Cristiänunö Kawakunapaq y Yachatsikunapaq Reunionchö Yachakunapaq këkunata leyishun
© 2024 Watch Tower Bible and Tract Society of Pennsylvania
4-10 DE NOVIEMBRI
BIBLIAPITA ALLI YACHAKUNAPAQ SALMUS 105
“Pëqa manam ruranqan acuerduta imëpis qonqantsu”
¿Imatataq rurashwan Jehovä änikunqan Shumaq Patsaman maslla confiakunapaq?
11 Nunakuna rurëta mana puëdiyanqankunata unë sirweqninkunata Jehovä äninqanman pensarishun. Abrahantawan Säratam änirqan, edäna këkarpis ollqu wamrayoq kayänampaq (Gen. 17:15-17). Y Abrahantam nirqan, pëpa kastankuna Canaan markakunata chaskiyänampaq kaqta. Peru Abrahanpa kastankunaqa mëtsika watapam Egiptuchö esclävu kayarqan. Capazchi wakinkunaqa pensayarqan Jehovä änikunqan mana cumplinampaq kaqta. Tsënö kaptimpis, Jehovä parlanqanqa cumplikarqanmi. Tsëpita mëtsika wata pasariptinnam chakwanna Elisabet-ta, juk ollqu wamrayoq kanampaq kaqta nirqan. Tsënöllam Marïatapis nirqan ollquwan manaraq kashqa këkarpis, Pëpa kuyë Tsurinta qeshpikunampaq kaqta. Tsë llapantaqa Jehovä rurarqan Eden huertachö änikunqanta cumplirmi (Gen. 3:15).
12 Llapan änikunqankunata Jehovä imanö cumplishqa kanqanman pensarmi musyantsik Jehoväqa poderösu kanqanta. Tsëta musyarmi Shumaq Patsata änimanqantsikta cumplimunampaq kaqmampis maslla markäkuntsik o yärakuntsik (leyi Josuë 23:14; Isaïas 55:10, 11). Tsënö markäkurmi, wakinkunatapis yanapashun Shumaq Patsata Jehovä änikunqanta cumplimunampaq kaqman confiakuyänampaq. Kikin Jehovämi mushoq ciëlupaq y mushoq Patsapaq parlarnin, kënö nirqan: “Tsë ninqäkunata qellqë, tsëkunaqa confiakuypaqmi y rasumpa kaqllam” (Apoc. 21:1, 5).
it-2-S päg. 581 pärr. 2
Palabra
Diosnintsik kamanqankunaqa kawaq y mana kawaq kaqpis pë ninqantam cäsukuyan. Tsëmi rurëta munanqanta cumplinampaqqa, kamanqankunawan imëkata rurëta puëdin (Sl 103:20; 148:8). Diosnintsikpa palabranqa confiakuypaqmi, pëqa imata änikurpis cumplinmi (Dt 9:5; Sl 105:42-45). Kikin Diosnintsik ninqannöpis “llapan ninqankunaqa manam imëpis ushakantsu”, pë parlanqanqa ninqannöllam cumplikanqa (Isa 40:8; 55:10, 11; 1Pë 1:25).
Imakunata yachakunqantsik
Diospa kaqchö poqunantsikqa precisanmi
13 Jehovä yanapamänapaq kaqman markäkushun. ¿Imatataq rurashwan mana kaqpita pillapis mana allipa tratamashqaqa? Imanö sientikunqantsiktam willanantsik, peru pë culpayoq kanqanta rikätsita munar tsarakurqa mas problëmamanmi chäshun. Josë ruranqanta rikärishun. Wawqinkunam mana allipa tratayarqan, y Egiptuchönam tumparnin prësutsiyarqan. Peru Josëqa Jehovä yanapanampaq kaqmanmi markäkurqan. Jehovä änikunqankunaman pensarmi alleq tsarakurqan (Salmu 105:19). Problëmakunapa pasanqan höra Dios munanqannö kawëta yachakunqanmi yanaparqan, juk precisaq carguta chaskirnin shumaq cumplinampaq (Genesis 41:37-44; 45:4-8). Pillapis mana kaqpita mana allipa tratamashqaqa, Jehoväta yachëta mañakushun. Pëmi yanapamäshun alläpa mana piñakunapaq y mana alli tratamaqnintsikta kuyëpa tratanapaq (leyi 1 Pëdru 5:10).
11-17 DE NOVIEMBRI
BIBLIAPITA ALLI YACHAKUNAPAQ SALMUS 106
“Salvaqnin Teyta Diostaqa qonqëkuyarqanmi”
“¿Pitaq Jehoväpa favornin këkan?”
13 Israelïtakunaqa yana pukutëta rikarnin y räyukuna pashtaqta wiyarnin y maskunata rikarninmi alläpa mantsakäyarqan. Tsëmi Moisesta kënö niyarqan: “Qamlla Jehoväwan parlamï” (Ex. 20:18-21). Tsëmi Moisesqa Sinaï jirkaman witsarqan, y tsëchömi atska tiempupa quedakurqan. ¿Dirigeqninkuna Moisesta mana rikarnintsuraq israelïtakunaqa tsunyaqchö dejarishqanö sientikuyarqan? Tsënö kaptinqa, Moisesta rikarninllachi Jehovämanqa markäkuyaq. Tsëchi Moisesta shuyarëta utirirnin (ajayärirnin) Aaronta kënö niyarqan: “Puntäkunata ëwanampaq juk diosnïkuna ruramï, porqui manam musyayätsu Egiptupita jorqayämaqnï tsë Moises nunata ima pasashqa kanqanta” (Ex. 32:1, 2).
