1 Samuel
10 Tsëpitanam Samuelqa, këkätsinqan aceitita Saulpa peqanman o umanman jicharqan.+ Y mutsëkurmi kënö nirqan: “Jehovä Diosmi sirweqninkunapa+ gobernantin kanëkipaq churashqa kashunki.+ 2 Kanan ëwakurninqa Benjaminpa kastankunapa Zelzä markanchö Raquel pamparanqan+ sitiupa pasëkarmi, ishkaq ollqukunawan tinkunki. Pëkunam kënö niyäshunki: ‘Ashiyanqëki ashnukunataqa tariyashqanam,+ y papänikiqa qamkunapaqnam alläpa yarpachakuykan, “¿mëchöraq wamräta tarishaq?” nirmi purikan’. 3 Y qamqa ëwankilla Taborchö këkaq jatun monti kaqyaq o jatun qeru kaqyaq. Tsëchömi Teyta Diosta adorayänampaq Betel markata+ ëwëkaq kimaq ollqukunawan tinkuyanki. Jukninmi apëkanqa kima llullu cabrakunata, juk kaqnam kima tantata y juk kaqnam jatun järrawan vïnuta. 4 Imanö këkanqëkita tapuriyäshurnikim ishkë tantata qarayäshunki, y qamqa chaskikunkilla. 5 Tsëpitanam Teyta Diosta adorayänan jirkaman chärinki, filisteu soldädukuna këkäyanqan sitiuman. Y markaman chëkurnam, Diosta adorayänan altu sitiupita* Teyta Diospa willakoqninkuna urëkämoqta rikanki. Pëkunaqa, cuerdayoq instrumentukunata, panderëtata, flautata y arpata tocar ëwëkaq nunakunapa qepantam, Diospa willakoqninkunanö willakur ëwëkäyanqa. 6 Tsënam poderninwan+ Jehovä Dios yanapashuptiki jukläya tikrarinki.+ Y pëkunawan juntum Diospa willakoqninnö parlar ëwanki. 7 Llapan ninqaqkuna cumplikaqta rikarqa, Teyta Dios yanapëkäshunqëkitam cuentata qokunki. Tsëqa llapan ruranëkipaq kaqta puëdinqëkimannö ruranki. 8 Y Guilgal+ markamanmi puntänëki, tsëmanmi chämushaq animalkunata pishtëkur Teyta Diospaq rupatsinäpaq y pëwan amïgu kanqantsikta rikätsikurnin qarëkunata* rupatsinäpaq. Chämunqäyaq qanchis junaq shuyämanki, tsëpitanam imata ruranëkipaq kaqta nishqëki”.
9 Samuelwan parlarir tumariptinllam, Teyta Diosqa Saulpa shonqunta jukläyaman tikraratsirqan. Tsë junaqmi Samuel llapan ninqan pasarqan. 10 Tsëpitanam, Teyta Diosta adorayänan jirkaman chärir Diospa willakoqninkunawan tinkurqan. Tsë höram poderninwan Teyta Dios yanapaptin,+ Diospa willakoqninkunawan juntakëkur pëkunanö parlar qallëkurqan.+ 11 Diospa willakoqninkunawan ëwëkaqta rikarnin y pëkunanö parlëkaqta wiyarmi, unëpita reqeqkunaqa Saulpaq niyarqan: “¿Imatan Quispa tsurintaqa pasëkushqa? ¿Saulpis Diospa willakoqninku tikrarishqa?”. 12 Tsënam juk nuna nirqan: “¿Pitan pëkunapa papäninqa?”. Tsënö niyanqampitam, “¿Saulpis Diospa willakoqninku tikrashqa?”+ niyaq.
13 Diospa willakoqninkunanö parlar ushaskirmi, Teyta Diosta adorayänan altu sitiuman ëwarqan. 14 Tsëpitanam tiyunqa* Saultawan sirweqninta tapurqan, “¿mëtataq ëwayarqëki?” nir. Saulnam, “ashnu asheqmi ëwayarqä,+ y mana tarirmi Samuel kaqman chäyarqä” nirqan. 15 Tsënam tiyunqa, “¿ima niyäshurqunkitan Samuelqa?, willamë” nirqan. 16 Saulnam, “willayämarqan ashnukunata tariyanqantanam” nirqan. Y manam willarqantsu israelïtakunapa gobernantin kanampaq Samuel ninqantaqa.
17 Tsënam Samuelqa, Jehovä Diospa rikëninchö juntakäyänampaq llapan israelïtakunata Mizpä+ markaman qayëkatsir 18 kënö nirqan: “Israelpa Diosnin Jehovämi kënö nishqa: ‘Noqam israelïtakunata Egiptupita pushamurqä,*+ y noqam salvarqä* egipciu nunakunapa podernimpita y sufritsiyanqan gobernantikunapita. 19 Tsënö imëka mana allikunapita y llakikuykunapita salvayäshoqniki Diospitaqa, kananqa mananam imatapis musyëta munayankinatsu.+ Y kënömi niyarqunki: “Imanö kaptimpis, mandayämänampaq gobernantïkuna churamuy”. Kananqa Jehovä Diospa rikëninman, cada kasta y cada familia shayämuy’”.
20 Tsëmi Samuelqa israelïtakunata cada kastapa qayatsirqan+ y Benjaminpa+ kastankunam akrashqa kayarqan. 21 Tsëpitanam Benjaminpa kastankunapita cada familiata qayatsirqan y matrïta familiam akrashqa karqan. Tsë familiapitanam Quispa tsurin Saul+ akrashqa karqan. Tsëmi Saulta ashiyarqan y manam tariyarqantsu. 22 Tsënam Jehovä Diosta tapuyarqan+ “¿tsë nuna chämushqanaku?” nir. Jehovänam, “awmi, qepikuna rurinchömi këkan” nirqan. 23 Tsënam cörripa ëwarnin pushayämurqan. Y llapankuna rikäyänampaqmi Saulqa shäkurirqan.* Israelïtakunapita mas jatunmi karqan, y wakinqa hombrunllamanmi chäyaq.+ 24 Samuelnam israelïtakunata nirqan: “Pëtam Jehovä Dios akrashqa gobernantikikuna kanampaq,+ manam pënöqa pillapis kantsu”. Y llapan israelïtakunam kushikurnin fuertipa niyarqan: “¡Kë gobernantiqa unëpa kawëkullätsun!”.
25 Tsënam Samuelqa llapan nunakunata musyatsirqan gobernantikuna imakunata mañakuyanqanta.+ Tsëta juk libruman qellqëkurmi Jehovä Diospa rikëninman churarqan. Tsëpitanam llapankunata nirqan, wayinkunata kutikuyänampaq. 26 Saulpis Guibeä markantam kutikurqan. Y Jehovä Dios yanapanqan soldädukunam pëwan ëwayarqan. 27 Tsënö kaptimpis wakin mana alli nunakunaqa, “imanöraq pëqa salvamäshun”+ nirmi mana väleqpaq churayarqan, y manam imatapis qarayarqantsu.+ Saulqa upällam kakurqan.