1 Samuel
6 Jehovä Diospa Sagrädu Cäjantaqa,+ qanchis killapam filisteu nunakuna markankunachö katsiyarqan. 2 Tsëpitanam sacerdötikunata y suerti qateqkunata+ qayëkatsir kënö tapuyarqan: “¿Imataraq rurayäshaq Jehoväpa Sagrädu Cäjanwan? ¿Imanöraq sitiunman kutitsiyäman?”. 3 Pëkunanam niyarqan: “Israelïtakunapa Diosnin Jehoväpa Sagrädu Cäjanta kutitsita munarqa, qarëyoqtam kutitsiyänëki. Jutsëkikunapita* perdonayäshunëkipaqmi qarëta apatsiyänëki.+ Tsëta rurarllam kachakäyanki, y imanir Dios castigayäshunqëkitam musyayanki”. 4 Tsënam tapuyarqan: “¿Ima qarëtaraq apatsiyäman jutsäkunapita?”.* Pëkunanam kënö niyarqan: “Filisteukunata gobernaqkunaqa pitsqam kayan,+ qamkuna y pëkunapis tsë castïgullatam pasayarqunki. Tsëmi örupita rurashqa pitsqa tumorkunata* y örupita rurashqa pitsqa ukushkunata apatsiyänëki. 5 Entëru nacionta ushakëkätseq tumorkunatawan* ukushkunatam+ örupita rurayänëki, y Israelpa Diosnintam respetayänëki. Capazchi tsëqa qamkunata ni diosnikikunata castigayäshunkinatsu, ni murukuyanqëkitapis ushakätsinqanatsu.+ 6 ¿Imanirtaq Egiptuchö gobernaqnö y egipciu nunakunanö rumi shonqu këta munayanki?+ Pëkunaqa, Israelpa Diosnin fuertipa castiguëkuptinraqmi+ israelïtakuna ëwakuyänanta dejayarqan.+ 7 Kananqa mushoq carrëtata rurayë, y imëpis mana yügushqa* wawayoq ishkë wäkakunata apayämuy. Tsëpitana yügurkur sutayänampaq carrëtata watarkuyë y wawankunataqa corralman kutïkatsiyë. 8 Y carrëtamanna Jehoväpa Sagrädu Cäjanta churayë y lädunmanna, jutsallakuyanqëkipita* örupita qarëkunata juk cäjaman winarkur churayë.+ Tsëpitana ëwakunampaq dejariyë 9 y rikaräyë. Bet-Sëmes+ nänipa markanman witsaptinqa, Israelpa Diosninmi castigamarquntsik. Peru juk nänipa ëwaptinqa manam Israelpa Diosnintsu castigamarquntsik, sinöqa casual-llam pasakushqa”.
10 Tsënam tsë nunakunaqa niyanqanta rurayarqan. Wawayoq ishkë wäkakunata yüguskirmi carrëtaman watariyarqan, y wawankunataqa corralmanmi kutïkatsiyarqan. 11 Tsëpitanam Jehovä Diospa Sagrädu Cäjanta carrëtaman churayarqan, y lädunmanmi örupita rurashqa ukushkunata y örupita rurashqa tumorkunata* juk cäjawan churayarqan. 12 Tsënam wäkakunaqa Bet-Sëmesman+ ëwaq nänipa derëchu ëwakuyarqan. Näniyoqllam waqar ëwayarqan. Y filisteukunapa gobernaqninkunaqa qepantam ëwayarqan Bet-Sëmes markapa lindërunyaq. 13 Bet-Sëmes markachö kawaqkunaqa, ura pampachömi* trïgu cosëchachö këkäyarqan. Y Sagrädu Cäjata rikëkurqa alläpam kushikuyarqan. 14 Carrëtata sutaq wäkakunaqa, betsemïta Josuëpa chakranman yëkurirmi, jatun rumi lädunchö quedariyarqan. Tsënam pëkunaqa wäkakunata+ pishtayarqan y Jehovä Diospaq rupatsiyänampaqmi tsë carrëtata tseqtayarqan.
15 Levïta nunakunam+ Jehoväpa Sagrädu Cäjanta y öruyoq cäjata carrëtapita jatun rumi jananman churarkuyarqan. Tsë junaqmi Bet-Sëmes+ markachö nunakunaqa Jehovä Diospaq pishtashqa animalkunata rupatsiyarqan y mas qarëkunata apayarqan.
16 Tsëta rikëkurnam filisteukunapa pitsqan gobernaqninkunaqa tsë junaqlla Ecron markata kutikuyarqan. 17 Filisteukunaqa jutsankunapitam*+ örupita rurashqa tumorkunata* Jehovä Diospaq qarëta apatsiyarqan: Asdod+ markapa jutinchö jukta, Gäza markapa jutinchö jukta, Asquelon markapa jutinchö jukta, Gat+ markapa jutinchö jukta y Ecron+ markapa jutinchö jukta. 18 Örupita rurashqa ukushkunataqa, filistëa markakuna ëka kanqanmannömi apatsiyarqan (alli murallashqa markakuna y caserïukuna kanqanmannö). Tsë markakunachöqa pitsqaq gobernaqkunam mandakuyaq.
Teyta Jehoväpa Sagrädu Cäjanta churayanqan jatun rumiqa yarpäyänampaqmi, betsemïta Josuëpa chakranchö kananyaq quedashqa. 19 Bet-Sëmes markachö ollqukunataqa Sagrädu Cäjata rikäyanqampitam Jehovä Diosqa wanutsirqan o wañutsirqan. Cincuenta mil setenta ollqukunatam* ushakätsirqan. Y mëtsikaqta Jehovä ushakätsishqa kaptinmi, tsë markachö kawaqkunaqa wanoqkunapaq alläpa waqayarqan.+ 20 Bet-Sëmes markachö ollqukunaqa kënömi niyarqan: “¿Piraq Jehovä Diospa puntanchö këta puëdinman? Pëqa alläpa limpiu Diosmi.+ ¿Mëmanraq apatsishun Diospa Sagrädu Cäjanta?”.*+ 21 Tsëmi Quiryat-Jearim+ markachö nunakunaman willakoqkunata mandayarqan kënö niyänampaq: “Filisteu nunakunam Jehovä Diospa Sagrädu Cäjanta kutitsiyämushqa. Shayämuy apakuyänëkipaq”.+