Juëces
3 Guërrata mana rikashqa israelïtakuna guërrakunapa pasayänanta munarmi, Jehovä Diosqa permitirqantsu Canaanchö wakin nacionkunata qarquyänanta.+ 2 (Tsëtaqa permitirqan guërrakunata mana rikashqa qepa yurikoq israelïtakuna, guërrakunachö kë imanö kanqanta musyayänampaqmi). 3 Kë nacionkunachö kawaqkunatam qarquyarqantsu: filisteukunapa+ pitsqa gobernaqninkunata, llapan cananeukunata, sidoniukunata+ y heveukunata. Pëkunaqa Lïbanu+ jirkakunachömi, Baal-Hermon jirkakunapita Lebö-Hamatyaq+ kawayarqan.+ 4 Tsë nacionkunachö nunakunaqa quedayarqan, Jehovä Diospa mandamientunkunata cäsukuyanqanta o mana cäsukuyanqanta israelïtakuna rikätsikuyänampaqmi. Tsë mandamientukunataqa Moisestawanmi unë kastankunata Diosnintsik entregarqan.+ 5 Tsëmi israelïtakunaqa cananeukunawan,+ hitïtakunawan, amorreukunawan, perizïtakunawan, heveukunawan y jebuseukunawan juntu kawakuyarqan. 6 Israelïtakunaqa pëkunapa warmi wamrankunawanmi casakuyarqan y warmi wamrankunatanam pëkunapa ollqu tsurinkunatawan casatsiyarqan, y santunkunatam adorayarqan.+
7 Israelïtakunaqa Teyta Jehoväta mana cäsukurmi mana allikunata rurayarqan. Diosninkuna Jehoväta qonqëkurmi, Baal santukunata+ y Aserä santupa postinkunata* adorar qallëkuyarqan.+ 8 Tsëmi Jehovä Diosqa israelïtakunawan cölerar Mesopotamiapa* gobernaqnin Cusan-Risataimpa makinchö dejaskirqan. Israelïtakunaqa puwaq watapam Cusan-Risataimta sirwiyarqan. 9 Tsënam israelïtakunaqa Jehovä Diosta rogakuyarqan yanapëkunampaq.+ Tsëmi Teyta Jehoväqa pëkunata salvanampaq Otnielta+ churarqan,+ pëqa Calebpa menor wawqin Quenazpa tsurinmi karqan. 10 Jehovä Dios poderninwan yanapaptinmi, Otnielqa+ Israelpa jueznin këman charqan. Mesopotamiapa* gobernantin Cusan-Risataimwan pelyaq ëwaptinmi, Teyta Jehoväqa Otnielta yanaparqan, tsëmi Cusan-Risataimta vencirqan. 11 Tsëpitaqa tsë markakunachö cuarenta watapam yamëna kawakuyarqan. Tsëpitanam Quenazpa tsurin Otniel wanukurqan.
12 Israelïtakunaqa Jehovä Diosta mana cäsukurmi yapë mana allikunata rurar qallëkuyarqan.+ Tsëmi Teyta Jehoväqa permitirqan Moabpa gobernantin Eglon+ pëkunapita mas puëdeq tikrananta. Israelïtakunaqa Teyta Jehoväta mana cäsukurmi mana allikunata rurayarqan. 13 Teyta Diosqa ammonïta nunakunata+ y amalequïta nunakunatapis+ permitirqanmi israelïtakunawan pelyayänampaq, tsëmi palmërakunayoq markapa* duëñun tikrayarqan.+ 14 Israelïtakunaqa Moabpa gobernantin Eglontam dieciöchu watapa sirwiyarqan.+ 15 Tsënam israelïtakunaqa Jehovä Diosman rogakuyarqan yanapëkunampaq.+ Tsëmi Teyta Jehoväqa Gueräpa tsurin Ehudta churarqan+ salvanampaq.+ Pëqa Benjaminpa kastampitam+ karqan y izquierda makintam alli manejaq.+ Tiempuwannam israelïtakunaqa Moabpa gobernantin Eglonta impuestuta paganampaq Ehudta mandayarqan. 16 Ehudqa ishkan lädupa afilashqa ishkë cuartatanö* espädata ruraskirmi, röpan rurimpa derëcha kaq chankanman watarkurqan. 17 Tsëpitanam Moabpa gobernantin Eglonta impuestuta entregarqan, Eglonqa alläpa wiram* karqan.
