1 Samuel
24 Filisteu soldädukunata qatipanqampita kutiriptinnam Saulta kënö nir willayarqan: “En-Guedï+ markapa tsunyaq sitiunchömi Davidqa këkan”.
2 Tsëmi Saulqa mas allin kaq tres mil israelïta soldädunkunata pusharkur, Davidtawan soldädunkunata asheq ëwarqan. Y chukaru cabrakuna pärayanqan jatusaq qaqakunapam ashirqan. 3 Tsëpitanam Saulqa näni kuchunchö rumipita rurashqa üshapa corralninkunaman charqan. Y juk machëta rikärirmi tsëman ishpakoq yëkurqan. Peru Davidwan soldädunkunaqa tsë machëpa mas rurinchömi këkäyarqan.+ 4 Tsënam soldädunkunaqa Davidta niyarqan: “Kanan junaqmi Jehovä Diosqa chikishoqnikita entreguëkäshunki,+ munanqëkita rurë”. Tsënö niyaptinmi Davidqa shumaqlla ëwëkur Saulpa mangannaq röpampa kuchunta roqurapurqan. 5 Tsëpitanam Davidqa Saulpa röpampa kuchunta roqupunqampita, shonqunchö* mana alli sientikurqan.+ 6 Y soldädunkunatam nirqan: “Teyta Jehovä akranqan gobernantitaqa manam tsëta rurëkümantsu. Jehovä akranqan gobernantita ima mana allitapis rurëkuptïqa, Teyta Jehovätaqa manam gustanqatsu”.+ 7 Tsënö nirmi Davidqa, Saulta mana wanutsiyänampaq soldädunkunata micharqan. Y Saulqa machëpita yarqurirmi ëwakurqan.
8 Tsënam Davidqa machëpita yarquskir Saulta qayarqan: “¡Teytallë, Israelpa gobernaqnin!”.+ Saul tumëkur rikëkuptinnam, Davidqa patsamampis urkun chanqanyaq qonqurikurqan. 9 Y Saultam tapurqan: “¿Imanirtan, ‘Davidmi wanutsishuynikita munan’ nir willapäyäshuptiki creinki?+ 10 Kanan junaq wanutsinaqpaqmi Jehovä kë machëman apamushurqunki, y soldädükunapis wanutsinaqpaqmi niyämarqan.+ Peru noqaqa llakiparnikim,* ‘imanöraq Jehovä Dios akranqan gobernantita wanutsïman’+ nir imanarqoqtsu. Y tsëtaqa clärum rikarqunki. 11 Papä Saul, rikë, mangannaq röpëkipa kuchuntam këchö këkätsï. Pensë, rasumpa chikiparnikiqa këta roqunqä höram wanuratseqman karqan. Manam qamtaqa chikipaqtsu, y manam imachöpis ofendirqoqtsu.+ Tsënö kaptimpis qamqa wanutsïmänëkipaqmi ashikämanki.+ 12 Ishkantsikta Jehovä Dios juzguëkamäshun,+ y llapan rurëkämanqëkipita Jehovä castiguëkushuy.+ Peru noqaqa manam qamta imanashqëkitsu.+ 13 Unë niyanqannöpis, ‘mana alli kaqkunallam mana allitaqa rurayan’. Tsëmi noqaqa qamta imanashqëkitsu. 14 ¿Pitataq Israelpa gobernaqninqa ashikan? ¿Noqataku? ¿Manaku noqalläqa wanushqa allqu cuenta y pulga cuentalla kallä?+ 15 Kikin Jehovä Dios ishkantsikta juzgamäshun. Pëmi kë asuntuta arreglamunqa,+ y manam wanutsimänëkita permitinqatsu”.
16 Tsënö David parlar ushariptinnam Saulqa, “David, ¿qamku parlapëkämanki hïju?”+ nirqan. Tsëpitanam mana pärëpa waqarqan. 17 Tsëpitanam Saulqa Davidta kënö nirqan: “Qamqa noqapitapis mas alli nunam kanki, y imëkatam noqapaq ruramurqunki, peru noqaqa alläpam qamta sufritsirqoq.+ 18 Kanan junaqmi Jehovä Diosqa wanutsimänëkipaq puntëkiman churamarqan, peru manam wanutsimarqunkitsu.+ 19 ¿Pitan chikeqninta tarïkurqa kawëkaqta dejarinman? Kanan junaq mana wanutsimanqëkipita Teyta Jehovä bendicïkushuy.+ 20 Kananmi sïqa alli musyä, Israelpa gobernaqnin imëyaqpis kanëkipaq kaqta.+ 21 Y kananqa Jehovä Diospa jutinchö änïkallämë,+ noqa wanukuptï tsurïkunata y papänïpa familiankunatapis mana ushakätsinëkipaq, y jutïtapis* mana qonqëkunëkipaq”.+ 22 Tsëmi Davidqa, Saul mañakunqanta Teyta Diospa jutinchö änirqan. Tsënam Saulqa wayinta+ kutikurqan, y Davidnam llapan soldädunkunawan fäcil-lla mana chäna sitiuman ëwakurqan.+