1 Samuel
8 Samuel awkinyärirqa, tsurinkunatam Israelchö juez kayänampaq churarqan. 2 Mayor tsurimpaqa Joelmi jutin karqan y qateqninpanam Abïas+ karqan. Ishkampis Beer-Sëba markachömi juez kayarqan. 3 Pëkunaqa manam papäninnötsu alli juez kayarqan. Sinöqa imëkayoq këta munarmi mana allikunata rurayaq+ y jukpa favornin kayänampaqmi imëkata chaskipakuyaq.*+
4 Tiempuwannam israelïtakunata dirigeqkunaqa juntakëkur Ramä markaman Samuel kaqta ëwayarqan. 5 Kënömi niyarqan: “Qamqa awkinnam kanki, y wamrëkikunaqa manam qam ruranqëkinötsu imatapis rurayan. Tsëmi wakin nacionkunapanö gobernantïkuna kanampaq, juk gobernantïkuna* churamunëkita munayä”.+ 6 “Gobernantïkuna churamunëkitam munayä” niyaptinmi Samuelqa cölerarqan.* Tsëmi Teyta Jehoväman mañakurqan. 7 Y Jehovä Diosnam kënö nirqan: “Llapan niyäshunqëkita rurë, manam qamtatsu despreciëkäyäshunki, sinöqa noqatam, pëkunaqa manam munayantsu gobernantinkuna kanäta.+ 8 Egiptupita yarqatsimunqä witsan rurayanqannöllam kanampis dejaramar+ santukunata adorëkäyan.+ Tsënöllam qamtapis kanan rurëkäyäshunki. 9 Tsëmi niyäshunqëkita cäsunëki, y clärum willanëki imakunapa pasayänampaq kaqta. Mandakunampaq kaq gobernanti imakunata mañanampaq kaqtapis willanëkim”.
10 Tsëmi Samuelqa gobernantita mañakoqkunawan parlarqan y Jehovä Dios llapan ninqantam willarqan. 11 Kënömi nirqan: “Mandayäshunëkipaq kaq gobernantiqa këkunatam ruranqa:+ ollqu wamrëkikunatam+ churanqa guërraman carrëtankunawan ëwayänampaq,+ cawallunkuna montashqa+ guërraman ëwayänampaq y wakintanam gobernaqpa carrëtan puntanta cörriyänampaq. 12 Wakinkunatanam churanqa soldädunkunapa mandaqninkuna kayänampaq: milpa+ y cincuentapa+ mandaqnin kayänampaq. Wakintanam churanqa chakranchö yapyayänampaq,*+ cosechayänampaq,+ guërrapaq armakunata y carrëtakunata rurayänampaq.+ 13 Tsënöllam warmi wamrëkikunatapis apakunqa perfümita* rurayänampaq, cocinayänampaq y tantata rurayänampaq.+ 14 Y mas allin kaq chakrëkikunata, üvas chakrëkikunata y olïvu chakrëkikunatam+ sirweqninkunata entreganqa. 15 Cortichö trabajaqkunata y sirweqninkunata entreganampaqmi, gränuta y üvasta cosechayaptiki diezmuta mañayäshunki. 16 Warmi y ollqu sirwishoqnikikunata, mas alli kaq wäkëkikunata y ashnuykikunatam trabajatsinampaq apakunqa.+ 17 Üshëkikunapita y cabrëkikunapitam+ diezmuta mañayäshunki, y qamkunapis sirweqninkunam tikrayanki. 18 Tiempuwanqa gobernantita mañakuyanqëkipitam alläpa waqayanki,+ y tsënö pasakuptinqa, Jehovä Diosqa manam cäsuyäshunkinatsu”.
19 Samuel tsënö nikaptimpis israelïtakunaqa manam cäsuyarqantsu y kënömi niyarqan: “Imanö kaptimpis, ¡gobernantïkuna kanantam munayä! 20 Tsënöpam wakin nacionkunanö kayäshaq, pëmi gobernantïkuna kanqa, dirigiyämanqa y pelyakuna kaptin pelyamunqa”. 21 Israelïtakuna tsënö niyanqanta wiyëkurnam, Samuelqa Teyta Jehoväta willarqan. 22 Y Jehovänam Samuelta nirqan: “Niyäshunqëkita wiyë y mandaqninkuna kanampaq gobernantinkuna churë”.+ Tsëpitanam Samuelqa Israelchö autoridäkunata, “kutikuyë markëkikunata” nirqan.