18 Impuestuta entreguëkurnam Ehudqa, pëwan ëwaq nunakunawan kutikurqan.* 19 Guilgalchö rumipita santukunata rurayanqan sitiuman chaskirnam,+ Ehudqa gobernanti Eglon kaqta yapë kutirqan. Y chëkurnam, “teytallë, juk asuntutam pakëllapa willënikita munä” nirqan. Tsënam gobernantiqa, “¡japalläkunata dejarayämë!” nirqan. Tsëmi llapan sirweqninkuna yarquriyarqan. 20 Y wayimpa altu kaq cuartunchö* gobernanti tëkaptinmi Ehudqa witikur, “qampaqmi Teyta Diospita juk willakuyta apamurqö” nirqan. Tsënö niptinmi gobernantiqa jamarëkanqampita sharkurqan. 21 Tsënam Ehudqa izquierda makinwan derëcha kaq chankampita espädata sutaramurqan, y Eglontam pachachö tuksïkurqan espädapa chakimpis pachanman illakanqanyaq. 22 Espädaqa chakintinmi pachanman yëkurirqan y wiranmi espädata tsaparirqan. Ehudqa manam gobernantipa pachampita espädata sutarqantsu, tsëmi ismanimpis yarqaramurqan. 23 Tsëpitanam Ehudqa altuchö këkaq cuartuta ruripa llävirkur, vientu yëkunan ventänapa qeshpir ëwakurqan. 24 Ehud ëwakushqanchönam gobernantipa sirweqninkuna kutiyarqan, y altuchö këkaq cuartuta segurashqata rikarmi, “mana achachaptinchi ruri cuartuchö imatapis rurëkan” niyarqan. 25 Gobernanti mana yarqamuptinmi alläpa yarpachakur lläviwan punkuta kichayarqan. ¡Patronninkunataqa wanushqatanam jitarëkaqta tariyarqan!
26 Pëkuna demorayanqanyaqnam, Ehudqa qeshpir ëwakur rumipita santukunata rurayanqan sitiupa pasarqan,+ y Seirä sitiumanmi sänu chärqan. 27 Tsëchönam, waqrapita trompëtata+ Efrainpa jirkankunachö tocarqan.+ Tsëmi israelïtakunaqa pëwan juntu jirkakunapita uräyarqan; y Ehudmi puntankunata ëwarqan. 28 Tsënam kënö nirqan: “Qepäta shayämuy, Teyta Jehovämi chikiyäshoqniki moabïta nunakunata makikikunaman churamushqa”. Tsënö niptinmi pëkunaqa qepanta ëwayarqan y moabïtakuna qeshpir mana ëwakuyänampaqmi Jordan mayuta* tsimpayänan sitiukunaman churanakuyarqan. Y manam jukllëllatapis tsimpananta dejayarqantsu. 29 Tsë kutim kallpayoq y valienti moabïta nunakunata diez milta wanutsiyarqan.+ Manam jukllëllapis qeshpirqantsu.+ 30 Tsënöpam moabïta nunakunaqa tsë junaqchö Israelpa poderninman churakäyarqan. Tsënömi tsë markakunachöqa ochenta watapa yamëna kawakuyarqan.+
31 Ehudpa qepanmannam Anatpa tsurin Samgar juez karqan,+ pëmi yapyarnin* törukunata qatiyänan fiërru puntayoq garrutiwan*+ seiscientus filisteukunata wanutsirqan;+ pëpis israelïtakunatam salvarqan.