12).

7. ¿Imakunatataq musyantsik?

⁷ Ushakë imë kanampaq kaqman yarparäkunapa rantinqa, musyanqantsik kaqkunamanmi masqa pensanantsik. Y ¿imakunatataq musyantsik? 1914 watapita ushanan tiempukunachöna kawëkanqantsiktam. Bibliachöqa clärum Jehovä willamantsik kawëkanqantsik tiempu imanö kanqanta. Tsëmi cläru musyantsik nunakunata ‘Jehovä juzganan tiempuqa’ këllachöna kanqanta (Sof. 1:14). Tsënöllam cläru musyantsik llapan nunakunata ‘Gobiernumpita’ yachatsinantsikta Diosnintsik munanqanta (Mat. 24:14). Tsëmi cäsi 240 nacionkunachö y mil idiömapitapis maschö nunakunata yachëkatsintsik. Nunakunata Diospita yachatsinapaqqa, manam ushakë “imë junaq” kanampaq kaqtaraqqa musyëta wanantsiktsu.

JEHOVÄ IMANÖ YANAPAMÄNAPAQ KAQTAQA MANAM MUSYANTSIKTSU

8. ¿Imapaqtan Bibliachö parlëkan ‘llapan ruranqankuna’ nirqa? (Eclesiastes 11:5).

⁸ Teyta Dios “llapan ruranqankunataqa” manam wakintaqa entiendintsiktsu (leyi Eclesiastes 11:5). ¿Imapaqtan parlëkan “ruranqankuna” nirqa? Voluntäninta cumplinampaq llapan ruranqankunapaqmi. Tsë ruranqankunataqa manam entiendintsiktsu. Manam musyantsiktsu imatapis imanir permitinqanta o yanapamänapaq imata ruramunampaq kaqta (Sal. 37:5). Bibliachöqa nimantsik tsë ruranqankunata mana entiendinqantsiktam. Imanömi mamampa pachanchö wamra imanö formakanqanta entiendintsiktsu ni cientïficukunapis entiendiyantsu, tsënöllam Teyta Dios ruranqankunataqa entiendintsiktsu.

9. ¿Imatan pasakunman Jehovä imanö yanapamanqantsikta mana musyashqa?

⁹ Jehovä imanö yanapamänapaq kaqta mana musyarninqa, capazchi ima rurëtapis qelanäshun o Diosnintsikta maslla sirwinapaq juk markakunaman ëwëta o mas wallkallawan kawakuyta mantsashwan. O capazchi imatapis shuyaranqantsik munanqantsiknö mana yarquptinqa, Jehovä mana yanapëkamanqantsikta pensashwan. Këllaman pensarishun: capazchi mas seguïdu yachatsikurpis, Bibliapita yachakuyta munaqkunataqa tarishwantsu o construccionchö yanapakuykarpis problëmakunapa pasashwan, o maslla yanapakuyta munarpis puëdishwantsu. Tsëqa capaz kënö pensashwan: “¿Jehoväqa yanapëkämantsuraq?”.

10. Jehovä imanö yanapamänapaq kaqta mana musyanqantsikqa, ¿imanö nuna kanapaqtan yanapamantsik?

¹⁰ Peru Jehovä imanö yanapamänapaq kaqta mana musyanqantsikqa, humildi kanapaqmi yanapamantsik. Jehovä pensanqanqa manam nuna pensanqannötsu (Is. 55:8, 9). Tsënöllam yanapamantsik Jehovä munanqannö imatapis rurashqaqa, alli yarqunampaq kaqman confiakunapaq. Tsëmi yachatsikunqantsik o imatapis ruranqantsik alli yarquptinqa, “Jehovä yanapamaptinmi alli yarqushqa” nintsik (Sal. 127:1; 1 Cor. 3:7). Y imapis shuyaranqantsiknö mana pasakuptinqa, Jehovä llapanta musyëkanqanta cuentachö katsirmi tranquïlu sientikuntsik (Is. 26:12). Rurëta puëdinqantsikllatam rurantsik y Jehovä yanapamänapaq kaqmanmi confiakuntsik. Imatapis imanö ruranapaq kaqta, unë sirweqninkunatanö milagrukunawan mana musyatsimashqapis, llapan ruranqantsikkunachö yanapamänapaq kaqmanmi confiakuntsik (Hëch. 16:6-10).

