¿Imanirtan Jesus wanunqanqa llapan nunakunata salvëta puëdin?
Bibliachö yachatsikunqan
Teyta Diosqa Jesus wanunqanwanmi jutsapita y wanuypita nunakunata salvamantsik o libramantsik. Bibliachömi willakun, Teyta Diosqa tsurin Jesuspa yawarninwan pagakur salvamanqantsikta (Efesius 1:7; 1 Pëdru 1:18, 19). Tsëmi Jesusqa nirqan, ‘vïdanwan pagakur mëtsikaqta salvanampaq’ shamushqa kanqanta (Mateu 20:28).
¿Imanirtan Jesusqa ‘mëtsikaqta salvanampaq’ wanunan karqan?
Teyta Diosqa jutsannaqtam Adanta kamarqan. Pëqa mana wanurmi imëyaqpis kawakunman karqan. Peru Teyta Diosta mana cäsukurmi, tsënö kawëta puëdirqannatsu (Genesis 3:17-19). Adanpa tsurinkunapis jutsayoqllanam yuriyarqan (Romänus 5:12). Tsëmi Bibliachöqa willakun, Adanqa kikinta y pëpita yureqkunata jutsapa y wanuypa makinman rantikushqa kanqanta (Romänus 7:14). Llapantsikpis jutsa ruraq karmi, Adan perdinqantaqa yapë tarita puëdintsiktsu (Salmus 49:7, 8).
Salvakuyänampaq ima rurëta mana puëdiyaptinmi, Teyta Diosqa Adanpita yureq nunakunata llakiparqan (Juan 3:16). Peru Teyta Diosqa allita ruraq karmi, jutsata rurayanqantaqa tsënölla qonqëkuyta o perdonëkuyta puëdirqantsu (Salmus 89:14; Romänus 3:23-26). Teyta Diosqa nunakunata alläpa kuyarmi, jutsankunapita perdonanampaq y jutsata ushakätsinampaq Jesus wanunanta permitirqan, tsënöpa nunakunata salvanampaq (Romänus 5:6-8).
¿Ima ninantan pagakur salvëqa?
Bibliachö imatapis pagakur salvakëpaq parlarqa, këkunapaqmi parlëkan:
Chaninta pagakuypaq (Nümerus 3:46, 47).
Tsënöpa pï nunapis libri quedanampaq o pëpa kaqta yapë kutitsiyänampaq (Exodu 21:30).
Pagakuptin kutiyanqan pagakunqanwan igualan kanqampaq.a
Rikärishun kë kimata yachatsikunqantsik Jesus wanunqanchö imanö cumplikanqanta.
Chaninta pagakunqan. Cristiänukunapaq parlarmi Bibliachö kënö willakun: “Qamkunaqa chaniyoqchömi rantishqa kayarqunki” (1 Corintius 6:20; 7:23). Tsë chaninqa Jesuspa yawarninmi. Tsëwanmi Jesusqa “llapan kastapita, idiömapita, markapita y nacionpita Teyta Diospaq nunakunata” rantishqa (Apocalipsis 5:8, 9).
Libri kayänampaq. Jesus wanunqanqa jutsapita libri kanapaqmi yanapamantsik (1 Corintius 1:30; Colosensis 1:14; Hebrëus 9:15).
Pagakunqanwan igual kanqan. Salvamänantsikpaq jutsannaq vïdanta Jesus entreganqanqa, punta nuna Adanpa jutsannaq vïdanwanmi igual karqan (1 Corintius 15:21, 22, 45, 46). Bibliachömi kënö willakun: “Juk nuna [Adan] mana cäsukoq kanqanrëkurlla mëtsikaq nunakuna jutsata ruraq tikrayanqannöllam, juk nuna [Jesus] cäsukoq kanqanrëkurlla mëtsikaq nunakuna allita ruraqnö rikashqa kayanqa” (Romänus 5:19). Tsënö ninqanmi yanapamantsik, juk nuna wanunqanlla mëtsikaqta jutsapita imanö salvanqanta entiendinapaq. Awmi, Jesusmi “jutsapita libri kanantsikpaq pagakur llapantsikpaq wanurqan o wañurqan”, tsënöpa pë ruranqanta valoraqkuna salvakuyta puëdinapaq (1 Timoteu 2:5, 6).
a Hebreu y griëgu idiömachö niyanqanta, Bibliachö “pagakur salvë” nir traduciyanqan palabraqa, imatapis entregamänapaq chaninta pagakuypaq o imatapis alläpa väleqta entreguëpaqmi parlëkan. Maslla musyarinapaq, hebreu idiömachö kafar palabraqa, imatapis “tsapë” ninanmi (Genesis 6:14). Bibliachöqa tsë palabraqa mas yurin, jutsapita perdonashqa këpaq parlaptinmi (Salmus 65:3). Köfer palabranam, imatapis salvanapaq entreganqantsikta rikätsikun (Exodu 21:30). Griëgu idiömapita “pagakur salvë” nir traduciyan lytron palabrataqa, “pitapis salvanapaq pägu” nirpis traducita puëdiyanmi (Mateu 20:28). Unë griëgu nunakunaqa, guërrachö prësuyanqan nunakunata salvayanqampaq o esclävukuna libri yarquyänampaq pagayanqampaq parlarmi tsë palabrata utilizäyaq.