Imakunata yachakunqantsik
¿Pimantaq rikarantsik?
14 Moises imanir jutsallakunqanta musyanapaqqa, Salmus 106:32, 33 textuta yapë rikärishun, kënömi nin: “Yakuta jorqanqan Meribä sitiuchömi alläpa piñatsiyarqan, y pëkunapa culpanrëkurmi Moisespis mana alliman charqan. Porqui alläpa piñatsiyaptinmi, piñakurnin lluta parlarirqan”. Israelïtakunaqa Jehovätam ofendiyarqan, peru Moisesmi piñakurqan. Tsënö alläpa piñakurninmi, mana pensashpa lluta parlarirqan.
15 Wakinkuna rurayanqanman mas pensarninmi, Moisesqa Jehoväta rikarëta qonqarirqan. Punta kaq kutichö israelïtakuna yakupaq quejakuyaptinqa, Moisesqa Jehovä mandanqannömi rurarqan (Ex. 7:6). Peru qepa kaq kutichöqa, mëtsika watakunapana mana cäsukoq israelïtakunata dirigirninchi, alläpa utishqa y piñashqa sientikurqan. Tsëchi kikinllaman mas yarpararnin, Jehoväta alabëtaqa joqarirqan.
18-24 DE NOVIEMBRI
BIBLIAPITA ALLI YACHAKUNAPAQ SALMUS 107, 108
“Allillata ruranqampita Teyta Jehoväta agradecikuyë”
w07-S 15/4 päg. 20 pärr. 2
Sirweqninkuna juntakäyanqanchö Jehoväta alabashun
2 Jehoväpa sirweqninkuna juntakanqantsik wayiqa, manam parlakunapaq, yachakunapaq o juntakänapaq sitiullatsu. Tsëchöqa Jehovätam alabantsik, y tsënö kanqantam Salmus libruchöpis rikätsikun. Salmus 35:18 textuchömi kënö nin: “Sirwishoqnikikuna juntakäyanqanchömi agradecikushqëki, mëtsikaq kayanqanchömi alabashqëki”. Salmus 107:31 y 32 textuchönam kënö nin: “Alläpa kuyakoq kanqampita y nunakunapaq imëkata ruranqampita, Teyta Jehoväta llapan nunakuna agradecikuyätsun. Mëtsika nunakuna juntarëkäyanqanchö alabayätsun”.
Jehoväta agradecikushun
4 Shonqupita patsë agradecikoq kanapaqqa, alläpam precisan Jehovä llapan qomanqantsikman yarpachakunantsik. Kuyëpam yarpachakunantsik rasumpa kuyakoq kanqanman y kuyamanqantsikta imëkawan rikätsimanqantsikta. Salmistapis Jehovä llapan ruranqankunaman yarpachakurmi espantakurqan (leyi Salmu 40:5 y 107:43).
Imakunata yachakunqantsik
Jehovämi “fuertita tikratsiyäshunki”
20 “Teyta Diosnintsik yanapamashqam” kallpannaq sientikunqantsik hörakunapis kallpayoq sientikushun (Sal. 108:13). Jehoväqa tukuynöpam yanapamantsik kallpayoq kanantsikpaq. Tsëmi ruranëkipaq kaqta rurëta mana puëdeqnö kar, o ima pruëbapa pasarpis, o Jehovä Diosnintsikta kushishqa sirwinëkipaqqa, llapan shonquykiwan Jehoväman mañakunëki y Palabran Bibliata yachakunëki yanapashunëkipaq. Y wawqi panikuna yanapayäshunëkita permiti y Diosnintsik änimanqantsikkunata imëpis yarparë. Tsëta ruraptikim Teyta Jehoväqa poderninwan yanapashunki imëkapa pasarpis pacienciawan aguantanëkipaq (Col. 1:11).
25 DE NOVIEMBRIPITA 1 DE DICIEMBRIYAQ
BIBLIAPITA ALLI YACHAKUNAPAQ SALMUS 109-112
Gobernamaqnintsik Jesusta yanapashun
w06-S 1/9 päg. 13 pärr. 6
Salmus librupita yachakunapaq
Salmus 110:1, 2. Diosnintsikpa derëcha lädunchö jamaranqan tiempuqa, ¿imatataq Jesucristu rurarqan? Kawariramur ciëluta kutirqa, Jesusqa 1914 wata gobernar qallanqanyaqmi Diosnintsikpa derëcha lädunchö shuyararqan. Tsëyaqmi ciëlupaq akrashqakunata gobernar këkashqa. Tsëtaqa rurashqa yachatsikuyanqanchö dirigir y pëwan gobernayänampaq yanaparmi (Mateu 24:14; 28:18-20; Lücas 22:28-30).
