Rut
2 Tsë markachömi, Noemïpa qowan o runan* Elimëlecpa familian täkurqan.* Boazmi+ jutin karqan y rïcu nunam karqan.
2 Rutmi Noemïta nirqan: “¿Manatsuraq seguëkäyanqan chakrakunaman ëwarïman segaqkunapa qepanchö pallapakamunäpaq?+ Capaz pillapis llakipäramanman”. Noemïnam, “ëwë hïja” nirqan. 3 Tsënam Rutqa ëwarqan y trabajëkaqkunapa qepanchömi pallapakur qallëkurqan. Peru manam musyarqantsu Boazpa+ chakranman chashqa kanqanta, pëqa Elimëlecpa+ familianmi karqan. 4 Tsë höram Boazqa Belen markapita chärirqan, y trabajaqninkunatam, “qamkunawan Jehovä Dios këkullätsun” nirqan. Pëkunanam, “Jehovä Dios bendicïkushuy” niyarqan.
5 Tsënam Boazqa, trabajaqninkunapa mandaqnin jövinta kënö tapurqan: “¿Pitan taqë warmiqa? ¿Ima familiatan?”. 6 Trabajaqkunata mandaq jövinnam nirqan: “Pëqa Moabpita+ Noemïwan+ ëwakamoq warmim. 7 Trabajaqkuna shikwapakuyanqan espïgakunata pallapakunampaqmi rogakamashqa.+ Tempränu chämunqampitam mana jamëpa trabajashqa, tsëran ichik jamarinampaq ramädaman ëwashqa”.
8 Tsëpitanam Boazqa Rut-ta nirqan: “Hïja, ama juk chakrakunaman pallapakoq ëwankitsu, y ama këpita ëwakunkitsu. Noqapaq trabajaq warmikunawan quedakunki.+ 9 Më chakrachö cosechëkäyanqantapis alkäbu kanki y pëkunawan ëwanki. Jövinkunatam cläru nirqö mana fastidiayäshunëkipaq. Yakunarqa, baldikuna churarëkaqman ëwanki y jövinkuna chaqayämunqan yakuta upunki”.
10 Tsënö niptinmi Rutqa patsamampis urkun chanqanyaq qonqurikurqan y kënö nirqan: “¿Imanirtan yanapamanki, y imanirtan forastëra warmi këkaptïpis noqalläpaq alläpa yarpachakunki?”.+ 11 Boaznam kënö nirqan: “Majëki wanunqampita suegrëkita imanö yanapanqëkita, y papänikita, mamëkita y markëkita dejëkur mana reqinqëki markaman täkoq* ëwakamunqëkitam willayämashqa.+ 12 Tsëkunata ruranqëkipitam Jehovä Dios bendicïkushunki.+ Israelpa Diosnin Jehoväta cuidashunëkipaq* ashinqëkipitam alli päguta pëpita chaskinki”.+ 13 Rutnam nirqan: “Gracias teytallë. Qamqa alli nunam kanki, y sirwishoqniki mana këkaptïpis shumaq parlapämarmi kushiratsimarqunki”.
14 Mikuyänan höranam Boazqa Rut-ta nirqan: “Witikamuy mikunapaq, y kë tantëki vinagriman tullpurkur mikuri”. Tsënam pëqa trabajaqkunapa lädunman jamakurqan. Y Boazqa ankashqa trïgunmi makyarqan y pënam pachan juntanqanyaq uchurqan, y trïgunqa sobrapurqanran. 15 Rut pallapakoq kutiptinnam,+ Boazqa trabajadorninkunata kënö nirqan: “Manöjukuna këkanqanchö pallapakunantapis dejayanki y ama fastidiayankitsu.+ 16 Seguëkarpis aptayanqëki wakin espïgakunata pallapakunampaq shikwatsiyanki. Ama michäyankitsu”.
17 Rutqa tardiyanqanyaqmi pallapakurqan.+ Y pallapakunqan espïgakunata takariptinqa, trëci kïlusnömi* cebädan yarqurqan. 18 Tsënam pallapakunqanta aparkur wayinman kutikurqan, chärirnam suegranta rikätsirqan. Y pachan juntariptin sobrapunqan ankashqa trïgutapis chätsirqanmi.+
19 Suegrannam kënö tapurqan: “¿Mëchötan kanan junaq pallapakurqunki? ¿Mëchötan trabajarqunki? Llakipäshoqniki* nunata Teyta Dios bendicïkullätsun”.+ Tsëmi Rutqa mëchö trabajashqa kanqanta willarqan. Kënömi nirqan: “Kanan junaqqa Boaz jutiyoq nunapa chakranchömi trabajarqö”. 20 Tsënam Noemïqa nirqan: “Kawëkaqkunata y wanushqa o wañushqa kaqkunata imëpis kuyëpa rikaq* Teyta Jehovä bendicïkullätsun.+ Tsë nunaqa familiantsikmi.+ Pëqa puëdinmi chakrantsikkunata rantita”.+ 21 Rutnam kënö nir willarqan: “Kënömi nimashqa: ‘Llapan cosëchata ushayanqanyaq trabajaqnïkunapa lädunllachö pallapakunki’”.+ 22 Noemïnam lumtsuynin Rut-ta nirqan: “Awmi hïja, mas alliqa kanqa Boazpaq trabajaq warmikunawan ëwanqëkim. Tsënöpam juk chakrakunachö fastidiayäshunkitsu”.
23 Tsënömi Rutqa, Boazpaq trabajaq warmikunapa lädunchö pallapakurqan cebäda+ cosëcha y trïgu cosëcha ushanqanyaq. Y suegranwanmi kawakurqan.+