Rut
4 Tsënam Boazqa Belen markapa punkunyaq witsarqan+ y tsëchömi jamakurqan. Tsënam Rutpa qowampa o runampa*+ mas legïtimu familianta pasëkaqta rikar, “amïgu, shamuy, këman jamakamuy” nirqan. Tsëmi tsë nunaqa ëwarnin jamakurqan. 2 Tsënam Boazqa Belen markachö chunka dirigentikunata qayëkatsir,+ “këman jamakayämuy” nirqan. Y pëkunanam jamakuriyarqan.
3 Tsënam Boazqa Elimëlecpa familianta+ kënö nirqan: “Moabpita+ kutimushqa Noemïmi, wawqintsik Elimëlecpa+ chakranta rantikunqa. 4 Tsëmi, marka mayintsikkunapa y markantsikchö dirigentikunapa rikëninchö+ chakranta rantikurkunëkipaq willaqniki shamurqö. Rantita munarqa rantikurkuy, peru rantita mana munarqa willëkamë. Qampa qepëkimanqa noqam rantinäpaq derëchuyoq kä”. Tsënam tsë nunaqa, “noqam rantishaq” nirqan.+ 5 Tsënam Boazqa nirqan: “Noemïpa chakranta rantirqa, Moabpita viudayashqa lumtsuynin Rutpa chakrantapis rantinëkim, tsënöpa wanushqa nunapa herencian familiampa makinchö sïguinampaq”.+ 6 Tsëta niptinmi tsë nunaqa nirqan: “Manam rantita puëdïtsu. Rantirqa kikïpa herenciätam ushakäratsishaq. Derëchüwan qam rantikurkuy, noqaqa manam puëdishaqtsu”.
7 Unë witsanqa Israel nacionchö kë costumbrim kaq: pï karpis familiampa chakranta o imantapis rantinampaq derëchuyoq këkar rantita mana munar y derëchunta jukta pasëkuyta munarqa, chakinchö këkaq juknin llanqintam+ rantita munaq kaqta entreguëkoq. Tsënömi Israelchöqa tsënö asuntuchö acuerduman chäyaq. 8 Tsëmi tsë chakrata rantinampaq derëchuyoq nunaqa juknin llanqinta Boazta entreguëkur, “qam rantikurkuy” nirqan. 9 Tsënam Boazqa dirigentikunata y tsëchö llapan këkaqkunata kënö nirqan: “Qamkunam kanan rikëkäyanki,+ Elimëlecpa llapan kapunqanta y Kilionpa y Mahlonpa llapan kapunqanta Noemïpita rantikanqäta. 10 Y Mahlonpa viuda warmin Rutwanmi casakushaq, tsënöpa wanushqa nunapa herencian familianchö sïguinampaq+ y kastankuna y marka mayinkuna jutinta mana qonqayänampaq. Tsëtam qamkuna kanan rikëkäyanki”.+
11 Tsënam markapa punkunchö llapan këkaqkuna y dirigentikuna niyarqan: “Awmi, ¡rikëkäyämi! Kanan casakuykanqëki warmita Jehovä Dios bendicïkullätsun Raquelnö y Leanö kanampaq, pëkunapitam Israel nacion yurirqan.+ Efratachö+ imëkayoq këkullë y jutikipis* Belenchö+ respetashqa katsun. 12 Y Teyta Jehoväpa bendicionninwan tsë warmichö yureq wamrëkikunawan,+ Tamarpa y Judäpa wamran Përezpa+ familiannö familiëki mëtsika këkutsun”.
13 Boazqa Rutwanmi casakurqan. Y Jehovä Dios permitiptinmi, Rutqa Boazpa tsurinta qeshyaq tikrarirqan, y juk wamranmi yurirqan. 14 Tsënam warmikunaqa Noemïta kënö niyarqan: “Japallëkita mana dejarishoqniki Teyta Jehovä alabashqa këkullätsun. ¡Israelchö pëpa jutimpaq parlayätsun! 15 Kë wamraqa* alläpa kuyashoqniki+ lumtsuynikipa wamranmi. Pëmi kallpëkita yapë yuritsinqa y chakwanyënikichömi cuidashunki. Lumtsuyniki Rutqa qanchis wamrapitapis mas allim”. 16 Tsëmi Noemïqa wamrata mellqarkurqan y cuidaqninmi karqan. 17 Tsënam vecïnankunaqa, “Noemïpam juk wamran yurishqa” niyarqan. Y wamrapa jutinqa, Obed+ nirmi churayarqan. Pëmi Jesëpa+ papänin karqan y Jesënam Davidpa papänin karqan.
18 Këkunam Përezpa kastankuna kayan: Përezmi+ Hezronpa+ papänin karqan; 19 Hezronnam Rampa papänin karqan; Ramnam Aminadabpa+ papänin karqan; 20 Aminadabnam+ Nahsonpa papänin karqan; Nahsonnam Salmonpa papänin karqan; 21 Salmonnam Boazpa papänin karqan; Boaznam Obedpa papänin karqan; 22 Obednam Jesëpa+ papänin karqan y Jesënam Davidpa+ papänin karqan.