11. ¿Imakunatataq musyantsik?

¹¹ Musyanqantsikkunata yarpanqantsikqa allipam yanapamantsik. Peru ¿imakunatataq musyantsik? Jehovä Diosnintsik kuyakoq, alli kaqta ruraq y yachaq kanqantam. Y musyantsikmi pëpaq y wawqi panintsikkunapaq ruranqantsikkunata alläpa valoranqanta y sirwinqantsikpita bendicimanqantsikta (Heb. 11:6).

MANAM MUSYANTSIKTSU WARË WARANTIN PASAKUNAMPAQ KAQKUNATA

12. Santiägu 4:13, 14 ninqannö, ¿imatataq musyantsiktsu?

¹² (Leyi Santiägu 4:13, 14). Warë warantin ima pasamänapaq kaqtaqa manam musyantsiktsu. ‘Llapantsiktapis mana pensanqantsik höram’ mana allikuna pasaramashwan (Ecl. 9:11). Tsëmi munanqantsikkunata rurëta munarpis, kawëkänapaq kaqta o rurëta puëdinapaq kaqtapis musyantsiktsu.

13. ¿Imanötan sientikushwan warë warätin ima pasakunampaq kaqkunata mana musyarnin?

¹³ Warë warätin ima pasanampaq kaqta mana musyarqa, capazchi alläpa yarpachakushwan. O capazchi ima pasamänapaq kaqkunaman yarpachakurlla kakurqa, kushishqa këta puëdishunnatsu. Rasumpa kaqchöqa, ima desgraciapis o ima mana allipis illaqpitam pasaramashwan y vïdantsikmi raslla o saslla cambiarinman. O capazchi shuyaranqantsikkuna mana cumplikaptinqa, alläpa llakikushwan o qelanäkurishwan (Prov. 13:12).

14. Kushishqa kanapaqqa, ¿imatataq ruranantsik? (Fötukunata rikäri).

¹⁴ Mana allikunapa pasarnin Jehovä Diosnintsikta mana dejarqa, rasumpa kuyanqantsiktam rikätsikuntsik; pëtaqa manam bendicimänantsikta munarllatsu sirwintsik. Bibliata estudiarmi entiendintsik llapan problëmakunapita Jehovä Diosnintsik mana libramänapaq kaqta; pëqa manam imanö kawakunapaqpis destinamantsiktsu. Kushishqaqa kawakuntsik Jehovä Diosnintsikta cäsukurmi y manam imakuna pasamänapaq kaqkunata musyartsu, y tsëtam Jehoväqa musyan (Jer. 10:23). Imata ruranapaqpis Jehovä ninqankunata cuentachö katsirqa, kënö nikaq cuentam rurëkantsik: “Teyta Jehovä munaptinqa kawëkäshunmi, y këtapis o waktapis rurashunmi” (Sant. 4:15).

15. ¿Shamoq tiempuchö imanö kawakunapaq kaqtataq musyantsik?

¹⁵ Warë warätin ima pasakunampaq kaqta mana musyarpis, clärum musyantsik, ciëluchö o Patsachö kawanantsik kaptimpis, Diosnintsikqa imëyaqpis kawakunantsikpaq änimanqantsikta. Pëqa manam ulikuntsu o llullakuntsu y llapan änikunqankunatam cumplimunqa (Tïtu 1:2). Tsëmi kënö nin: “Noqaqa qallananllapitanam imachö ushanampaq kaqta willakü, y unë witsampitanam manaraq pasakunqankunata willakurqö”. Diosnintsik llapan ninqankunaqa cumplikashqam y cumplikarmi sïguinqa (Is. 46:10). Y Jehovä kuyamänataqa manam imapis michanqatsu (Rom. 8:35-39). Y imëka mana allikuna pasamashqapis aguantanapaqmi yachaqta y kallpayoqta tikratsimäshun y consolamäshun. Segürum këkantsik Diosnintsik yanapamänapaq y bendicimänapaq kaqta (Jer. 17:7, 8).

JEHOVÄQA KIKINTSIKPITAPIS MASMI REQIMANTSIK

16. ¿Imanirtan nintsik Jehovä Diosnintsik alli reqimanqantsikta? (Salmus 139:1-6).

