32 KAQ
Teyta Dios munanqannö humildi y alli tantiaq kashun
“Alli tantiëkur imatapis ruranatam Teyta Diosqa munan” (MIQ. 6:8, TNM).
31 KAQ CANCION Jehoväwan imëpis purikäshun
KËPITAM YACHAKUSHUNa
1. David qellqanqanchöqa, ¿imatatan Jehoväpaq nirqan?
JEHOVÄ humildi kanqantaqa, ¿imanötan musyantsik? Tsëtaqa musyantsik David kënö ninqanchömi: “Qammi escüdü kar imapitapis tsapämar salvamarqunki. Ankupämarmi llapanchöpis yanapamarqunki” (2 Sam. 22:36; Sal. 18:35). David kënö qellqarqa, itsa pensëkarqan Diospa willakoqnin Samuel wayinta ëwëkur Israelpa reynin kanampaq ninqanman. Wawqinkunapita ultimu kaq kaptimpis, Saulpa rantin rey kanampaqmi Jehoväqa Davidta akrarqan (1 Sam. 16:1, 10-13).
2. ¿Imakunapitatan yachakushun?
2 “Tsëpitam rikëkämun ciëlutapis y kë patsatapis. Teyta Diosqa waktsakunata yanapanmi. [...] Markanchö respetashqa nuna kananpaqmi churan” (Sal. 113:6-8). Kë salmusta qellqaq nunanöchi Davidqa Jehoväpaq pensarqan. Kananqa Jehovä humildi kanqampita y noqantsikpis humildi kanapaqmi yachakushun. Tsëpitanam rey Saulpita, Diospa willakoqnin Danielpita y Jesuspita tantiaq këta yachakushun.
¿IMATATAN JEHOVÄPITA YACHAKUNTSIK?
3. Jehovä tratamanqantsikchöqa, ¿imanö kanqantatan rikantsik?
3 Jutsasapa nunakunata imanö tratanqanchömi, Jehovä humildi kanqantaqa rikantsik. Pëqa manam sirweqnin kanallatatsu munan sinöqa amïgun kanatam (Sal. 25:14). Jehoväqa, pëwan amïgu kanapaqmi tsurin Jesus wanunanta permitirqan. Awmi, ¡imanö ankupäkoq o llakipäkoqmi Teyta Diosnintsikqa!
4. ¿Imanö kanapaqtan Jehovä ruramashqantsik?
4 Jehoväqa humildi karmi imatapis kikintsik akrar ruranapaq dejamantsik. Tsënö ruramanqantsikchömi rikantsik kikin rikoq kanqantsikta. Jehoväpa lädunchöqa mana kaqllam kantsik, tsënö kaptimpis pëta kuyarnin sirwinata y cäsukunatam munan (Deut. 10:12; Is. 48:17, 18). Kushikuypaqmi Jehovä humildi kanqanqa.
Jesuswan 144.000 ciëlupaq akrashqakunam mëtsika angelkunata rikarëkäyan. Wakin angelkunanam Patsaman urëkäyan. Kë dibüjuchö rikanqantsik angelkunatam, imëka cargukunachö yanapakuyänampaq Jehovä churashqa (Rikäri 5 kaq pärrafuta).
5. ¿Imanötan humildi këta Jehovä yachatsimantsik? (Qaranchö dibüjutawan rikäri).
5 Jehoväqa kuyëllapa y shumaqllam humildi këta yachatsimantsik. Pëlla mas puëdeq karnimpis, ninqantsikkunataqa wiyamantsikmi. Tsënö kanqantaqa rikantsik tsurin Jesuspa yanapakuyninwan llapan rikanqantsikta kamanqanchömi (Prov. 8:27-30; Col. 1:15, 16). Awmi, Jehovä llapanta puëdikarpis jukkuna yanapayänantam permitin. Tsëtaqa musyantsik Gobiernunchö mandakoq kayänampaq Jesusta y 144.000 ciëlupaq akrashqakunata churanqanchömi (Lüc. 12:32). Jesustaqa Rey y Mandakoq kaq Sacerdöti kanampaqmi yachatsirqan (Heb. 5:8, 9). Y Jesuswan mandakoq kaqkunatapis yachatsinran, peru manam imanö rurayanqantaqa rikaräkuntsu. Tsëpa rantinqa alli rurayänampaq kaqmanmi markäkun o yärakun (Rev. 5:10).
Wakinkunata imatapis rurayänampaq yachatsirqa Jehovänömi rurëkantsik. (Rikäri 6 y 7 kaq pärrafukunata).b
6, 7. Carguyoq kaqkunaqa, ¿imanötan Teyta Diosnö kayanman?