w00-S 1/4 päg. 18 pärr. 3
Diospa contran churakaqkunaqa manam imatapis lograyanqatsu
3 1900 watakuna witsampitam Jehoväta sirweqninkunataqa imëkata rurar sufritsiyashqa. Atska nacionchömi mana alli nunakunaqa alli noticiakunata willakunantsikta michäkuyashqa. Tsëtaqa rurayashqa Diablu yanapaptinmi. Diabluqa “pitapis tragakurkuyta munarmi, leonnö qaparikachar” entëru läduntsikpa purikan (1 Pëdru 5:8). 1914 watachö “nacionkunapaq dispunishqa tiempu” ushariptinmi, Diosnintsikqa Patsata gobernanampaq Tsurinta churar kënö nirqan: “Chikiyäshoqnikikunapa puntanchömi, gobernanki” (Lücas 21:24; Salmus 110:2). Carguta chaskirirmi Cristuqa Diabluta Patsaman qarqamurqan. Tsënam Diabluqa wallka tiempullana kawanampaq kaqta musyar ciëlupaq akrashqakunawan y wakin cristiänukunawan alläpa cölerakurqan (Apocalipsis 12:9, 17). Diospa contran churakaqkunaqa, ¿imatataq lograyashqa?
lff lección 55 1 kaq
Congregacionchö imëkata rurar yanapakuy
1 KAQ: ¿Imanötan tiempuykiwan y kallpëkiwan congregacionchö yanapakunkiman?
Congregacionchöqa llapantsikmi imallachöpis yanapakuyta puëdintsik. ¿Këkanqëki congregacionchö kanku edäna o qeshyëkaq wawqi panikuna? ¿Imanöraq pëkunata yanaparinkiman? Capazchi reunionkunaman apankiman, rantipakoq ëwaptin yanaparinkiman o wayinchö imakunata rurarllapis yanaparinkiman (leyi Santiägu 1:27). Reunionnintsikta rurana wayita limpiapakur y altsapakurpis yanapakuyta puëdintsikmi. Peru yanapakunapaqqa manam pipis obligamantsiktsu, sinöqa Teytantsik Jehoväta y wawqi panintsikkunata kuyarmi yanapakuntsik (Salmus 110:3).
Bautizakushqana kaqkunaqa masraqmi yanapakuyta puëdiyan. Wakin wawqikunaqa siervu ministerial kayänampaq y tiempuwanqa anciänu kayänampaqmi kallpachakuyan. Wakin wawqi panikunaqa llapan tiempunkunawan Diospita yachatsikur yanapakuyänampaqmi precursor regular kayan. Wakinkunanam Diosta adoranapaq localkuna rurëchö yanapakuyan. Y mëtsikaqmi Diospita yachatsikoqkunata necesitäyanqan sitiukunaman yanapakoq ëwayan.
Imakunata yachakunqantsik
Diospa Gobiernunman markäkï
15 Abrahanwan y Davidwan conträtukunachöqa warmipa mirënin mandakunampaq kaqtam seguran. Peru nunakunaqa manam juk alli gobiernullatatsu wanayan, sinöqa jutsapita libri këta y Diospa familianchö këtapis wanayanmi. Tsëpaqqa tsë mirëqa sacerdöti carguta apananmi precisarqan. Tsëmi Jehoväqa juk conträtu masta patsäratsirqan, Melquisedecnö sacerdöti kanampaq.
16 Jehoväqa Davidwanmi musyatsikurqan, ishkë carguta apanampaq Jesuswan conträtuta ruranampaq kaqta. Juk kaqqa karqan, derëcha kaq lädunman täkunampaqmi y chikeqninkunata ushakätsinampaq autoridäta chaskinampaqmi. Y juk kaqnam karqan, “Melquisedecnö sacerdöti” imëyaqpis kanampaq (leyi Salmu 110:1, 2, 4). ¿Imanirtaq “Melquisedecnö” kanan karqan? Porqui Abrahanpa kastankunata Dios Äninqan Patsata manaraq chaskiyaptinmi, Salempa reynin Melquisedecqa, ‘Diospa saserdotin carqan’ (Heb. 7:1-3). Jehovämi Rey y sacerdöti kanampaq churarqan. Bibliachöqa pëllapaqmi ishkan carguta apanqampaq parlan. Y manam willakuntsu, pëpa puntanman ni qepanman tsë carguta pï apanqantapis, tsëmi nintsik pëqa “wiñepa wiñenin saserdoti” kanqanta.
17 Tsë conträtuwanmi Jehoväqa sacerdöti kanampaq Jesusta churarqan. Tsëmi Jesusqa ‘saserdoti wiñepa, wiñenin canqa, y Melquisedec saserdotinömi canqapis’ (Heb. 5:4-6). Kë conträtuwanmi Jehoväqa patsätsishqa, Patsapaq y nunapaq munanqanta cumplinampaqqa akranqan Gobiernuta utilisänampaq kaqta.
2-8 DE DICIEMBRI
BIBLIAPITA ALLI YACHAKUNAPAQ SALMUS 113-118
¿Imanötan Jehoväta kutitsishwan?
w01-S 1/1 päg. 11 pärr. 13
Kuyakoq këqa alli kanapaqmi yanapamantsik
13 Jesus ninqanmi cläru rikätsikun imapitapis masqa Jehoväta kuyanapaq kaqta. Tsënö karpis, manam pëta kuyëkarnatsu yurintsik, sinöqa kuyanapaqmi kallpachakunantsik. Diospita tsëllaraq yachatsimashqaqa, masmi pëpita yachakuyta munarqantsik. Tsëpitanam yachakurqantsik kawanapaq kë Patsata imanö alistanqanta y nunakunata imanö tratanqanta. Jutsata rurashqa kayaptimpis Diosnintsikqa manam nunakunata dejarirqantsu, sinöqa salvanampaqmi imëkata patsätsirqan (Genesis 2:5-23; 3:1-5, 15). Pëllata sirweqkunawanqa alläpa allim kashqa, y jutsantsikrëkur wanunampaqmi japallan Tsurinta mandamurqan (Juan 3:16, 36). Jehoväta mas reqirmi pëta mas kuyarqantsik (Isaïas 25:1). Jehovä shumaq cuidaptinmi Gobernanti Davidpis alläpa kuyarqan (Salmus 116:1-9). Kanan tiempupis Jehoväqa cuidamantsik, dirigimantsik, yanapamantsik y animamantsikmi. Jehoväpita mas yachakurqa masmi kuyashun (Salmus 31:23; Sofonïas 3:17; Romänus 8:28).