¹⁶ (Leyi Salmus 139:1-6). Kamamaqnintsik Jehoväqa allim musyan imanö kanqantsikta, tsëmi imakunapa pasëkanqantsiktapis alli musyan. Musyanmi imata munanqantsikta, imata rurëkanqantsikta, imatapis imanir ruranqantsikta o ima nita munanqantsikta. Gobernanti Davidmi nirqan Teyta Jehoväqa juk cuidakoq nunanö mëchö këkashqapis o imë hörapis cuidëkämanqantsikta. Llapanta Gobernaq, ciëluta y Patsata Kamaq y Llapanta Puëdeq Dios cuidamanqantsikqa alläpa kushikuypaqmi. Tsëmi gobernanti David kënö nirqan: “Imanö kanqäta alli musyanqëkiqa alläpa espantakuypaqmi, noqalläqa manam ichikllapis entiendillätsu” (Sal. 139:6).

17. ¿Imanirtan Diosnintsik alli reqimanqantsikta creiqa fäciltsu?

¹⁷ Capazchi imanö wätashqa kanqantsikpita, costumbrintsikpita o unë creinqantsikkunata yarparnin pensashwan Teytantsik Jehovä noqantsikpaq mana yarpachakunqanta. O capazchi gobernanti David höra höra pensanqannöpis, jutsata ruranqantsikpita Jehovä manana kuyamanqantsikta pensar llakikushwan y manana yanapamanqantsikta pensashwan (Sal. 38:18, 21). O capazchi pï karpis Jehovä munanqannö kawakuyta munar mana alli rurëkunata dejanampaq kallpachakunman, peru dejanan mana fäcil kaptin kënö pensanman: “¿Imanirtan Diosqa gustanqäkunata dejanäta munan? ¿Manatsuraq kanqätanölla chaskimanman?”.

18. ¿Imanirtan entiendinantsik kikintsikpitapis Jehovä Diosnintsik mas alli reqimanqantsikta? (Fötutawan dibüjuta rikäri).

¹⁸ Jehoväqa kikintsikpitapis masmi reqimantsik y imanö kanqantsikta mana musyashqapis allikunata ruranqantsiktam musyëkan. Jehoväqa allim musyan pantanqantsikkunata y musyanmi pë munanqannö nuna këta munanqantsikta, y kuyamantsikmi (Rom. 7:15). Jehoväqa musyanmi cambiukunata rurëta puëdinapaq kaqta y alli nuna tikranapaq kaqta. Tsëta musyanqantsikmi yanapamantsik Jehovä Diosnintsikta kushishqa sirwinantsikpaq.

19. ¿Imatataq Jehoväpita musyantsik?

¹⁹ ¿Imakunatataq Jehoväpita musyantsik? Alläpa kuyakoq kanqanta (1 Juan 4:8), kuyamarnintsik y alli kanantsikta munarnin Palabran Bibliaman shumaq consëjukunata qellqatsimunqanta y imëyaqpis kawakunata munarnin Wamran Jesus wanunanta permitinqantam. Tsëmi jutsasapa këkarpis, Diosnintsik munanqankunata rurëta puëdintsik (Rom. 7:24, 25). Tsënöllam musyantsik ‘Teyta Diosqa shonquntsikpitapis mas’ kanqanta y ‘llapanta musyanqanta’ (1 Juan 3:19, 20). Jehoväqa allim reqimantsik y voluntäninta rurëta puëdinapaq kaqtam musyan.

20. ¿Imatan yanapamantsik mana musyanqantsik kaqkunapaq mana yarpachakunapaq?

²⁰ Yachakurinqantsiknöpis, Jehoväqa wananqantsik kaqkunataqa musyatsimarquntsikmi. Tsëmi humildi kanantsik y manam mana musyanqantsik kaqkunapaqqa alläpa yarpachakunantsiktsu, tsëpa rantinqa musyanqantsik kaqkunatam masqa yarparänantsik. Tsëta rurarmi “llapanta musyaq Teyta” Jehoväman markäkunqantsikta o yärakunqantsikta rikätsikuntsik (Job 36:4). Kanan tiempu wakin cösaskunata mana musyarpis, kushishqam sientikuntsik shamoq tiempuchöqa Jehovä Diosnintsikpita yachakur sïguinapaq kaqta musyar (Ecl. 3:11).