6 Jehoväqa, pillapis yanapananta mana wanëkarpis yanapayänampaqmi permitin. Tsënö pë këkaptinqa noqantsiknäqa masraqchi. Tsëqa, ¿imanötan teyta kaqkuna y creikoqkunata rikaq wawqikunaqa Jehovänö rurayanman? Wakinkuna yanapayänanta permitir y rurayanqanman markäkurnin o yärakurninmi. Tsënö rurarqa, imapis mas alli rurakänampaqmi yanapakuyanqa (Is. 41:10). Carguyoq kaqkunaqa, ¿ima mastatan Jehoväpita yachakuyanman?
7 Bibliachöqa tarintsik, angelkuna parlapäyaptin Jehovä wiyanqantam (1 Rey. 22:19-22). ¿Imanötan teytakunaqa Jehovänö kayanman? Tsëtaqa rurayanman wamrankunata tapuparnin y niyanqanta wiyarninmi.
8. Abrahantawan Särataqa, ¿imanötan Jehovä pacienciawan tratarqan?
8 Pacienciayoq kanqanchömi Jehoväpa humildi këninqa rikakun. Tsënö kanqantaqa musyantsik sirweqninkunata pacienciawan wiyanqanchömi. Tsënömi rurarqan Abrahan Sodöma y Gomörra markakunapaq parlapanqanchö (Gen. 18:22-33). Jehovä pacienciakoq kanqanqa rikakurqan, wamrayoq kanampaq niptin Sära asikunqanchömi. Cölerakunampa rantinmi shumaq tratarqan (Gen. 18:10-14).
9. Teytakunawan creikoqkunata rikaq wawqikunaqa, ¿imatatan Jehoväpita yachakuyan?
9 Teyta o creikoqkunata rikaq karninqa, ¿imatatan Jehoväpita yachakunkiman? Carguïkichö kaqkuna imatapis nishuptikiqa, ¿rasllatsuraq cölerakunkiman? O ¿imanir tsënö ninqanmantsuraq pensankiman? Jehovänö pacienciayoq karqa, familiantsikta y wawqi panintsikkunatam shumaq yanapashun. Këyaqmi Jehovä humildi kanqampita yachakurquntsik. Kananna yachakurishun Teyta Diospa unë sirweqninkunapita.
¿IMATATAN YACHAKUNTSIK SAULPITA, DAVIDPITA Y JESUSPITA?
10. ¿Imanötan Jehoväqa yachatsimantsik?
10 Jehovä imëkata yachaq karninmi, Palabran Bibliawan imëkata yachatsimantsik (Is. 30:20, 21). Teyta Diospa unë sirweqninkunapita wakinqa alli tantiëkur imatapis rurarmi kushitsiyaq, peru wakinqa tsënö mana rurarmi llakitsiyaq (Sal. 37:37; 1 Cor. 10:11).
11. Saul mana alli ruranqankunapitaqa, ¿imatatan yachakuntsik?
11 Rey Saulpita yachakurishun. Jövin karninqa alli tantiëkurmi imatapis ruraq, peru ima carguchöpis yanapakunampaq niyaptinqa mantsakurmi munaqtsu (1 Sam. 9:21; 10:20-22). Rey kanampaq churariyaptinqa, allish tukurmi mana ruranampaq kaqkunata rurar qallëkurqan. Tsëqa pasarqan Diospa willakoqnin Samuel mana chaptin, Diospa qarëninta rupatsinqanchömi. Tsënö ruraptinmi, Jehoväqa allipanatsu rikarqan y rey kanantapis munarqannatsu (1 Sam. 13:8-14). Këpitaqa yachakuntsik alli tantiëkur imatapis ruranapaqmi.
12. Alli tantiëkur imatapis ruranapaqqa, ¿imanötan Daniel yachatsimantsik?
12 Teyta Diospa willakoqnin Danielpitaqa alli tantiaq këtam yachakuntsik. Pëqa Jehovä yanapaptinmi wanukunqanyaq humildi y alli tantiëkur imatapis ruraq nuna karqan. Tsënö kanqantaqa rikätsikurqan, Jehovä Dios yanapaptin Nabucodonosor suëñukunqanta cläru ninqanchömi (Dan. 2:26-28). Këpitaqa yachakuntsik, Diospa wayinchö yachatsikushqa wawqi panikuna alabapämashqa Jehoväta agradecikunapaqmi. Awmi, Danielnö alli tantiëkur imatapis rurashun (Filip. 4:13). Tsënömi Jesuspa qateqnin kanqantsikpis rikakunqa.
13. Juan 5:19, 30 ninqannö, ¿imanötan Jesusqa alli tantiaq këta yachatsimantsik?
13 Teyta Diospa tsurin këkarpis, Jesusqa manam allish tukurqantsu (leyi Juan 5:19, 30). Pëqa manam Teytanwan igual këtaqa munarqantsu. Tsëpaqmi Filipensis 2:6 kënö nin: “Manam Diosllapa kaqta qochitaqa ni ichikllapis pensarqantsu, juk parlakïchöqa, Dioswan igual këtaqa”. Jesusqa puëdinqanllata rurarmi Teytanta yanaparqan.