w09-S 15/7 päg. 29 pärrk. 4, 5
Agradecikoq y qarakoq kashun
Salmusta qellqaqmi kënö nirqan: “Imëkanöpa Teyta Jehovä yanapamanqantaqa, ¿imanöraq kutitsishaq?” (Sal. 116:12). ¿Imatataq Jehoväqa pëpaq rurashqa karqan? ‘Alläpa llakikunqan y yarpachakunqan’ höram yanapashqa karqan y ‘wanunampitam’ salvashqa karqan. Tsëmi Jehoväpaq imallatapis rurëta munarqan. ¿Imatataq rurarqan? Kikinmi nirqan ‘Jehoväta äninqanta’ cumplinampaq kaqta (Sal. 116:3, 4, 8, 10-14). Salmusta qellqaqqa Jehoväta äninqanta cumplinampaq y mandanqanta ruranampaqmi decidïdu këkarqan.
Noqantsikpis pënölla rurëta puëdintsikmi. Tsëpaqqa mandamanqantsiktam cäsukunantsik y kushitsinqantam ruranantsik. Tsëmi Jehoväta adorar ruranqantsikta puntaman churanantsik y santu espïritunwan dirigimänatam permitinantsik (Ecl. 12:13; Gäl. 5:16-18). Noqantsikpaq imëkata ruramunqantaqa manam Jehoväta kutitsita puëdishuntsu. Peru llapan shonquntsikwan sirwishqaqa alläpam kushikunqa (Prov. 27:11). ¡Tsëmi imëpis sirwita munantsik!
w19.11 pägk. 22-23 pärrk. 9-11
Levïticu librupita precisaq yachatsikïkuna
9 Ishkë kaq yachatsikï: alläpa agradecikurmi Jehovätaqa sirwintsik. Diosta adorarnin israelïtakuna ima masta rurayanqanta rikärishun. Pëkunaqa Jehoväwan amïgu kayanqanta o yamë kayanqanta rikätsikoq ofrendatam rurayaq. Levïticu libruchöqa, Dioswan amïgu kayanqampita agradecikurnin juk ofrendata israelïtakuna rurëta puëdiyanqantam yachakuntsik (Lev. 7:11-13, 16-18). Tsë ofrendataqa, manam rurayänan kaptintsu rurayaq, sinöqa kikinkuna rurëta munarmi. Awmi, Jehovä Diosninkunata kuyarninmi tsë ofrendataqa rurayaq. Tsë ofrendata ruraq nuna, familian y sacerdötikunam tsë pishtashqa animaltaqa mikuyaq. Peru tsë animalpa mas allin kaqkunaqa Jehovällapaqmi kaq. ¿Imataq tsëkunaqa kayarqan?
10 Kima kaq yachatsikï: Jehoväta kuyarninmi llapan puëdinqantsikmannö sirwintsik. Jehoväqa juk animalpa wiran mas allin kaqnin kanqantam neq. Jina animalpa pacha rurunta y ñatinnintam mas väleqtanö rikaq (leyi Levïticu 3:6, 12, 14-16). Tsëmi Jehoväqa alläpa kushikoq, juk israelïta pishtashqa animalpa pacha rurunta, ñatinta y wiranta pëpaq kayaptin. Jehoväpaq mas allin kaqta kayaq israelïtaqa, pëta alläpa agradecikunqantam rikätsikoq. Jesuspis, imëka pishtashqa animalpa mas allin kaqninta kayaqnömi, Teytanta kuyarnin llapan puëdinqanmannö sirwirqan (Juan 14:31). Diospa voluntäninta rurëqa, Jesustaqa alläpam kushitseq, jina alläpam Pëpa leyninkunata kuyaq (Sal. 40:8). ¡Jehoväqa alläpachi kushikurqan pëta sirwinampaq Tsurin listu këkanqampitaqa!
11 Dioswan amïgu kayanqanta rikätsikoq ofrendataqa, kikinkunallapitam rurayaq y tsëwanqa Diosta alläpa kuyayanqantam rikätsikuyaq. Kikintsikpa munënintsikpita Diosta sirwirnin ruranqantsikkunaqa, tsë ofrendakunanöllam kayan, y Diosta kuyanqantsiktam rikätsikun. Pëta kuyar y mandakunqankunata wiyakur mëtsika millon nunakuna sirweqta rikarqa, alläpachi kushikun. Pëqa manam imata ruranqantsikllatatsu rikan y precisaqpaq churan, sinöqa tsëkunata imanir ruranqantsiktam musyan, y tsëta yarpëqa alläpam kushitsimantsik. Këllaman pensarishun: Jehoväqa, edäna kanqantsikrëkur pëpaq munanqantsiknö rurëta mana puëdinqantsiktaqa, allim musyan y manam tsëman yarparäkuntsu. Itsa Pëta sirwir wallkallata rurëta puëdintsik, peru Jehoväqa manam ëkata ruranqantsiktatsu rikan, sinöqa pëta kuyar llapan puëdinqantsikta ruranqantsiktam. Pëqa alläpam kushikun llapan puëdinqantsikmannö ruranqantsikpita.
