Bibliachö alläpa sufrimientu tiempupaq parlarqa, ¿imapaqtan parlëkan?

Bibliachö willakunqan

Alläpa sufrimientu tiempuchöqa, imëka mana allikunapa pasarmi nunakuna alläpa sufriyanqa. Y tsëqa Bibliachö willakunqannömi ‘ushanan tiempuchö’ pasanqa (2 Timoteu 3:1; Daniel 12:4). Marcus 13:19 textuchömi kënö nin: “Tsë junaqkunaqa alläpa sufrimientum kanqa. Tsënö sufrimientuqa manam kashqaraqtsu Teyta Dios nunakunata kamanqampita, y manam yapëqa kanqanatsu” (Daniel 12:1; Mateu 24:21, 22).

¿Imatan pasanqa alläpa sufrimientu tiempuchö?

• Mana alli religionkunam ushakäyanqa. Rasllam o sasllam mana alli religionkuna ushakäriyanqa (Apocalipsis 17:1, 5; 18:9, 10, 21). Naciönes Unïdaschö këkaq gobiernukunam mana alli religionkunata ushakätsiyanqa y tsënömi Dios munanqanta cumpliyanqa (Apocalipsis 17:3, 15-18).a

• Diospa sirweqninkunatam ushakätsita munayanqa. Ezequiel visionchö rikanqan “Magogpita Gogqa”, juk grüpu nacionkunam kayan. Pëkunam Diospa sirweqninkunata ushakätsita munayanqa. Tsënö kaptimpis, Jehoväqa manam permitinqatsu sirweqninkunata ushakätsiyänanta (Ezequiel 38:1, 2, 9-12, 18-23).

• Patsachö nunakunam juzgashqa kayanqa. Jesusqa llapan nunakunatam juzganqa, “tsëchömi mitsikoq nuna üshakunata cabrakunapita rakeqnö ishkë grüpuman nunakunata rakinqa” (Mateu 25:31-33). Pëwan ciëluchö gobernayänampaq akranqan nunakunata yanapayanqanta o mana yanapayanqanta cuentaman churëkurmi, Jesusqa nunakunata juzganqa y kawayänampaq o mana kawayänampaqpis decidinqa (Mateu 25:34-46).

• Jesuswan gobernayämunampaq kaqkunatam juntayanqa. Patsallachöraq këkaq, Jesuswan gobernayämunampaq kaqkunaqa wanurirmi ciëluchö kawayänampaq kawariyämunqa (Mateu 24:31; 1 Corintius 15:50-53; 1 Tesalonicensis 4:15-17).

• Armagedon guërram kanqa. Bibliachöqa, Armagedonpaq willakur kënömi nin: “Llapanta Puëdeq Teyta Dios nunakunata juzganan tiempuchö” guërra, y kënöpis ninmi: ‘Jehovä juzganan tiempu’ (Apocalipsis 16:14, 16; Isaïas 13:9; 2 Pëdru 3:12). Jesucristu condenanqan kaq nunakunaqa Armagedon guërrachömi ushakäyanqa (Sofonïas 1:18; 2 Tesalonicensis 1:6-10). Y patsachö llapan gobiernukunapis ushakäyanqam, pëkunapaqmi Bibliachö willakun, qanchis peqayoq o umayoq chunka waqrayoq mantsëpaq chukaru animalnö kayanqanta (Apocalipsis 19:19-21).

¿Imatan pasanqa alläpa sufrimientu pasariptin?

• Satanaswan demoniukunam wichqashqa kayanqa. Alläpa puëdeq juk angelmi, Satanastawan demoniukunata “mankarëkaq uchkuman” wichqanqa (Apocalipsis 20:1-3). Tsë uchkuchöqa carcelchö këkaq cuentam kayanqa, tsëmi Satanaswan demoniukunaqa ni pitapis engañëta puëdiyanqanatsu. Tsë uchkuchöqa wanushqa cuentam kayanqa (Apocalipsis 20:7).

• Mil Watapa Jesus gobernar qallan. Satanastawan demoniukunata wichqarirmi, Jesusqa mil watapa gobernar qallanqa, tsëchömi nunakuna atska bendicionkunata chaskiyanqa (Apocalipsis 5:9, 10; 20:4, 6). Alläpa sufrimientu pasariptinqa ’mëtsikaq nunakunam’ salvakuyanqa, y Jesus gobernar qallanqantam rikäyanqa (Apocalipsis 7:9, 14; Salmus 37:9-11).