Juëces
19 Israelchö gobernanti mana kanqan witsankunam,+ Efrainpa+ karu jirkankunachö ichik tiempullapa täkoq* levïta, juk warmita ashirqan sirweqnin y warmin* kanampaq. Tsë warmiqa Judächö këkaq Belen+ markapitam karqan. 2 Peru tsë warmiqa* jukwanmi engañarqan. Tsëpitanam Judächö këkaq Belen markaman papänin kaqman chusku killapa ëwakurqan. 3 Tsëmi tsë levïtaqa amishtayänampaq asheqnin ëwarqan (juk sirweqninwan y ishkë ashnunwanmi ëwarqan). Chäriptinnam tsë warmiqa papänimpa wayinman pasatsirqan, y papäninqa alläpam kushikurqan. 4 Tsëmi suegrunqa tsëchö kima junaq quedatsirqan. Mikur y upurmi kayarqan, y levïtaqa tsëchömi punurqan.
5 Chusku kaq junaqchönam patsapis manaraq waraptin ëwakuyänampaq sharkuyaptin, suegrunqa mashanta nirqan: “Manaraq ëwakur imallatapis mikuri, y tsëpitanam ëwakunki”. 6 Tsëmi jamëkur ishkan mikuyarqan y upuyarqan. Tsëpitanam suegrunqa mashanta nirqan: “Kë paqas quedakushun, këchö kushishqa kari”.* 7 Mashan ëwakunampaq sharkuptinnam, suegrunqa quedakunampaq yapë rogarqan, tsëmi pëqa tsë paqaspis quedakurqan.
8 Pitsqa kaq junaqchönam patsapis manaraq waraptin ëwakunampaq mashan sharkuptin suegrunqa, “manaraq ëwakur imallatapis mikuri” nirqan. Tsëmi tardiyanqanyaq ishkan mikur kayarqan. 9 Warminwan* y sirweqninwan mashan ëwakunampaq alistakuptinnam, suegrunqa nirqan: “Rikë, ampïrinnam o tsakärinnam.* Kanan paqaspis quedakuyë. Paqasyärinnam, këchö tranquïlulla quedakuy. Warënam tempränulla sharkur ëwakuyanki”.* 10 Tsënö niptimpis mashanqa mananam juk paqas masqa quedakuyta munarqannatsu. Tsëmi Jerusalen+ markayaq ëwarqan. Unëqa Jebus nirmi tsë markata reqiyaq. Sillashqa ishkan ashnunwan, warminwan* y sirweqninwanmi ëwakurqan.
11 Jebus markaman chëkäyaptinnam tardiyärirqan, tsëmi sirweqninqa patronninta nirqan: “¿Imanirtan jebuseu nunakunapa markanman yëkuntsiktsu kanan paqas tsëchö quedakunapaq?”. 12 Tsënam patronninqa kënö contestarqan: “Israelïtakuna mana kawayanqan juk nacionkunapa markanmanqa manam yëkushwantsu. Guibeä+ markayaqmi ëwanantsik”. 13 Tsëpitanam sirweqninta nirqan: “Apurashun, Guibeä markayaq o Ramä+ markayaq chänapaq. Mëqan markachö karpis tsëchömi waräshun”. 14 Tsëmi ëwar sïguiyarqan y Benjaminpa kastankunapa Guibeä markankunaman chäyänampaqqa tardinam karqan.
15 Guibeä markaman chëkurmi, tsë paqas tsëchö quedakuyänampaq pläzachö jamakuriyarqan, peru manam pillapis posadatsiyänampaq invitarqantsu.+ 16 Tsëchö këkäyaptinmi, juk awkin chakranchö trabajanqampita paqasna charqan. Pëqa Efrainpa+ jirkankunapitam karqan, y tsë kutiqa Guibeä markachömi juk tiempullapa këkarqan. Tsë markachö kawaqkunaqa Benjaminpa+ kastankunam kayarqan. 17 Tsë nunata pläzachö rikëkurmi tsë awkinqa tapurqan: “¿Mëpitataq shamuykanki y mëpatan ëwëkanki?”. 18 Pënam nirqan: “Judächö këkaq Belen+ markapitam shamuykäyä y Efrainpa karu jirkankunatam ëwëkäyä, tsëpitam kä. Belen markatam ëwarqä y kananqa Jehovä Diosta adorayanqan wayitam* ëwëkä. Peru manam pillapis posadatsimänampaq nimashqatsu. 19 Ashnükunapaqqa+ atskam päjäkuna y qewapis kan. Y noqapaqpis, warmipaqpis y sirwimaqnïkunapaqpis tantawan+ vïnuqa kanmi. Manam imäkunapis pishintsu”. 20 Tsënam awkinqa nirqan: “¡Allim ëwakamurqunki!* Noqanam imapis pishinqantaqa churamushaq. Ama kë pläzachöqa warëtsu”. 21 Tsëmi awkinqa tsë nunata wayinman pusharqan, y ashnunkunatapis qararqanmi. Pëkunanam chakinkunata yakuwan awikuyarqan,* tsëpitanam mikuyarqan y upuyarqan.
22 Tsënö kushishqa këkäyaptinmi, tsë markachö melanëpaq wakin ollqukunaqa tsë wayipa entërunman churakäyarqan y punkuta takar qallëkuyarqan. Wayiyoq awkintam niyarqan: “¡Posadatsinqëki nuna yarqamutsun, pëwanmi warmïkunawannö* këta munayä!”.+ 23 Tsënam wayiyoq awkinqa waqtaman yarquskir kënö nirqan: “Ama wawqilläkuna. Tsë melanëpaq rurëtaqa ama rurëkuyëtsu. Kë nunaqa wayïchömi posadakuykan, ama tsë penqakuypaq mana allitaqa rurëkuyëtsu. 24 Këchömi ollquwan manaraq kashqa wamrä këkan y kë nunapa warmimpis.* Qamkuna munayaptikiqa, pëkunawan kayänëkipaq* apëkamushaq.+ Kë nunataqa ama tsë penqakuypaq mana allita rurëkuyëtsu”.
25 Tsënö nikaptimpis tsë nunakunaqa manam cäsuyarqantsu. Tsëmi tsë levïtaqa warminta pëkunata entreguëkurqan.+ Tsënam pëkunaqa patsa waranqanyaq violayarqan y imëka mana allita rurayarqan. Patsa atsikyar qallëkuptinran ëwakunampaq dejayarqan. 26 Tsë warmiqa tempränullam, patronnin posadakunqan awkimpa wayinman charqan, y punkuchö ishkirirmi shärirqannatsu. 27 Patronninqa ëwakunampaqmi punkukunata tempränulla kicharqan, tsënam warminta* rikëkurqan punkupita tsarapakushqa jitarëkaqta. 28 Tsënam, “sharkuy, aku ëwakushun” nirqan. Y warmiqa manam contestarqantsu. Tsënam nunaqa, warmita ashnunman cargarkur ëwakurqan.
29 Wayinman chëkurnam, juk cuchilluwan* warmimpa* ayanta döci pedäzuman roqurqan. Tsëpitanam Israelchö cada kastaman juk pedäzuta apatsirqan. 30 Tsëta llapan rikaqkunam kënö niyarqan: “Israelïtakuna Egiptupita yarqayämunqan junaqpitaqa, manam ni imëpis kënö pasakunqantaqa rikarquntsiktsu. Kë asuntuta alli rikäyë, y shumaq parlëkur+ imata rurayänäpaq kaqta niyämë”.