Imakunata yachakunqantsik
Leeqkuna tapukuyanqan
Awmi, Jehoväpaqqa jukllaqllapa o llapampa karpis sirweqninkunapa kawëninqa alläpa valoryoqmi. Tsënö kaptimpis, Salmo 116:15 textochö qellqarëkaqqa manam juk alli nunapa wanïninllapaqtsu parlan.
Wanupakushqakunapaq discursochöqa manam allitsu kanman wanukushqapaq parlarnin tsë textota leiqa, tsë wanukushqa cristiano Jehoväta alli sirwikar wanushqa kaptimpis. ¿Imanir? Porque tsë textoqa manam juk sirweqpa kawëninllapaqtsu parlëkan. Tsëpa rantinqa, llapan sirweqninkuna paqwë ushakäriyänantaqa alläpa jatun desgraciatanö rikarnin, Jehová tsë pasananta mana jaqinampaq kaqtam Salmo qellqaqqa rikätsikïkarqan (rikäri Sal. 72:14 y 116:8).
Awmi, kë textoqa rikätsimantsik llapan sirweqninkunata ushakätsiyänantaqa Jehová mana jaqinampaq kaqtam. Tsëtam rikätsikun kanan witsan imëkakunapa pasanqantsik. Ushakätsimënintsikta tïrayaptin y qatikachämashqa alli tsarakunqantsikqa rikätsikun paqwë mana ushakänapaq Dios tsapëkamanqantsiktam.
9-15 DE DICIEMBRI
BIBLIAPITA ALLI YACHAKUNAPAQ SALMUS 119:1-56
“¿Imanöraq juk jövin mana allikunata mana rurar kawanman?”
w87-S 1/11 päg. 18 pärr. 10
¿Llapanchöku limpiu kanki?
10 Apostol Pablum kënö nirqan: “Qamkunaqa allim musyayanki y entiendiyanki, oqllanakur melanëpaqkunata ruraqkuna, melanëpaq rurëkunata ruraqkuna y santukunata adoraq cuenta imatapis ërayëpa munaqkunaqa, Teyta Diospa y Cristupa Gobiernunchö ima herenciatapis mana chaskiyänampaq kaqta” (Efesius 5:5). Oqllanakur melanëpaqkunata rurar ‘cuerpumpa contran’ jutsata rurayaptinmi, cada wata congregacionpita mëtsikaqta qarquyan o Bibliawan cläru consejayan (1 Corintius 6:18). Tsënöqa pasan Diospa ‘palabranta’ mana cäsukuyaptinmi (Salmus 119:9). Atskaq wawqi panikunam vacacionchö karqa imanö portakuyanqanchö cuidakuyantsu. Wawqi panikunawan juntakuyänampa rantinmi masqa vacacionchö këkaq nunakunawan juntakuyan. Wakin cristiänukunaqa alli nuna kayanqanta pensarmi, Diosta mana sirweq nunakunawan imëkata patsätsiyashqa. Wakinnam trabajaq mayinkunawan alläpa amïgu kayan. Tsënömi juk anciänuta pasarqan. Pëqa trabajaq mayinwan alläpa amïgu karmi, familianta dejëkur tsë warmiwan ëwakurqan y congregacionpita qarqushqa karqan. Tsëmi rikätsikun Bibliachö kënö ninqan rasunlla kanqanta: “Mana alli nunakunawan juntakuyqa, alli costumbrikunatam oqratsikun” (1 Corintius 15:33).
w06-S 15/6 päg. 25 pärr. 1
“Leynikikunatam alläpa kuyä”
JEHOVÄPA leyninkunaqa mana alli tiempuchö alli tsarakunapaqmi yanapamantsik. Tsë leykunataqa yachakuntsik kikintsik Bibliata leyirnin, reunionkunachö comentayämuptin o discursukunata rurayämuptinmi. Bibliata leyir o reunionkunachö yachakunqantsiktaqa capazchi unëpitana musyantsik. Tsënö kaptimpis, qonqë shonqu karmi tsëkunata qonqarishwan. Tsëmi Jehovä rurëta munanqanta, leyninkunata y mandamanqantsikta yarpätsimänata wanantsik. Jehovä yarpätsimanqantsikqa kallpayoq kanapaq y sirwinapaq imanir decidinqantsikta yarpänapaqmi yanapamantsik. Tsëmi Salmusta qellqaqpis Jehoväpaq kënö nir cantarqan: “Leynikikunatam alläpa kuyä” (Salmus 119:24).
Mana alli kaqtaqa ama rikäshuntsu
2 Pero nawintsikwan pensënintsikqa pasëpam yanapanakuyan, tsëmi nawintsik mana allikunata rikänantaqa pasëpa cuidanantsik, peqantsik llutankunata mana yarpänampaq. Imëkatapis mana allikunata rikarashqaqa munapëman y rurëmanmi apakun. Satanaspa makinchö këkaq mana alli mundoqa imëka mana alli munëkunatam churamun y rikätsimantsik, y tsëkunata ichikllapis rikärishqaqa mana allimanmi ishkiratsimashwan (1 Juan 5:19). Tsëmi salmistapis Diosman kënö mañakurqan: “Yanapëkallamë nawillä mana alli kaqtaqa mana rikänampaq, kawëkaqta katsimë nänikichö” (Sal. 119:37).
