¿Bibliachöqa Dios nimanqantsikku këkan?
Awmi. Mëtsika watakuna pasashqa kaptin y jukman jukman qellqashqa kayaptimpis, Bibliachöqa Teyta Dios nimanqantsikmi këkan. Y tsëtaqa musyantsik, unë witsan qellqayanqantawan kanan katsinqantsik Bibliakunata igualatsirmi.
Jukman jukman qellqëkarqa, ¿manatsuraq imallachöpis pantayarqan?
Teyta Diospa Palabranta jukman jukman qellqarqa, wakin wakinchöqa pantayashqam. Peru palabrakunallam cambiashqa, Teyta Dios nimanqantsikqa manam cambiashqatsu. Tsënö kaptimpis, wakin Bibliakunachöqa alläpanam cambiariyashqa, y manam Diosnintsik qellqatsinqannatsu këkan. Imachö cambiayanqanta rikärishun.
Unë qellqayanqan Bibliakunachöqa, wakinkunaqa 1 Juan 5:7-ta (Teyta Diospa Willakïnin [TDW]) kënö nirmi churayashqa: “Teyta Diosmi, Tsurin Jesucristum y Espíritu Santum. Pëkunaqa kimaq karpis jukllëllam këkäyan”. Tsënö kaptimpis, unë qellqayanqanchöqa manam tsëtatsu nirqan.a Tsëmi kanan witsan mas reqishqa Bibliakunachöqa, tsënötsu churayashqa.
Teyta Dios qellqatsinqanchö mëtsika kuti jutin yurishqa kaptimpis, wakin Bibliakunachöqa Diospa jutinta churayänampa rantinmi, “Señor” o “Teyta Dios” nirlla churayashqa.
Tsëqa, ¿manatsuraq jukkunachöpis pantayashqa?
Unë qellqayanqan Diospa Palabrantaqa mëtsikatam tariyashqa, y tsëkunaqa imachö pantayanqantam cläru rikätsikunman.b Tsëkunata igualatsirqa, ¿pantayanqankunataku rikätsimantsik? Kanan witsan katsinqantsik Bibliamanqa, ¿markäkushwanku o yärakushwanku?
Hebreu Idiömachö Qellqayanqan o Antïguo Testamentu nir reqiyanqan Diospa Palabrampaqmi, William Henry Green yachaq nuna nirqan: “Unë witsan qellqayanqan librukunapitaqa, Diospa Palabranllam unë witsan qellqayanqannöllaqa këkan”.
Griëgu Idiömachö Qellqayanqan o Nuëvu Testamentu nir reqiyanqan Diospa Palabrampaqmi, Frederick Bruce reqishqa nuna nirqan: “Unë witsan qellqayanqan librukunaqa cäsi llapanmi ushakashqa, peru unë qellqayanqan Diospa Palabranqa atskam kan. Tsëmi rikätsimantsik, kanan witsan katsinqantsik Bibliaqa Teyta Dios qellqatsinqannölla këkanqanta”.
Frederic Kenyon reqishqa nunam nirqan, pï nunapis “Bibliata katsirqa Diospa Palabranta katsinqantam següru kanan. Mëtsika watakuna pasashqa kaptimpis, unë qellqayanqannöllam Bibliaqa këkan”.
¿Ima mastan rikätsimantsik Bibliaqa unë qellqayanqannölla këkanqanta?
Jukman jukman Diospa Palabranta qellqaqkunaqa, marka mayinkuna mana allikuna rurayanqantam churayarqan (Nümerus 20:12; 2 Samuel 11:2-4; Gälatas 2:11-14).c Israelïtakuna mana cäsukoq kayanqampita Teyta Dios castigashqa kanqanta y nunakuna mana allikunaman creiyanqantapis, Bibliamanqa churayarqanmi (Osëas 4:2; Malaquïas 2:8, 9; Mateu 23:8, 9; 1 Juan 5:21). Jukman jukman qellqaqkuna tsënö rurayanqanqa, rasumpa kaqllata qellqayanqanta y Diospa Palabranta respetayanqantam rikätsikuyarqan.
Teyta Diosqa imëkatam rurashqa, Palabran Bibliachö qellqatsinqanta mana cambiayänampaq (Isaïas 40:8; 1 Pëdru 1:24, 25).d Bibliaqa manam unë witsan nunakunallatatsu yanaparqan, sinöqa kanampis yanapamantsikmi (1 Corintius 10:11). Tsëmi kikin Bibliachö kënö nin: “Puntallapitana llapan qellqashqa kaqkunaqa, yachakunapaqmi qellqashqa kayarqan, tsënöpa alli tsarakur y Diospa Palabran shoqamashqa, shuyäkïyoq kanapaq” (Romänus 15:4).
Jesuswan qateqninkunaqa Hebreu Idiömachö Qellqayanqan Diospa Palabrampitam yachatsikuyarqan, y manam “këqa rasumpatsuraq” nir yarpachakuyarqantsu (Lücas 4:16-21; Hëchus 17:1-3).
a Kë Bibliakunachöqa manam tsënötsu yurin: Códice Sinaítico, el Códice Alejandrino, el Manuscrito Vaticano 1209, la Vulgata latina original, la versión siríaca Filoxeniana-Harclense ni en la Peshitta siríaca.
b Griëgu Idiömachö Qellqayanqan o Nuëvu Testamentu nir reqiyanqan Diospa Palabranta jukman jukman qellqayanqantaqa, pitsqa waranqapitapis mastam tariyashqa.
c Teyta Diospa sirweqninkunata dirigeqkunapis, jutsa ruraq kayanqantam Bibliachöqa rikätsikun. Kënömi nin: “Llapan nunakunapis jutsata ruraqllam këkäyan” (1 Rëyes 8:46).
d Bibliata qellqaqkunaqa, manam palabra por palabratsu qellqayarqan. Tsëpa rantinqa, Teyta Dios yarpanqantam qellqayarqan (2 Timoteu 3:16, 17; 2 Pëdru 1:21).