¿Jehoväpa testïgunkunapa Bibliankuna kanku?
Jehoväpa testïgunkunaqa Diospita yachakuyänampaq juk Bibliakunata utilizarpis, Mushoq Patsachö Kawaqkunapaq Diospa Palabran Bibliatam masqa utilizäyan. ¿Imanir? Teyta Diospa jutin kaptin, unë qellqayanqannölla kaptin y fäcil leyinan kaptinmi; y mëtsika idiömachömi kan.
Teyta Diospa jutin. Mëtsika Bibliakunata ruraqkunaqa Teyta Diosta mana respetayanqantam rikätsikuyashqa. ¿Imanötan musyantsik? Këllaman yarpärishun, juk Bibliata ruraqkunaqa llapan yanapakoq nunakunapa jutinkunatam churayarqan; peru Teyta Jehoväpa jutintaqa manam nï juk kutillapis churayarqantsu.
Mushoq Patsachö Kawaqkunapaq Diospa Palabran Bibliachöqa, mëchömi Teyta Diospa jutin yurin tsëmanmi churayashqa. Kë Bibliata ruraqkunapa jutinkunaqa manam nï mëchöpis yurintsu.
Unë qellqayanqannöllam. Wakin Bibliakunachöqa, manam Teyta Dios qellqatsinqantanötsu churayashqa. Mateu 7: 13 (Teyta Diospa Willakïnin [TDW]) imanö churayanqanta rikärishun. Kënömi nin: “Kichki punkupa yëkuyë. Anchu punkupa yëkuqkunaqa jatun nänipam infiernuman ëwëkäyan”. “Ushakë” ninampa rantinmi, “infiernu” nir churayashqa. Tsë Bibliata ruraqkunaqa creiyanqantam churayarqan, y manam Diospa Palabran ninqantatsu. Peru Mushoq Patsachö Kawaqkunapaq Diospa Palabran Bibliachöqa, Teyta Dios unë qellqatsinqannöllam ‘ushakëman chätsikun’ nir churayashqa.
Fäcil leyinan. Teyta Dios qellqatsimunqannölla wakin Bibliakuna karpis, manam fäcil leyinantsu kayan. Mateu 5:3 (Mushoq Testamentu Kechwachow [QKW]) ninqantaqa kënömi churayashqa: “Kushikïyoqmi waktsakuna espirituchow”. Tsënö churayanqanqa, manam kanan witsan nunakuna parlakuyanqannötsu. Tsënö kaptimpis, Mushoq Patsachö Kawaqkunapaq Diospa Palabran Bibliataqa, nunakuna parlakuyanqantanömi rurayashqa. Tsëmi Mateu 5:3 ninqanta kënö churayashqa: “Kushishqam kayan Dios pushananta wanayanqanta musyaq kaqkuna”.
Mushoq Patsachö Kawaqkunapaq Diospa Palabran Bibliachöqa Teyta Diospa jutinmi yurin, unë qellqayanqannöllam y fäcil leyinanllam. Y kë Bibliataqa manam rantikuyantsu, tsëmi pï më nunakuna katsita puëdiyan.