Imakunata yachakunqantsik
w05-S 15/4 päg. 10 pärr. 2
Jehoväpa Palabranman confiakushun
2 Salmus librupa 119 kaq capïtulunchömi rikätsikun Diospa Palabran imanö yanapamanqantsikta. Tsëchö willakunqanta yarpäyänampaqmi tsë salmusta qellqaqqa 176 versïculunkunata 22 grüpuman rakirqan. Cada grüpuchömi 8 versïculukuna kan y hebreu idiömachöqa llapampis tsë palabrawanmi qallan. Tsëchömi Diospa Palabrampaq parlar, Diospa leynin, consëjun, munanqan, mandakunqan, mandamientun, juzgarnin condenanqan y palabran kanqanta nirqan. Këchö y qateqnin kaqchöqa, hebreu idiömapita alli traduciyanqan Bibliawanmi Salmus librupa 119 kaq capïtulumpita yachakushun. Jehoväpa unë sirweqninkuna y kanan sirweqninkuna pasayanqanta yachakurmi, tsë Salmuschö willakunqanta mas entiendishun y Palabran Bibliapita Diosnintsikta agradecikushun.
16-22 DE DICIEMBRI
BIBLIAPITA ALLI YACHAKUNAPAQ SALMUS 119:57-120
¿Imatan yanapamäshun imapa pasarpis alli aguantanapaq?
w06-S 15/6 päg. 20 pärr. 2
“¡Leynikitaqa alläpam kuyä!”
2 Salmus libruta qellqaqtaqa, ¿imanötan Diospa leynin yanaparqan? Jehovä pëpaq yarpachakunqanta musyanqanmi alli tsarakunampaq yanaparqan. Chikeqninkuna imëkata rurar sufritsiyaptimpis, Jehoväpa leynin imanö yanapanqanta rikarmi alläpa kushikoq y Jehovä alli tratanqantam cuentata qokurqan. Diospa leyninqa chikeqninkunapita mas yachaq kanampaq y salvakunampaqmi yanaparqan. Tsë leykunata cäsukurmi yamë kawakurqan y alli concienciayoq karqan (Salmus 119:1, 9, 65, 93, 98, 165).
w00-S 1/12 päg. 14 pärr. 3
¿Valorantsikku Jehovä mandakunqankunata?
3 Salmusta qellqaqqa Jehovä mandakunqanta alläpa valorarmi kënö cantarqan: “Mandamientuykikunataqa rasmi o sasmi cumplï. Mana alli nunakuna entëru lädüman trampata churayämuptimpis, noqaqa manam leynikita qonqätsu” (Salmus 119:60, 61). Jehovä mandakunqankunaqa imëkata rurar sufritsimashqapis alli tsarakunapaqmi yanapamantsik. Noqantsikqa musyantsikmi chikimaqnintsikkuna ima atäjuta churayämuptimpis Jehovä ushakätsita puëdinqanta. Pëqa Gobiernumpita yachatsikunapaqmi ima atäjutapis tiempunchö ushakätsimunqa (Marcus 13:10).
w06-S 1/9 päg. 14 pärr. 4
Salmus librupita yachakunapaq
Salmus 119:71. ¿Imanötan llakikur sufrinqantsikqa yanapamashwan? Mana allikunapa pasarmi, Jehoväman mas confiakushun, llapan shonquntsikwan mañakushun, Bibliata mas seguïdu yachakushun y Jehovä mandamanqantsikta cäsukushun. Imachö alliyänapaq kaqta musyanapaqpis yanapamantsikmi. Tsëmi imapapis pasarqa, cölerakunantsikpa rantin mas alliyänapaq kallpachakunantsik.
“Waqaq kaqkunawan waqayë”
3 Llakipäkoq Teytantsik Jehovächömi rasumpëpa shoqakïtaqa tarintsik (leyi 2 Corintius 1:3, 4). Pëllam nunakuna imanö sientiyanqanta entiendin. Tsëmi, “noqam shoqëkäyäshoqnikikuna kä” nir sirweqninkunata änin (Is. 51:12; Sal. 119:50, 52, 76).
5 Jehovä yanapamänapaq kaqmanqa chipyëpam markäkunantsik. Tsëmi shonquntsikchö imanö sientikunqantsiktaqa llapanta willanantsik. Imanö sientikunqantsikta Jehovä entiendinqanta y shoqamanqantsikta musyëqa alläpam yanapamantsik. Peru ¿imanötaq shoqamantsik?
Imakunata yachakunqantsik
Kuyakïniki ushakänanta ama jaqitsu
11 Jehoväta sirweqkunaqa Palabranchö këkaq rasumpa kaq yachatsikïtam kuyantsik. Tsëmi Jesusqa Teytanta kënö nirqan: “Palabrëkim rasumpa kaqqa” (Juan 17:17). Y Diospa Palabranchö këkaq rasumpa kaqta kuyanapaqqa, imata yachatsikunqantam musyanantsik (Colosensis 1:10). Peru manam tsëllatatsu ruranantsik. Salmus librupa 119 kaq capïtulunta qellqaqmi imata ruranapaq kaqta entienditsimantsik (leyi Salmus 119:97-100). Awmi, cada junaqmi Bibliata leyinqantsikkunaman pensanantsik. Y tsënö ruranqantsik imanö yanapamänapaq kaqta pensarqa, Diospa Palabrantam mas kuyashun.
