Alli Yachatsikoq Jehoväpitam imëkata yachakuyarqö

PAPÄNÏKUNAPITAM YACHAKURQÄ

Papänïkunaqa 1957 watachömi, Italiapita Canadä nacionta ëwakuyarqan. Y Saskatchewan provinciachö këkaq Kindersley markachömi täkuyarqan. Tsëchö këkarmi Bibliapita yachakuyarqan y yachakuyanqankunata mas puntaman churayarqan. Tsëmi wamrallaraq këkaptï yachatsikoq yarqurnin pushayämaq y atska hörakunapam yachatsikuyaq kayä. Tsëmi höraqa, “noqaqa öchu watayoq kanqäpitam precursor auxiliar karqö” nir brömata rurä.

Papänïkunaqa manam qellëta tariyaqllatsu, peru Jehoväta sirwiyänanrëkurqa imëkatam rurayaq. 1963 watachömi Estädus Unïdus nacionchö Californiapa Pasadena markanchö atska nacionkunapaq asamblëata rurayarqan. Papänïkunaqa tsë asamblëaman ëwëta munarmi qellëninkuna tinkunampaq cösasninkunata rantikuyarqan. Y 1972 watachönam, Canadä nacionchö Columbia Britänica provinciachö këkaq Trail markaman ëwakuyarqä y italiänu idiömachö yachatsikurmi yanapakuyarqä; tsë markaqa karuchömi këkarqan. Papänïqa limpiapakur y imatapis malograqkunata altsapakurmi trabajarqan. Y Diospa kaqchö maslla yanapakuyta munarmi masta pagayänampaq trabäjuta munatsiyaptimpis yëkurqantsu.

Papänïkunatam alläpa agradecikü. Pëkunaqa wawqïta, panïkunata y noqatam imanö kawakuyänäpaq yachatsiyämashqa. Tsënöllam yachatsiyämashqa Diospa Gobiernunta puntaman churaptïqa, imëpis cuidamänampaq kaqman confiakunäpaq (Mat. 6:33).

LLAPAN TIEMPÜWAN JEHOVÄTA SIRWIR QALLÄ

1980 watachömi, Debbie jutiyoq shumaq paniwan casakurqä. Ishkäkunapis llapan tiempükunawanmi Jehoväta sirwita munayarqä, tsëmi casakuyanqäpita kima killa pasariptin Debbie precursöra tikrarqan. Y casakuyanqäpita juk wata pasariptinnam juk taksha congregacionman yanapakoq ëwayarqä, y tsëchömi noqapis precursor tikrarqä.

Tsëpita juk tiempu tsë congregacionchö qelanäkurirmi juk congregacionman ëwakuyta munayarqä. Peru congregacionkunata watukaq wawqiwan parlayaptïmi, kënö consejayämarqan: “Qamkunaqa pasakunqan problëmallamanmi yarparëkäyanki. Peru alli kaqkunaman pensarqa, kushishqam yanapakuyta puëdiyanki”. Tsë consëjutam wanëkäyarqä (Sal. 141:5). Consejayämanqankunata cäsukurmi alli kaqkunaman pensar qallëkuyarqä. Congregacionchöqa atskaq panikunam qowankuna mana Testïgu këkäyaptimpis Jehoväta maslla sirwita munayarqan, y hasta wamrakunapis tsëtam rurëkäyarqan. Problëmakunata Jehovä altsamunampaq kaqmanmi confiakuyarqä (Miq. 7:7). Rasumpam Jehoväqa altsamurqan y kushishqanam yanapakuyarqä.

Precursorkunapaq escuëlaman primëra vez ëwayanqächömi yachatsiyämaqnïkunaqa chuskoq kayarqan, y kimaqmi juk nacionkunachö yanapakushqa kayänaq. Pëkunam imakunapa pasayanqanta y Jehovä imanö bendicishqa kanqanta willayämarqan. Tsëmi noqakunapis pëkunanö misionëru kayänäpaq kallpachakuyarqä.

Misionëru këta munarmi 1984 watachö Columbia Britänica provinciapita Quebec provinciaman yanapakoq ëwayarqä, tsëqa këkarqan 4 mil kilömetruspita maschömi. Tsëchöqa frances idiömatam parlayan, tsëmi mana fäcil kaptimpis idiömankunata y costumbrinkunata yachakuyänä karqan. Y qellënïkunaqa manam gastükunapaq tinkoqtsu. Peru juk kutim juk nuna chakrampita papata ashipakuyänäpaq niyämarqan, tsëmi mikuyänäpaqqa papalla karqan. Debbieqa papallawanmi imëkata ruramoq. Peru imëka mana allikunapa pasarpis, kushishqa yanapakuyänäpaqmi kallpachakuyarqä y Jehoväqa cuidayämarqanmi (Sal. 64:10).

