Ëtsa mikuyqa, ¿mana allitsuraq? | ¿Ima nintan Bibliachö?

Kanan witsanqa imëpitapis masmi pïmë nunakuna munayantsu animalkunata sufritsiyänanta o wanutsiyänanta, y tsënö kaq nunakunatam vegano nir reqiyan.

• The Vegan Society niyanqanchö këkaqkunam kënö niyan: “Alli pensëta yachar y alli kawakuyta munarmi juk nunaqa vegano tikran. Vegano nunakunaqa manam munayantsu mikuyänanrëkur, ima röpatapis rurayänanrëkur o imarëkurpis animalkunata sufritsiyänanta o wanutsiyänanta, y puëdikaptin o precisaptinqa tsëta michëtam procurayan”.

Wakin nunakunaqa manam animalkunata kuyarllatsu vegano tikrayan, sinöqa medioambiente niyanqanta o saludninkunata cuidëta munarmi, o religionninkunarëkurmi.

• Britannica Academic niyanqanchömi kënö nin: “Wakin nunakunaqa saludninkunata cuidayänanrëkurmi imatapis llutallaqa mikuyantsu, peru vegano këqa manam tsëllatsu. Vegano kanampaqqa pipis decidin allipaq kaqta pensanqanwan, alli portakunqanwan y imëka ruranqanwan kë mundu cambiananta munarmi”.

Vegano këqa, ¿yanapakuyta puëdinqatsuraq kë mundu mas alli tikranampaq? ¿Ima nintan Bibliachö?

Kamakoq Diosnintsikqa, ¿ima nintan nunakunapaq y animalkunapaq?

Bibliachöqa nin, nunakunapa autoridäninchö y mandädunchö kanampaq animalkunata Diosnintsik Jehoväa kamanqantam (Genesis 1:27, 28). Tsëpita juk tiempu pasariptinmi Diosnintsikqa permitirqanna animalkunapa ëtsanta nunakuna mikuyänanta (Genesis 9:3). Peru tsëta permitirpis, animalkunata ardëpa sufritsiyänantaqa manam Diosnintsik munantsu (Proverbius 12:10).

Bibliachöqa clärum nin ëtsata mikunampaq o mana mikunampaq kaqtaqa cada nuna decidita puëdinqanta.b Diosnintsikpa rikëninchöqa manam ëtsa mikunqantsikpita o mana mikunqantsikpitatsu alli kashun (1 Corintius 8:8). Tsëmi ëtsata mikunampaq o mana mikunampaq pï nunapis decidiptinqa, ni pipis pëpaq mana allita parlanmantsu (Romänus 14:3).

Kë munduqa, ¿imëllapis mas alli tikranqatsuraq?

Bibliachöqa clärum nin nunaqa imëkata rurarpis kë munduta cambiëta mana puëdinampaq kaqta. Kë munduchöqa imëka problëmakuna kan polïticukuna mana allikunata rurayaptin, nunakuna mana alli portakuyaptin y qellë tarinan mas difïcil tikraptinmi, y tsëtaqa manam ni pï nunapis cambiëta puëdinqatsu. Bibliachömi kënö nin:

• “Wiksuna këkaqtaqa manam derechëta puëdintsiknatsu” (Eclesiastes 1:15).

Kë munduchö imëka problëmakunataqa Diosnintsikllam ushakätsita puëdin. Bibliachömi kënö nin:

• “Tsënam mushoq ciëluta y mushoq patsata rikarqä; unë kaq ciëluqa y unë kaq patsaqa manam karqannatsu, y lamarpis manam karqannatsu” (Apocalipsis 21:1).

Kë textuchö ‘unë kaq ciëlu’ nirqa, kë munduchö gobiernukunapaqmi parlëkan, peru ‘mushoq ciëlu’ nirqa, ciëluchö Diospa Gobiernumpaqmi parlëkan. Diospa Gobiernunqa ‘unë kaq patsatam’ ushakätsinqa, juk parlakuychöqa, llapan mana alli nunakunata. Y tsëpitaqa, juk ‘mushoq patsatanam’ gobernanqa, juk parlakuychöqa, Diospa Gobiernunta cäsukoq alli nunakunata.

Alli nunakunaqa Diospa Gobiernun gobernamuptinmi animalkunata y kë Patsata mas alli cuidëta yachakuyanqa (Isaïas 11:6-9).