¿Imanirtan Bibliachöqa Jesuspaq Diospa Tsurin nin?

Bibliachö yachatsikunqan

Bibliachöqa kutin kutinmi Jesus “Diospa Tsurin” kanqanta nin (Juan 1:49). “Diospa Tsurin” nirqa, Dioslla Kamakoq y Kawatsimaqnintsik kanqantam rikätsikun, y Diosmi Jesustapis kamarqan (Salmus 36:9; Apocalipsis 4:11). Bibliachöqa manam nintsu, kë patsachö nunakunanö Teyta Dios papä këman chanqanta.

Bibliachöqa ninmi angelkunapis “Teyta Diospa tsurinkuna” kayanqanta (Job 1:6, nöta). Y ninmi punta nuna Adanpis “Teyta Diospa tsurin” kanqanta (Lücas 3:38). Tsënö kaptimpis, Bibliachömi nimantsik Jesusqa Diospa mas kuyë tsurin kanqanta. Jesustaqa llapan kamanqampitapis mas puntatam kamarqan, y pëllatam Teyta Diosqa japallan kamarqan.

• ¿Manaraq kë Patsachö yurirqa Jesusqa ciëluchöku kawarqan?

• ¿Manaraq kë Patsaman shamurqa imatataq Jesus ciëluchö rurarqan?

¿Manaraq kë Patsachö yurirqa Jesusqa ciëluchöku kawarqan?

Awmi. Jesusqa manaraq kë Patsachö yurirmi, ciëluchöqa espïrituna karqan. Kikinmi nirqan ‘ciëlupita urämunqanta’ (Juan 6:38; 8:23).

Teyta Diosqa llapan kamanqampitapis mas puntatam Jesusta kamarqan. Jesuspaqmi Bibliachö kënö nin:

• Pëmi “llapan kamanqampita mas punta kaq” (Colosensis 1:15).

• Pëqa “Teyta Dios puntata kamanqanmi” (Apocalipsis 3:14).

“Pëqa unë tiempupitana y mëtsika unë watakunapitanam kawan” nir Bibliachö willakunqanmi Jesuschö cumplikarqan (Miquëas 5:2; Mateu 2:4-6).

¿Manaraq kë Patsaman shamurqa imatataq Jesus ciëluchö rurarqan?

Ciëluchöqa alli carguyoqmi karqan. Tsëpaq parlarmi Jesusqa Diosman mañakur kënö nirqan: “Teyta, nunakuna manaraq kayaptin läduykichö puëdeq kanqänölla, kanampis läduykichö puëdeq kanäta permitïkullë” (Juan 17:5).

Imëkata kamarmi Teytanta yanaparqan. Jesusqa ‘maestru de obranömi’ imëkata kamar Teyta Diosta yanaparqan (Proverbius 8:30). Jesuspaqmi Bibliachö kënö nin: “Pëwanmi ciëluchö y patsachö llapan wakin imëkapis, awmi, rikakoq y mana rikakoq kaqkunapis kamashqa kashqa” (Colosensis 1:16).

Teyta Diosqa Jesuswanmi angelkunata y ciëluchö llapan kaqkunata kamayarqan (Apocalipsis 5:11). Teyta Dioswan Jesusqa, inginiëruwan maestru de obra trabajayanqannömi trabajayarqan. Inginiëruqa plänukunatam ruran y maestru de obranam tsë plänukunata rikëkur plänuchö ninqannö ruran.

Palabra niyanqanmi karqan. Kë Patsaman manaraq shamuptin Jesusta imanö reqiyanqampaq parlarmi, Bibliachöqa “Palabra” nir reqiyanqanta willakun (Juan 1:1). Tsëmi rikätsikun, angelkunata imatapis willëta o mandëta munarqa, tsurin Jesuswan Teyta Dios musyatsinqanta.

Nunakunata imata willëta munarpis, capazchi Teyta Diosqa Jesuswan musyatsirqan. Eden huertachö Adantawan Ëvata imata rurayänampaq mandarpis, capazchi Jesuswan parlaparqan (Genesis 2:16, 17). Israelïtakuna tsunyaq sitiupa ëwayaptin puntankunata ëwaq angelpis capazchi Jesus karqan, y capazchi israelïtakunaqa Jesus ninqanta cäsukuyänan karqan (Exodu 23:20-23).a