Juëces
21 Israelïtakunaqa Mizpä+ markachömi kënö nir änikushqa kayarqan: “Manam mëqantsikpis warmi wamrantsikkunata Benjaminpa+ kastankunawanqa casatsishuntsu”. 2 Tsënö nishqa karmi llapan israelïtakuna Betel+ markaman ëwar Teyta Diospa rikëninchö alläpa waqarnin tardiyanqanyaq kayarqan. 3 Kënömi niyaq: “Israelpa Diosnin, Jehovä Dioslläkuna, ¿imanirtan Israelchöqa kë pasakushqa? ¿Imanirtan Israelchö juk kasta ushakashqa?”. 4 Waränin junaqnam israelïtakuna tempränulla shärikuyarqan, y juk altartam rurayarqan pishtashqa animalkunata y Teyta Dioswan amïgu kayanqanta rikätsikoq qarëkunata+ rupatsiyänampaq.
5 Tsënam israelïtakunaqa niyarqan: “Israel kastakunapitaqa, ¿mëqan kastataq Jehovä Diospa rikëninchö noqantsikwan juntakänampaq Mizpäman witsämushqatsu?”. Jehoväpa rikëninchö juntakäyänampaq Mizpä markaman mana witsaqtaqa, wanutsiyänampaqmi Teyta Diospa jutinchö parlashqa kayarqan. 6 Israelïtakunaqa, wawqinkuna Benjaminta pasanqampita alläpa llakikurmi kënö ninakuyarqan: “Kanan junaqmi Israelchö juk kasta ushakashqa. 7 Kananqa, kawëkar quedaq Benjaminpa kastankunapaqqa, ¿mëpitaraq warminkuna ashishun? Noqantsikqa Jehovä Diospa jutinchömi änikurquntsik+ pëkunawan warmi wamrantsikkunata mana casatsinapaq”.+
8 Tsëpitanam kënö tapunakuyarqan: “Mizpä+ markachö juntakanqantsik junaqqa, ¿mëqan kasta nunakunatan Teyta Jehoväpa rikëninman shayämushqatsu?”. Y musyariyarqanmi campamentuman Jabes-Galaapita ni pillapis mana witsashqa kanqanta. 9 Nunakunata yupayaptinmi, Jabes-Galaadchö nunakunapitaqa ni jukllëllapis karqantsu. 10 Tsëmi israelïtakunaqa alli pelyaq döci mil soldädunkunata mandayarqan kënö nir: “Ëwayë y Jabes-Galaadchö llapan nunakunata wañutsiyë, warmitapis y wamratapis espädawan wanutsiyë.+ 11 Llapan ollqukunata wanutsiyë, tsënölla ollquwan kashqa llapan warmikunatapis wanutsiyë”. 12 Tsëmi ollquwan manaraq kashqa cuatrocientus warmikunata Jabes-Galaad markachö tariyarqan. Y Silö+ markachö campamentunkuna këkanqanmanmi apayarqan, tsëqa Canaanchömi karqan.
13 Tsëpitanam, Rimon jirkachö+ qaqakuna këkaqchö Benjaminpa kastankunaman, amishtayänampaq israelïtakuna willakoqkunata mandayarqan. 14 Tsëmi Benjaminpa kastankunaqa kutiyarqan. Y israelïtakunaqa Jabes-Galaad+ markachö kawëkaqta dejayanqan warmikunatam pëkunata entregayarqan. Peru manam llapampaqtsu warmikunata tarishqa kayarqan. 15 Israelïtakunaqa alläpam llakikuyarqan Israel kastakunapita Benjaminpa+ kastankunata Jehovä Dios rakishqa kaptin. 16 Tsëmi israelïtakunata dirigeqkuna kënö ninakuyarqan: “Benjaminpa kastampita warmikunataqa soldädukunam llapanta ushakätsiyashqa. ¿Mëpitaraq warmikunata ashishun mana warmiyoq ollqukunapaq?”. 17 Tsënam wakinkuna kënö niyarqan: “Israelchö juk kasta mana ushakärinampaqqa Benjaminpa kastankunapita kawëkar quedaqkunam herenciankunachö kayänan. 18 Peru noqantsikqa kënömi nirquntsik: ‘Benjaminpa kastankunata juk warmin entregaq kaqqa pï karpis maldecishqa katsun’. Tsëmi noqantsikqa warmi wamrantsikkunata pëkunawan casatsita puëdintsiktsu”.+
19 Tsëpitanam kënö niyarqan: “Llapan watakunam Betel markapa norti lädunchö këkaq Silö+ markachö Jehovä Diospaq juk fiestata rurayan. Tsëqa këkan Betelman y Siquem markaman witsaq jatun nänipa inti o rupay yarqamunan lädunmampam y Lebonä sitiupa sur lädunchö”. 20 Tsëmi Benjaminpa kastankunata kënö niyarqan: “Ëwayë, y üvas plantakuna rurinman yëkuskir upällalla shuyaräyë. 21 Y Silö markachö shipashkuna* tushoq yarqarayämuptin, üvas plantakunapita yarqur cada ünu juk shipashta warmikikuna kanampaq apakuyë. Y Benjaminpa kastankunapa markankunaman kutikuyanki. 22 Shipashkunapa papäninkuna o turinkuna noqakunaman quejakoq shayämuptinqa kënömi niyäshaq: ‘Guërrata rurayanqächöqa, manam llapankunapaqtsu warminkuna tariyarqö.+ Y qamkunaqa manam änikuyanqëkita mana kaqpaq churëkur, wamrëkikunawan casatsita puëdiyankimantsu karqan. Tsëmi yanapëkayämänëkipaq rogakuyaq’”.+
23 Tsëmi Benjaminpa kastankunaqa niyanqanta rurayarqan. Dancëkaq warmikunaman ëwëkurmi cada ünu jukta apakurqan warmimpaq. Tsëpitanam chaskiyanqan markankunaman kutikuyarqan, y tsë markakunata yapë sharkatsirmi+ tsëchö kawakuyarqan.
24 Tsënam israelïtakunaqa Silöpita cada ünu kastankunaman y familiankunaman kutikuyarqan. Cada ünum chaskiyanqan markakunaman kutikuyarqan.
25 Tsë witsankunaqa manam Israelchö gobernanti karqantsu.+ Cada ünum munayanqanmannö imatapis rurakuyaq.