12 Salmus librupa 119 kaq capïtulunta qellqaqqa, jina kënöpis nirqanmi: “¡Qam ninqëkikunaqa shimïchö alläpam mishkïkun, mielpitapis masmi mishkin!” (Salmus 119:103). Diospa markan ruramunqan publicacionkunaqa mishki mikï cuentam kayan. Imatapis gustamanqantsikta mikurqa, manam ushëpa ushartsu mikukurkuntsik. Jina tsënöllam, Diospa Palabrantapis ushëpa ushartsu leyinantsik. Sinöqa leyinqantsikmanmi pensanantsik. Tsënöpam, rasumpa kaq ‘kuyëllapaq palabrakunata’ leyinqantsikta yarpäshun y wakinkunata yanapanapaqmi utilizäshun (Eclesiastes 12:10).
23-29 DE DICIEMBRI
BIBLIAPITA ALLI YACHAKUNAPAQ SALMUS 119:121-176
¿Imatan yanapamäshun mana envänu sufrinapaq?
¿Imanötaq concienciantsikta alleq yachatsishwan?
5 Diosnintsikpa leyninkuna yanapamänapaqqa manam leyinantsikllatsu ni musyanantsikllatsu, sinöqa kuyanantsik y respetanantsikmi. Diospa Palabranmi nimantsik mana alli rurëkunata chikinapaq, y alli kaqkunata kuyanapaq (Amos 5:15). Këta maslla entiendirinapaq këman pensarishun, atska tiempupana punïta mana puëdirnin doctorman ëwashwan, y pëna niramashwan imakunata mikunapaq o mana mikunapaq kaqta, ejerciciuta ruranapaq y mana alli rurëkunata jaqinapaq. Y nimanqantsikta rurarnin allina sientikurqa, ¿manatsuraq tsë doctorta y consëjukunata mas valorashwan?
6 Jina tsënömi Jehoväpis jutsa rurëkunaman mana ishkinapaq leykunata qomarquntsik, tsënöpam mana allikunata ruranqantsikpita sufrintsiktsu. ¿Manaku mas kushishqa kawakuntsik, mana engañakurnin, mana suwakurnin, jukwan jukwan mana kakurnin, geniuntsikta alli dominarnin y brujerïa cösaskunaman mana mëtikurnin? (leyi Proverbius 6:16-19; Rev. 21:8). Biblia nimanqantsikta wiyakunqantsikrëkur mas alli kawakurqa, masmi Jehoväta y leyninkunata kuyantsik.
w93-S 15/4 päg. 17 pärr. 12
Jövinkuna, ¿imatataq rurëta munayanki?
12 Mana alli rurëkunata mana ruranëkipaq y melanänëkipaqmi masqa kallpachakunëki (Salmus 97:10). ¿Imatan yanapashunki allinö kaptimpis y kushikuypaqnö kaptimpis mana alli rurëkunata mana ruranëkipaq? Imaman chätsishunëkipaq kaqmanmi pensanëki. Gälatas 6:7 y 8 textuchömi kënö nin: “Ama engañakuyëtsu: manam Teyta Diospitaqa pï nunapis burlakuyta puëdintsu. Awmi, pï nunapis muruykanqantam cosechanqa. Jutsa ruraq cuerpun munanqanman yarpëkur muroqqa, jutsa ruraq cuerpun munanqanta ruranqampitam imëka mana allikunata cosechanqa”. Piwampis oqllanakuyman pensarqa, tsëta ruraptiki Jehovä imanö sientikunampaq kaqman pensë (rikäri Salmus 78:41 ninqanta). Piwampis oqllanakurqa qeshyaqmi tikrarinkiman o sïda niyanqanwanmi qeshyarinkiman. Mana allita ruranqëkipitam alläpa llakikunki y manam kikikitapis respetakunkinatsu. Manam tsëllatsu, mana allita ruranqëkipitaqa shamoq tiempuchöpis sufrinkimanmi. Juk panim kënö willakun: “Noqawan qowa o runaqa manaraq casakushqa karmi jukwan oqllanakushqa kayarqä. Kananqa cristiänunam kayä, tsënö kaptimpis unë rurayanqäta yarparmi höraqa discutiyä y cëlanakuyä”. Mana allikunata rurarqa capazchi congregacionchö carguykitapis dejanki o congregacionpita qarqushqa kanki (1 Corintius 5:9-13). Tsëqa, ¿allitsuraq kanman juk rätulla kushikuyta munar tsë llapanta sufrinqëki?
Imakunata yachakunqantsik
Teyta Diospa Palabranqa rasumpa kaqllam
2 Noqantsikqa segürum këkantsik Teyta Jehoväqa rasumpa kaqllata parlanqanta y imëpis alli kanantsikta munanqanta (Sal. 31:5; Is. 48:17). Palabran Bibliachö ninqanmampis confiakuntsikmi. Tsënöqa confiakuntsik ‘palabranqa llapampis rasumpa kaqlla’ kaptinmi (leyi Salmus 119:160). Bibliata estudiaq juk yachaq nunam kënö nirqan: “Dios ninqanchöqa llapampis rasun kaqllam, manam juk palabrallapis engañakoqqa kantsu. Diospa sirweqninkunaqa pëman confiakurmi, Palabranmampis confiakuyan”. Tsënö ninqanqa rasun kaqllam.
