Espïritukunaqa manam Patsachö kawayashqatsu ni wanuyashqatsu

¡Espïritukunaqa rasumpam kayan! Mana rikëta puëdishqapis, kanmi alli y mana alli espïritukuna. ¿Pëkunaqa Patsachö kawaq y wanoq nunakunatsuraq kayan?

Manam pëkunatsu kayan. Pï nunapis wanurqa, manam nunakuna niyanqannötsu espïritu tikran. ¿Imanötan tsëtaqa musyantsik? Bibliachö niptinmi. Bibliaqa Jehovä jutiyoq rasumpa kaq Diospitam shamun, y rasumpa kaqllatam willakun. Nunakunata kamashqa karmi, Jehoväqa alli musyan wanuriyaptin ima pasanqanta (Salmus 83:18; 2 Timoteu 3:16).

Bibliachöqa nin punta nuna Adantaqa, Teyta Dios ‘allpapita’ ruranqantam (Genesis 2:7). Tsëpitanam Paraïsuman o Eden huertaman churarqan. Jehovä mandakunqanta Adan cäsukurqa manam wanunmantsu karqan, y kananyaqmi kawëkanman karqan. Peru mandakunqankunata musyëkar mana cäsushqa kaptinmi, Teyta Diosqa ima pasanampaq kaqta willar kënö nirqan: “Allpapitam kanki, y allpamanmi tikranki” (Genesis 3:19).

Tsënö nirqa, ¿ima nitataq munarqan? Jehovä allpapita manaraq ruraptinqa, ¿mëchötan Adan këkarqan? Manam mëchöpis karqantsu ni manaraq yureq espïritutsu karqan. Adanqa manaran karqanraqtsu. Tsëmi Jehovä “allpamanmi tikranki” nirqa, wanunampaq kaqta nikarqan. Adan wanurqa, manam espïritutsu tikrarqan, sinöqa yapëmi kawëninnaq quedarirqan. Wanurqa manam kawëkantsiknatsu.

Peru ¿ima nishwantan wakin wanushqa nunakunapaq? ¿Manaku pëkunapis kawayanna? Tsëpa respuestanta Bibliachö rikärishun.

• “Llapampis [nunakuna y animalkunapis] tsë sitiullamanmi ëwayan. Allpapitam kamashqa kayarqan y allpallamanmi kutiyan” (Eclesiastes 3:20).

• “Wanushqakunaqa, manam ni imatapis musyayannatsu” (Eclesiastes 9:5).

• “Wanushqakunaqa o wañushqakunaqa manam kuyakuyannatsu, chikikuyannatsu ni manam envidiösunatsu kayan” (Eclesiastes 9:6).

• “Wanurirqa o wañuskirqa manam ni ima rurëtapis pensankinatsu, ni manam imatapis yachankinatsu ni musyankinatsu” (Eclesiastes 9:10).

• “Nunaqa [...] wanur[mi] o wañur[mi] allpayärin, tsë junaqmi llapan pensanqan ushakärin” (Salmus 146:4).

¿Difïcilku tsë textukuna ninqanman creinëkipaq? Tsënö kaptinqa këman pensari: Atska familiankunam ollqu kaq ganayanqan qellëwan mantenikuyan. Tsëmi pë wanuptinqa, familian imëka problëmakunapa pasan. Höraqa manam mikuyänanllapaqpis warmimpa ni tsurinkunapa qellëninkuna tinkuntsu. Höraqa chikeqninkunapis familiampita provechakuyanmanmi. Kananqa këman pensari: ‘Tsë nuna espïritu tikrashqa karqa, ¿imanirtan familianta mantenir sïguintsu? ¿Imanirtan mana alli nunakunapita familianta cuidantsu?’. Tsënöqa, tsë textukunachö rasumpa kaqllata niptinmi. Tsë nunaqa manam kawannatsu, y manam ima rurëtapis puëdinnatsu (Salmus 115:17).

Tsëqa, ¿wanushqakuna mana imëpis kawariyämunampaq kaqtaku rikätsikun? Manam tsënötsu. Tsëpitanam wanushqakuna kawariyämunampaq kaqta yachakushun. Peru clärum rikätsikun, wanushqakunaqa imata rurëkanqëkita mana musyayanqanta. Pëkunaqa manam rikäyäshunkitsu, wiyayäshunkitsu ni parlapäyäshunkitsu, y manam yanapayäshuynikita y mana allita rurayäshuynikita puëdiyantsu. Tsëmi pëkunataqa mantsanëkitsu (Eclesiastes 9:4; Isaïas 26:14).