Juëces
7 Tsënam Jerubaal niyanqan Gedeonqa+ llapan soldädunkunawan, patsapis manaraq waraptin ëwarqan, y Harod pukyu lädunchömi campamentunkuna rurayarqan. Madianïta soldädukunaqa, Morë jirka lädun pampachömi campamentunkuna rurashqa kayarqan, y tsëqa Gedeonwan soldädunkuna këkäyanqan norti läduchömi karqan. 2 Tsënam Jehovä Diosqa Gedeonta nirqan: “Mëtsika soldädukunayoqmi kanki. Tsëmi madianïta soldädukunata venciyänëkipaq yanapënikikunata puëdïtsu.+ Yanapapteqqa, capaz israelïtakunaqa, ‘kikïkunapa kallpäkunawanmi venciyarqö’+ nir alabakuyanqa. 3 Tsëmi soldädukunata ninëki, pelyaman ëwëta mantsaqkunaqa kutikuyänampaq”.+ Tsënö Gedeon niptinmi veintidos mil soldädukuna kutikuyarqan y diez mil-llam quedayarqan.
4 Tsënö kaptimpis, Teyta Jehoväqa kënömi Gedeonta nirqan: “Mëtsika soldädukunaran kan. Yaku kaqman urätsi y tsëchömi pëkunata pruëbaman churar alli akranëkipaq yanapashqëki. ‘Pëmi qamwan ëwanqa’ nipteqqa, qamwanmi ëwanqa. Peru, ‘pëqa manam qamwan ëwanqatsu’ nipteqqa, manam qamwan ëwanqatsu”. 5 Tsëmi Gedeonqa soldädukunata yaku kaqman urätsirqan.
Tsëpitanam Jehovä Diosqa Gedeonta nirqan: “Lätëkur yakuta upoq kaqkunata juk läduman raki, y mana qonqurillapa* makinkunawan yakuta upoq kaqkunatana juk läduman raki”. 6 Mana qonqurillapa makinkunawan yakuta upoq kaqkunaqa trescientus soldädukunam kayarqan. Wakinqa lätëkurmi yakuta upuyarqan.
7 Tsënam Jehovä Diosqa Gedeonta nirqan: “Yakuta makinkunawan upoq trescientus soldädullawanmi salvayashqëki y madianïta soldädukunata venciyänëkipaqmi yanapayashqëki.+ Wakinkunaqa wayinkunata kutikuyätsun”. 8 Tsëpitanam, wakin soldädukuna apayanqan mikuyta y waqrapita trompëtakunata trescientus soldädukunata entregariyaptin, Gedeonqa tsë wakin israelïtakunata kutikuyänampaq mandarqan. Y trescientus soldädullawanmi quedakurqan. Madianïta soldädukunapa campamentunkunaqa mas ura pampachömi* këkarqan.+
9 Tsë paqasmi Gedeonta Teyta Jehovä nirqan: “Pëkunawan pelyaq ëwë, noqam vencinëkipaq yanapashqëki.+ 10 Peru pëkunawan pelyëta mantsarqa, Purä jutiyoq sirwishoqnikiwan campamentunkunaman urë. 11 Parlëkäyanqanta wiyëkuptikim, pëkunawan pelyanëkipaq valorniki* yurinqa”. Tsënam Gedeonwan Puräqa, chikeqninkunapa campamentunkuna lädunyaq uräyarqan.