30 DE DICIEMBRIPITA 5 DE ENËRUYAQ
BIBLIAPITA ALLI YACHAKUNAPAQ SALMUS 120-126
Juk tiempupa waqarpis tsëpitaqa kushikuyarqanmi
w04-S 1/6 päg. 16 pärr. 10
Diosta alabaqkunaqa alläpam kushikuyanqa
10 Jesuspa qateqnin kanapaq decidirqa Diablupa contranmi churakantsik. Santiägu 4:7 textuchömi kënö nin: “Diablupa contran churakäyë, y pëqa qeshpirmi qamkunapita ëwakunqa”. Tsënö kaptimpis, Diosnintsikta sirwiqa manam fäciltsu, alliran kallpachakunantsik (Lücas 13:24). Peru Salmus 126:5 textuchömi këta willakun: “Waqar waqar murukoqkunaqa, alläpa kushishqam qayëkachar cosechayanqa”. Këchö willakunqannöpis Diosnintsikqa alläpa agradecikoqmi. Tsëmi “shonqupita asheqninkunata” y alabaqninkunataqa bendicin (Hebrëus 11:6).
¿Diosman markäkunkitsuraq?
17 ¿Familiëkipita mëqanllatapis wanupakurqunkiku? Tsëqa Diosman markäkur sïguinëkipaq, kawarimushqa nunakunapaq Bibliachö ninqanta leyi. ¿Familiëkipita mëqantapis congregacionpita qarquriyashqa kayaptinku llakishqa këkanki? Kuyamarnintsik Diosnintsik corregimanqantsikta següru kanëkipaq, Bibliapita mas yachakuy. Ima pasashuptikipis, Diosman mas markäkunëkipaq kallpachakuy. Imanö këkanqëkita Jehoväta willë. Amïguykikunawan juntu këta procurë (Prov. 18:1). Waqar o llakishqa këkarpis, Diosta mas sirwinëkipaq kallpachakuy (Sal. 126:5, 6). Reunionkunaman ëwëta, Diospita yachatsikuyta y Bibliata leyita ama dejëtsu. Jehovä änishunqëkiman imëpis yarparë. Imanö yanapashunqëkita rikarqa, masmi Pëman markäkunki.
w01-S 15/7 pägk. 18, 19 pärrk. 13, 14
Nunakunata yachatsir sïguishun
13 Imëkata rurayaptin sufrikaq cristiänukunata y wakin cristiänukunatapis, Salmus 126:5 y 6 textuchö kënö ninqanmi alläpa yanapamantsik: “Waqar waqar murukoqkunaqa, alläpa kushishqam qayëkachar cosechayanqa. Murun apakurkur waqar waqarpis yarqoq kaqqa, manöjun mellqashqanam qayëkachar kushishqa kutimunqa”. Salmusta qellqaq ninqanmi rikätsikun Babiloniapita markankunaman kutiyaptin israelïtakunata Jehovä imanö cuidanqanta y bendicinqanta. Babiloniapita kushishqa yarqurpis, 70 watapana jitaräkunqan chakrankunata mururqa capazchi israelïtakuna waqayarqan. Tsënö kaptimpis, murur sïgueqkuna y markapa murällanta perqar yanapakoqkunaqa alläpam kushikuyarqan.
14 Mana allikunapa pasar o wawqi panintsikkuna allita rurayanqampita sufriyaptinqa, capazchi noqantsikpis waqashun (1 Pëdru 3:14). O Bibliapita yachatsikushqa nunakuna mana wiyakuyaptinqa capazchi llakikushun. Peru nunakunata watukar y yachatsir sïguishqaqa, Diosnintsik yanapaptinmi mana pensayanqan cambiukunatapis rurayanqa (1 Corintius 3:6). Mëtsika Bibliakunata y publicacionkunata qarakunqantsikmi tsënö kanqanta cläru rikätsikun.
Imakunata yachakunqantsik
¿Pimantaq rikarantsik?
1 KANANQA ‘alläpa mana alli tiempukunachömi’ kawëkantsik, y alli kawakï tiempu chämunqanyaqqa imëka mana allikunapam pasashun (2 Tim. 3:1). Tsëmi kënö tapukunantsik: “¿Pimantaq rikarantsik?”, juk parlakïchöqa, ¿pitataq yanapamänapaq ashintsik y pï nimanqantsiktataq rurëta munantsik? Itsa kë tapukïtaqa llapantsikpis kënö contestashwan: “Jehovätam ashï” nir. Y tsënö ninqantsikqa alläpa allim.
2 ¿Ima ninantaq Jehoväman rikarëqa? Y ¿imatataq rurashwan problëmakunapa pasanqantsik höra Jehovällaman rikaraq cuenta yanapakïninta ashinapaq? Salmus qellqaqmi nirqan, problëmakunapa pasanqantsik höra yanapamänapaq Jehoväman rikarëqa alläpa precisanqanta (leyi Salmus 123:1-4). Juk sirwipakoq ruranqantawanmi igualatsirqan. “Juk sirwipakoq nuna patronnimpa makinta rikaran” nirqa, manam mikïnin qonanta munar y imapitapis tsapänanta munar rikaranqanllapaqtsu parlëkan. Sinöqa patronnintaqa rikaran, imata munanqanta cuentata qokunampaq y tsënöpa munanqanta ruranampaqmi. Jina tsënöllam Diospa munënin ima kanqanta entiendinapaq y nimanqantsiknölla ruranapaqqa, cada junaq Bibliapita yachakunantsik precisan. Tsëta rurashqallam Diosnintsikqa yanapamäshun (Efes. 5:17).