Rut
3 Tsëpitanam suegran Noemïqa, Rut-ta kënö nirqan: “Hïja, alli kawakunëkipaqmi qowëki o runëki* ashimushaq.+ 2 Boazqa familiantsikmi.+ Y cosëchachö qamwan trabajaq warmikunaqa sirweqninkunam kayan. Boazqa kanan paqasmi ërachö* cebädata wawyanqa o wayranqa. 3 Tsëmi bañakuskir shumaq pukutaq o mushkoq aceitita jichakunëki, y mas alli kaq röpëkita vistikurkurmi ëraman ëwanëki. Peru mikur y upur ushanqanyaq, ama rikäshunëkita dejankitsu. 4 Punoq ëwakuptinqa, më läduchöpis patsäkunqanta rikanki. Tsëpitana ëwëkur qatanta chakin kaqpa qarirkapunki y wak lädunman witikurir patsäkurinki. Tsënam pëqa imata ruranëkipaqpis nishunki”.
5 Y Rutnam, “llapan nimanqëkitam rurashaq” nirqan. 6 Tsënam ëraman urärir suegran llapan ninqanta rurarqan. 7 Boazqa mikur y upurmi kushishqa këkarqan. Tsëpitanam qoturëkaq gränu kuchunman ëwar punurirqan. Tsënam Rutqa yachëllapa ëwar qatanta chakin kaqpa qarirkapurqan, y ichik witikurirmi patsäkurqan. 8 Pullan paqasnam Boazqa alalätsikur katatar qallëkurqan. Y sharkamurmi chakimpa wak lädunchö juk warmi punuykaqta rikëkurqan. 9 Tsënam, “¿pitan kanki?” nir tapurqan. Warminam nirqan: “Sirwishoqniki Rutmi kallä. Qammi familiä kallanki. Tsëmi yanapëkamänëkipaq* rogakoq shallämurqö”.+ 10 Y Boaznam nirqan: “Teyta Jehovämi bendicishunki hïja, alläpa kuyakoq karnin kanan ruranqëkiqa, puntata ruranqëkipitapis masran.+ Qamqa manam rïcuta kar o waktsata karpis juk jövintatsu majëkipaq ashirqunki. 11 Kananqa hïja ama yarpachakuytsu. Llapan nimanqëkitam rurashaq.+ Alli warmi kanqëkitaqa kë markachö llapankunam musyayan. 12 Noqa yanapënikita puëdiptïpis,+ kanran qowëkipa o runëkipa* juk legïtimu familian yanapashunëkipaq.+ 13 Kë paqasqa këllachö quedakuy. Y patsa waräriptin pë yanapashuptikiqa, allim kanqa.+ Peru mana munaptinqa, Teyta Jehoväpa jutinchömi neq noqa yanapanaqpaq kaqta. Kananqa patsa waranqanyaq tsëllachö punukuy”.
14 Tsëmi Rutqa chakimpa wak lädunllachö patsa waranqanyaq punukurqan. Tsëpitanam ni pï mana reqinampaq patsa manaraq waraptin shärikurqan. Y Boazqa manam munarqantsu juk warmi ëraman ëwashqa kanqanta ni pï musyananta. 15 Y Rut-tam nirqan: “Aqshurëkanqëki* jakuta mashtëkur tsarämuy”. Jakunta mashtariptinnam, joqta medïda* cebädata winapurqan. Tsënö qarëkurnam Boazqa markaman kutikurqan.
16 Tsëpitanam Rutqa kutikurqan, chäriptinnam suegranqa, “hïja, ¿ima nishurqunkitan?” nir tapurqan. Tsënam Rutqa Boaz llapan ninqanta willarqan. 17 Kënömi nirqan: “‘Ama suegrëkiman jinëllaqa kutitsu’ nirmi kë joqta medïda cebädata qaramashqa”. 18 Tsënam Noemïqa nirqan: “Kananqa hïja, tsë asuntuta altsamunqanyaq shuyarë. Pëqa manam kanan junaq jamanqatsu tsë asuntuta altsanqanyaq”.