Shumaq huertapita qarqushqa

NUNAKUNATA manaraq rurarmi Diosqa angelkunata kamarqan, pëkunaqa espïritum kayan. Juk kaq angelmi mana wiyakunqanchö Satanás o Diablu këman charqan.

Satanasqa juk culebrawanmi Ëvata parlaparqan, y Dios alli cösaskunata michëkanqantam ulikurkur nitsirqan. Jina michäyäshunqëki frütata mikurninqa manam wanuyankitsu nitsirqanmi. Tsënöpam mana allita allitanö rikätsirqan, y mikurninqa más yachëyoq y munëninta rurar kawakuyänampaq kaqtam nirqan. Tsënö nirqa, manam rasun kaqtatsu Satanás parlëkarqan. Kë ulikoq o llullakogga, Adanwan Eva kënö pensayänampaqmi rurëkarqan: ¿Diosqa derëchoyoqku ciëlota y Patsata gobernanampaq? ¿Allipaqku mandamientonkuna? ¿Allipaqtsuraq wiyakuntsik?

Ëvaqa Satanaspa makinmanmi ishkirirqan. Frütata munapärirmi mikur qallëkurqan. Tsëpitanam qowanta qorirqan y pëpis mikurirqanmi. Rurayanqan jutsanö mana kaptimpis, Diospa contranmi churakëkäyarqan, jutsatam rurëkäyarqan. Pëkunaqa imata rurëkäyanqantapis musyayarqanmi, Diosnintsik kawënin y llapannin qoykaptimpis, pëlla Gobernakoq kanqantam despreciëkäyarqan.

Rurayanqampitaqa Dios cuentata  mañarqanmi. Y culebrata o Satanasta ushakätsinampaq Mirënin yurinampaqmi awnikurqan. Tsëpitanam Adantawan Ëvata imata pasanantapis nirqan, pero wamrankuna yurinampaq kaqta ankupar o llakiparnam tsë höraqa wanuratsirqantsu. Tsëqa, ¿imataraq pëkuna shuyaräyanman karqan? Jehoväqa awnikurqan juk Salvador nunakunata jutsapita jorqanampaq kaqtam. Pero ¿piraq tsë Salvador kanman karqan, y imanöraq Dios munanqanta cumplinman karqan? Këqa watakuna pasanqanmannö y Bibliata qellqayanqanmannömi musyakashqa.

Tsëpitanam Adantawan Ëvata shumaq huertapita Dios qarqurirqan. Y waqtachöqa, mikuyänampaqpis llapan kallpankunawanran trabajayänan karqan. Tsëchömi Ëvapa Caín punta kaq wawan yurirqan. Tsëpitanam yurirqan más ollqu y warmi wamrankuna, Abel jutiyoq, jina Noëpa awilun Set jutiyoqpis.

(Génesis 3–5 y Apocalipsis 12:9 textokunapita jorqashqam.)