Juk junaqmi Canadä Betelman yanapakoq ëwayänäpaq qayayämarqan. Y noqakunaqa Galaad Escuëlapaq solicitudta llenashqa karmi masqa tsëman ëwëta munayarqä. Tsënö kaptimpis, Betelman ëwayänäpaqmi decidiyarqä. Tsëman chëkurmi Sucursalta rikaq Kenneth Little wawqita kënö tapuyarqä: “Galaad Escuëlapaqmi solicitudta llenayarqä, ¿invitayämanqatsuraq?”. Y pënam kënö niyämarqan: “Tsakaman char-raqmi tsakataqa pasantsik ¿aw?”.

Tsënö niyämanqampita juk semäna pasariptinllam Galaad Escuëlaman invitayämarqan. Tsëmi Galaad Escuëlaman ëwëta o Betelchö quedakuyta decidiyänä karqan. Peru wawqi Littleqa kënömi niyämarqan: “Mëqanta akrarpis, höra höraqa ‘juknin kaqta akrakuyäman karqan’ nirmi pensayanki. Mëqanta akrayaptikipis, allillam kanqa. Jehoväqa igual-llam bendicinqa”. Tsëmi Galaad Escuëlaman ëwayänäpaq decidiyarqä. Wawqi Little niyämanqanqa rasumpa kaqllam karqan. Noqakunapis wawqi panikuna ishkëta decidiyänan kaptinqa, pënöllam consejayä.

MISIONËRUNÖ YANAPAKUYÄ

Alläpam kushikuyarqä 1987 watachö Galaad Escuëlapa 83 kaq cläsinman invitayämanqampita. Tsë escuëlaqa karqan Nueva Yorkpa Brooklyn markachömi; compañërükunaqa 22 kayarqan. Y wakin yachatsiyämaqnïkunaqa kayarqan Ulysses Glass y Jack Redford wawqikunam. Pitsqa killakunaqa rasllam o sasllam pasarirqan, y 6 de setiembrichömi graduakuyarqä. John y Marie Goodetawanmi Haitï nacionman mandayämarqan.

Haitï nacionpitam 1962 watachö llapan misionërukunata qarquyarqan, y tsëpitaqa 1987 watachöran misionërunö noqakuna chäyarqä. Graduakuyanqäpita kima semänatam 35 publicadorkuna kayanqan congregacionman chäyarqä. Tsë congregacionqa jirkakunapa chowpinchömi karqan. Jövinllaraq karmi imëkata yachakuyänä karqan, y noqakunallam misionërukunapa wayinchö täkoq kayä. Haitïchö nunakunaqa pobrim kayaq, y wallkaqllam leyitapis yachayaq. Tsëchö kayanqä tiempuqa polïticukunam alläpa chikinakuyaq, gobiernuta jorqëta munarmi alläpa pelyayaq, huelgakunatam rurayaq y shukukuy vientupis alläpam karqan.

Haitïchö wawqi panikunaqa imëka mana allikunapa pasëkarpis, Jehoväta kuyarmi kushishqa yachatsikuyaq. Juk edäna panim leyita mana yachëkarpis, cäsi 150 textukunata yarpaq. Nunakuna imëka mana allikunapa pasëkäyanqanta rikarmi Diospa Gobiernumpita yachatsita munayaq kayä. Yachatsiyanqä wawqi panikunaqa wakinqa precursor regular, precursor especial y anciänu këmanmi chäyashqa. Y tsëta rikarmi alläpa kushikuyä.

Haitïchö këkarmi mormon religionpita Trevor jutiyoq misionëru jövinta atska kuti Bibliapita parlaparqä. Y pëmi watakuna pasariptin cartakamurqan kënö nir: “Ichikllachönam asamblëa kanqa y tsëchömi bautizakushaq. Bautizakurirqa, Haitï naciontam kutita munä. Mormon kanqä witsan misionërunö yanapakunqä markachömi, precursor especialnö yanapakuyta munä”. Y ninqannömi warminwan tsë markachö atska watapa yanapakuyarqan.

