1 Samuel

7 Tsënam Quiryat-Jearim markapita ollqukunaqa, Jehovä Diospa Sagrädu Cäjanta jirkachö täkoq* Abinadabpa+ wayinman apatsiyarqan. Y tsurin Eleazartam Jehoväpa Sagrädu Cäjanta cuidanampaq churayarqan.*

2 Quiryat-Jearim markaman Teyta Diospa Sagrädu Cäjanta chätsiyanqampitaqa veinti watanam pasashqa karqan. Y llapan israelïtakunam alläpa llakikur Jehovä Diosman yanapanampaq rogakuyarqan.+ 3 Tsëmi Samuelqa israelïtakunata nirqan: “Teyta Jehoväta rasumpa sirwita munarqa,+ adorëkäyanqëki juk nacionkunapa santunkunata+ y Astoret*+ santukunata ushakätsiyë. Y llapan shonquykikunawan Teyta Jehovällatana kuyayë y pëllatana sirwiyë,+ tsëmi filisteu nunakunapita salvayäshunki”.+ 4 Tsënam israelïtakunaqa, Baal* santukunata y Astoret santukunata ushakäratsir Jehovä Diosllatana sirwir qallëkuyarqan.+

5 Tsëpitanam Samuelqa nirqan: “Llapan israelïtakunata Mizpä+ markaman qayatsiyämuy. Tsëchömi qamkunapaq Teyta Jehoväman mañakamushaq”.+ 6 Tsëmi Mizpä markachö juntakëkur, yakuta chaqarkur Jehovä Diospa rikëninchö patsaman jichayarqan. Tsë junaqqa manam imatapis mikuyarqantsu,+ y kënömi niyarqan: “Teyta Jehovä jutsatam* rurëkuyarqö”.+ Tsë junaqpitam Samuelqa juez karqan,+ y Mizpä markachömi israelïtakunapa problëmankunata arreglaq.

7 Filisteukunapa gobernaqninkunaqa,+ israelïtakuna Mizpä markachö këkäyanqanta musyëkurmi pelyayänampaq ëwayarqan. Tsëta musyarirnam israelïtakunaqa alläpa mantsakäyarqan. 8 Tsëmi Samuelta niyarqan: “Yanapamänapaq y filisteu soldädukunapita salvamänapaq, Jehovä Diosnintsikman mañakuyta ama dejëkullëtsu”.+ 9 Tsënam Samuelqa juk ashkashta pishtëkur Jehovä Diospaq rupatsirqan.+ Samuelqa israelïtakunata yanapëkunampaqmi Teyta Jehoväman mañakurqan y Jehoväqa wiyarqanmi.+ 10 Pishtashqa ashkashta Samuel rupëkätsiptinmi, filisteu soldädukunaqa israelïtakunawan pelyaq yëkuyarqan. Tsë junaqmi Jehovä Diosqa ciëluchö räyukunata feyupa janrarätsirqan,+ tsëmi filisteu soldädukunaqa mantsakar imanö këtapis puëdiyarqantsu,+ y israelïtakunam venciyarqan.+ 11 Tsënam israelïta ollqukunaqa Mizpä markapita yarqurir, wanutsir wanutsir filisteu soldädukunata qatipayarqan hasta Bet-Car sitiupa wak* lädunyaq. 12 Tsëpitanam Samuelqa kënö nirqan: “Kananyaqmi Jehovä Dios yanapamarquntsik”.+ Tsënö nirmi Mizpä markawan Jesanä sitiu tinkoqchö juk rumita churarir+ Ebenëzer* nir jutin churarqan. 13 Tsënömi filisteukunataqa venciyarqan. Pëkunaqa mananam israelïtakunapa markankunaman yëkuyarqannatsu.+ Samuel kawanqanyaqqa,+ Jehovä Diosqa manam permitirqantsu israelïtakunata filisteu nunakuna atacayänanta. 14 Y Ecronpita hasta Gatyaq filisteukuna katsiyanqan markakuna y lädunchö sitiukunaqa yapëmi israelïtakunapana karqan.

Israelïtakunawan amorreu nunakunaqa tranquïlum kawakuyarqan.+

15 Samuelqa, wanukunqanyaqmi israelïtakunapa jueznin karqan.+ 16 Betel,+ Guilgal+ y Mizpä+ markakunapam cada wata watukakoq ëwaq y tsë markakunachömi israelïtakunapa problëmankunata arreglaq. 17 Tsëpitanam Ramä+ markaman kuteq, tsëchö wayin kaptin. Tsëchöpis israelïtakunapa problëmankunatam arreglaq. Y Jehovä Diospaqmi juk altarta Ramä markachö perqarqan.+