12 Madianïta soldädukuna, amalequïta soldädukuna y inti o rupay yarqamunan läduchö täkoqkunaqa,*+ entëru pampachömi* mëtsika chukllushkunanöraq* kayarqan. Camëllunkunaqa lamar kuchunchö arënanöran yupëtapis mana puëdipaq karqan.+ 13 Gedeon chänampaqqa, juk soldädum suëñunqanta soldädu mayinta kënö willëkarqan: “Këtam suëñukurqö. Cebädapita redondu tantam madianïta soldädukunapa campamentunman chunkakar yëkurqan y juk carpatam* chëkatsirqan. Fuertipa chëkatsiptinmi, tsë carpaqa ishkiskirqan”.+ 14 Tsënam soldädu mayinqa nirqan: “Clärum këkan, tsëqa israelïta Joaspa tsurin Gedeonpa+ espädanmi kanqa. Diosqa madianïta nunakunata y këchö llapan soldädukunata vencinampaqmi Gedeonta yanapanqa”.+
15 Tsë soldädu suëñukunqanta y tsë suëñu ima ninan kanqanta wiyëkurnam,+ Gedeonqa Teyta Diosta adoranampaq qonqurikurqan. Tsëpitanam israelïtakuna këkäyanqan campamentuman kutïkur nirqan: “¡Aku! Jehovä Diosmi madianïta nunakunata vencinapaq yanapamäshun”. 16 Tsënam, tsë trescientus soldädukunata kima grüpuman rakirirqan, y llapantam rurinchö aktsiyoq allpa mankata* y waqrapita trompëtata+ aptatsirqan. 17 Tsëpitanam nirqan: “Rikäyämanki y noqa ruranqänölla rurayanki. Campamentu lädunman chärir ruranqänö rurayanki. 18 Noqakuna waqrapita trompëtata tocayaptï, qamkunapis campamentupa entëru lädunchö waqrapita trompëtakunata tocayanki y fuertipa kënö niyanki: ‘¡Jehovä Diospa y Gedeonpa!’”.
19 Gedeon y pëwan këkaq cien soldädukunam, täpakoqkuna pullan paqasnö* turnuta cambiayänan höra, campamentu lädunman chäyarqan. Y waqrapita trompëtakunatam tocayarqan+ y këkätsiyanqan allpa mankakunatam pakir ushayarqan.+ 20 Tsënömi kiman grüpu soldädukunaqa, waqrapita trompëtankunata tocayarqan y allpa mankakunata pakiriyarqan. Izquierda makinkunawanmi aktsikunata altuchö katsiyarqan y derëcha makinkunawannam waqrapita trompëtakunata tocayarqan y fuertipam kënö niyarqan: “¡Jehovä Diospa y Gedeonpa espädan!”. 21 Tsënö nirmi campamentu lädunchö shëkar* quedakuyarqan, y chikeqnin soldädukunaqa llapanmi mantsakar qaparir qeshpir ëwakuyarqan.+ 22 Trescientus soldädukuna waqrapita trompëtakunata mana pärëpa toquëcayaptinmi, Teyta Jehoväqa tsë chikeqnin soldädukunata kikinkunapurata espädankunawan pelyanakatsirqan.+ Chikeqnin soldädukunaqa Bet-Sitäyaq y Zereräyaqmi qeshpir ëwakuyarqan, Tabat lädunchö këkaq Abel-Meholä+ pasëyaq.
23 Tsënam llapan israelïtakunapita, Neftalïpa kastankunata, Aserpa kastankunata y Manasespa+ kastankunata qayatsirqan. Y madianïta soldädukunatam qatipayarqan. 24 Gedeonqa Efrainpa llapan jirkankunapam willakoqninkunata kënö niyänampaq mandarqan: “Madianïta soldädukunata pelyar ushakätsinapaq uräyämuy. Y Jordan mayuta* tsimpana sitiukunaman y Jordanman chaq mayukunata tsimpana sitiukunaman, hasta Bet-Baräyaq churanakuyë”. Tsënö niptinmi Efrainpa kastankunaqa juntakäyarqan y Jordan mayuta tsimpana sitiukunaman y Jordanman chaq mayukunata tsimpana sitiukunaman, hasta Bet-Baräyaq churanakuyarqan. 25 Y Madianchö ishkaq dirigeqkuna Orebtawan Zeebtam prësuyarqan. Orebtam+ juk qaqachö wanutsiyarqan, tsë junaqpitam tsë qaqataqa Orebpa qaqan nir reqiyarqan. Y Zeebtanam vïnu rurayänan pözuchö wanutsiyarqan, tsë junaqpitam Zeebpa vïnu rurayänan pözu nir reqiyarqan. Madianïta nunakunataqa manam qatipëta dejayarqantsu.+ Orebpa y Zeebpa peqankunataqa o umankunataqa Gedeonmanmi apayarqan, pëqa Jordanchömi këkarqan.