EURÖPACHÖ Y AFRICACHÖ YANAPAKUYÄ

Euröpachöqa Diospita yachatsikuyänantam permitïkäyarqanna, tsëmi mandayämarqan. Y 1992 watachömi Eslovenia nacionpa Liubliana markanman chäyarqä. Tsëpita amänunllachömi papänïkuna wamra kayanqan witsan Italiata manaraq ëwakurnin täkuyarqan. Chäyanqä witsanqa Yugoslavia nir unë reqiyanqan nacionchömi guërra qallëkarqan. Tsë nacionchö Testïgukunataqa Viena markachö sucursalpita (Austria), Zagreb markachö oficïnapita (Croacia) y Belgrädu markachö oficïnapitam (Serbia) wawqikuna atiendiyaq. Peru chäyanqä tiempuqa, tsë nacionkunachömi Betel wayita kanan karqan.

Tsëmi juk idiömata y juk costumbrita yachakuyänä karqan. Esloveniachö nunakunaqa kënömi niyämaq: “Idiömäkunata yachakuyqa manam fäciltsu”. ¡Y rasumpam fäciltsu karqan! Tsëchö wawqi panikunaqa Jehovätam alläpa kuyayaq y dirigimaqnintsikkuna ima cambiutapis niyämuptinqa rasmi o sasmi cäsukuyaq. Tsënö kayanqampitam Jehoväqa bendicirqan. Yapëmi rikäyarqä ima asuntutapis Jehoväqa tiempunchö kuyëpa correginqanta. Esloveniachö kayanqä watakunaqa imëkatam yachakur sïguiyarqä.

Y 2000 watachömi, Africa Occidentalchö këkaq Costa de Marfil nacionman mandayämarqan. Peru tsë nacionchö këkäyaptïmi, nunakunaqa kikinkunapura guërrata rurar qallëkuyarqan. Tsëmi 2002 wata noviembri killachö Siërra Leönaman ëwakuyänäpaq niyämarqan. Tsëchöpis 11 watapam kikinkunapura guërrachö kashqa kayänaq y tsëraqmi ushashqa kanaq. Costa de Marfilpitaqa alläpa llakishqam ëwakuyarqä. Peru imëkakunapa pasar yachakuyanqämi yanapayämarqan kushishqa kayänäpaq.

Tsë nacionchö nunakunaqa Diospita yachatsiyapti allim chaskikuyaq, y wawqi panikunapis guërrakunapa pasashqa këkar y waktsa këkarmi kuyakoq y qarakoq kayaq. Juk kutim warmï Debbieta juk pani röpata qarëta munarqan. Tsëmi Debbieqa kuyëllapa, “ama qaramëtsu” nirqan. Tsënam paniqa kënö nirqan: “Noqakunataqa mëtsë nacionpita turi nanakunam guërra witsanchö allipa yanapayämashqa, y kananqa noqakunapis yanapakuytam munayä”. Tsënö niptinmi noqakunapis pëkunanö qarakoq këta yachakuyarqä.

Tiempuwannam Costa de Marfilta yapë kutiyarqä, peru polïticukunam problëmata rurarnin yapë pelyar qallëkuyarqan. Tsëmi peligrösu kaptin 2004 watachö helicopteruwan apakayämarqan, y cada ünutam niyämarqan 10 kïlusllata bultükunata apayänäpaq. Tsë paqasqa frances soldädukunapa campamentunchömi waräyarqä, y waräninnam Suïza nacionman avionwan apayämarqan. Pullan paqasnömi sucursalman chäyarqä. Sucursalta rikaqkuna y Escuela de Entrenamiento Ministerial niyanqanchö yachatsikoqkunam warminkunawan shuyëkäyämänaq. Y qoñuykaq mikuyta y Suïzachö rurashqa chocolätikunatam qarayämarqan. ¡Shuyëkäyämanqanta rikarqa, alläpam kushikuyarqä!

Tsëpitanam juk tiempullapa yanapakuyänäpaq Ghäna nacionman mandayämarqan y Costa de Marfilchö problëmakuna pärakäriptinnam yapë kutiyarqä. Tsënö cambiukunapa pasayanqä tiempukunaqa wawqi panikunam alläpa yanapayämarqan. ¡Kuyakoq kayanqantaqa manam warmïwan imëpis qonqayäshaqtsu! Mana allikunapa pasayanqäkunaqa Diosnintsikta sirwir sïguiyänäpaqmi yanapayämashqa.

JUK LÄDUCHÖNA YANAPAKUYÄNÄPAQ NIYÄMAN

2006 watachönam, principal oficïnapita niyämarqan Orienti Mediuchö yanapakuyänäpaq. Y yapëmi mas idiömakunata y juk costumbrikunata yachakuyänä karqan. Tsë markachö nunakunaqa polïtica asuntuta y religiontam mas väleqpaq churayaq. Peru alläpa shumaqmi karqan, kayanqä congregacionchö atska idiömakunata parlëkarpis, dirigimaqnintsikkunata cäsukurnin wawqi panikuna juknölla kayanqanta rikëqa. Wakin wawqi panikunataqa familiankunam michäyaq, escuëlachö compañërunkuna, trabajaq mayinkuna y vecïnunkunam chikiyaq. Tsënö chikikäyaptimpis, manam Jehoväta dejayaqtsu.

2012 watachömi, Israel nacionpa Tel Aviv markanman asamblëaman ëwayarqä. Tsë asamblëamanqa juk nacionkunapita Testïgukunapis invitädum kayarqan. 33 wata Pentecostes fiestachö Jehoväpa sirweqninkuna mëtsikaq juntakäyanqampitaqa, tsë kutiran Jehoväpa sirweqninkunaqa yapë tsë nacionchö mëtsikaq juntakäyarqan y alläpa shumaqmi karqan.

Tsë witsankunam Testïgukuna yachatsikuyänanta mana permitiyanqan nacionman visitakoq ëwayänäpaq niyämarqan. Tsëmi juk ishkë publicacionkunata apakurkur ëwayarqä, yachatsikoq yarquyarqä y wallkaqlla juntakäyanqan asamblëakunachö kayarqä. Soldädukunaqa mëtsë lädupam imëkatapis controlarnin kayaq. Tsë nacionchöqa wallkaqllam Testïgukuna kayaq, tsëmi wakin Testïgukunaqa yachatsikurnin cuidädu puriyänäpaq compañayämarqan.

AFRICAMAN KUTIYÄ

2013 watachönam Kinsäsa markachö këkaq sucursalman yanapakoq ëwayänäpaq niyämarqan; tsëqa Republica Democrätica del Congo nacionchömi këkan. Tsë nacionqa alläpa shumaqmi y jatunmi, peru tsë nacionchöqa nunakuna wanutsinakurllam kayaq y alläpa pobrim kayan. Kinsäsa markata ëwakuyänäpaq niyämaptinqa, qallananllachöqa kënömi pensayarqä: “Africataqa reqintsiknam, musyantsiknam imanö kanqanta”. Peru rasumpa kaqchöqa, manam allillaqa reqiyarqätsu. Manam fäciltsu karqan carretërapis ni tsakapis mana kanqan sitiukunapa viajëqa. Peru tsë nacionchö wawqi panikuna alläpa waktsa këkarpis Diosnintsikpita kushishqa yachatsikuyanqanta, reunionkunaman y asamblëakunaman ëwayanqanta rikäyanqämi yanapayämarqan alli aguantayänäpaq. Y clärum rikäyarqä Jehovä yanapayämaptin mëtsikaq nunakuna pëpita yachakuyanqanta. Congo nacionchöqa imëkatam yachakuyarqä y alli amïgukunayoqmi kayarqä.

2017 watachömi Sudafricachö këkaq Betelchö yanapakuyänäpaq niyämarqan. Tsë kutiran jatun Betelchöqa trabajayarqä y imëpis mana rurayanqäkunata rurayänäpaqmi niyämarqan. Yapëmi imëkata yachakuyänä karqan, peru puntakunata yachakuyanqäkunam alläpa yanapayämarqan. Tsë Betelchöqa mëtsika watapana Jehoväta sirwishqa wawqi panikunam kayarqan, y pëkunataqa alläpam kuyayä. Y tukuyläya costumbriyoq y tukuyläya kastapita këkarpis, llapan wawqi panikunam juk familianölla kushishqa kawakuyan. Jehoväqa mandakunqankunata cäsukushqam kushishqa kawakunapaq bendicimantsik.

Warmï Debbiewanqa imëkachömi yanapakuyarqö y alläpa shumaqmi kashqa. Mana fäcil kaptimpis, juk nunakunapa costumbrinkunata y idiömankunatam yachakuyarqä. Y mana allikunapa pasayanqä hörakunam Jehovä Diosnintsikqa alläpa kuyakoq karnin sirweqninkunata dirigeqkunawan y wawqi panikunawan yanapayämashqa (Sal. 144:2). Jehoväta sirwirnin llapan yachakuyanqäkunaqa yanapayämashqa Jehoväta mas alli sirwiyänäpaqmi.

Alläpam agradecikü papänïkuna yachatsiyämanqampita, warmï Debbie yanapamanqampita y mëtsë nacionkunachö këkaq wawqi panikuna yachatsiyämanqampita. Alli Yachatsikoq Jehoväpitaqa imëyaqpis yachakuytam munayä.