Jesusqa allim musyarqan Teytanwan igual mana kanqanta, tsëmi respetarqan. (Rikäri 14 kaq pärrafuta).
14. Rurëta mana puëdinqanta mañayaptinqa, ¿imatatan Jesus rurarqan?
14 Juk kutim Jesusta Santiägupawan Juanpa maman kënö nirqan: “Ishkan wamräkuna Gobiernïkichö juknin derëcha kaq lädïkiman y jukninna itsoq kaq lädïkiman täkuyänampaq änïkallämë” (Mat. 20:20-23). Tsënö niptinnam Jesusqa, tsë rurëta mana puëdinqanta nirqan. Tsënömi rikätsikurqan Teytan Jehoväta respetanqanta (Juan 12:49). Noqantsikqa, ¿imatatan yachakuntsik?
¿Imanötan Jesusnö alli tantiaq kanantsik? (Rikäri 15 y 16 kaq pärrafukunata).c
15, 16. 1 Corintius 4:6 ninqantaqa, ¿imanötan cäsukushun?
15 Jesusnö alli tantiëkur imatapis rurarqa, 1 Corintius 4:6 kënö mandakunqantam cäsukunantsik: “Qellqashqa këkaqkunapita mastaqa ama rurëtsu”. Pillapis yanaparamë nimashqaqa, ama pensanqantsiknö imatapis rasllaqa nishuntsu. Tsëpa rantinqa, Biblia ninqanwanmi yanapanantsik. Tsënömi rikätsikushun, Jehoväta cäsukurninlla imatapis alli tantiëkur ruraq kanqantsikta (Rev. 15:3, 4).
16 Jehovä respetashqa kanampaqqa, humildi y alli tantiëkur imatapis ruraqmi kanantsik. Kë yachakunqantsikkuna kushishqa kanapaq y wakinkunawan alli kanapaq yanapamanqantsikta yachakurishun.
¿IMANÖTAN HUMILDI Y TANTIAQ KË YANAPAKUN?
17. Humildi y alli tantiaq nunakunaqa, ¿imanirtan kushishqa kayan?
17 Kushishqa kanapaqqa, humildi y alli tantiëta yachaqmi kanantsik. Tsënö karqa wakinkuna yanapamanqantsiktam kushishqa wiyakushun. Tsëpaqqa yarpärishun lepra qeshyayoq chunka nunakunata Jesus kachakätsinqanta. Tsë kachakaq nunakunapitaqa jukllëllam agradecikoq kutirqan. Humildi karmi tsë nunaqa, kikinllapita mana kachakänampaq kaqta musyar Teyta Diosta agradecikurqan (Lüc. 17:11-19).
18. Romänus 12:10 ninqannö, ¿imanötan wakinkunawan alli kanapaq Humildi y tantiaq kë yanapakun?
18 Humildi y alli tantiëkur imatapis ruraq nunakunataqa pï mëpis kuyanmi. Tsënö karqa wakinkuna mas alli kayanqanta creirmi pëkunaman markäkuyanqa o yärakuyanqa. Y wakinkuna carguyoq kayanqampitam kushikuyan (leyi Romänus 12:10).
19. ¿Imanirtan allish tukoqqa kanantsiktsu?
19 Allish tukoqkunapaqqa manam fäciltsu wakinkunachö alli kaqta rikëqa. Tsëpa rantinqa kikinkunalla alli rurayanqantam pensayan. Tsëmi chiki y allish tukurnin wakinkunata yachatsiyantsu y ima cargumampis churayantsu munayanqannö imatapis rurakuyänampaq (Gäl. 5:26). Tsënö kaqkunapaqa manam amïgunkunapis kantsu. Tsënö chiki y allish tukuy shonquntsikchö kaptinqa, Jehoväta yanapëkamänapaq mañakushun (Rom. 12:2).
20. ¿Imanirtan humildi y alli tantiaq kanantsik?
20 Humildi kanapaq Jehovä yachatsimanqantsikpitaqa agradecikuntsikmi. Pëqa humildi kanqanta rikätsikurqan sirweqninkunata tratanqanchömi, tsënöllam noqantsikpis ruranantsik. Noqantsikqa Jehoväpa unë witsan sirweqninkuna humildi y alli tantiëkur rurayanqannömi rurëta munantsik. Tsëmi Jehovä Diosllata alabanapaq y respetanapaq kallpachakunantsik (Rev. 4:11). Awmi, Teyta Diosnintsikqa humildikunata y alli tantiëkur imatapis ruraqkunataqa kuyanmi.
123 KAQ CANCION Llapan shonquntsikwan Jehoväta cäsukushun
a Ankupäkoq o llakipäkoqqa humildim. Tsëtaqa rikantsik Jehovä Dios humildi kanqanchömi. Tsëmi pënö humildi kanapaq rey Saulpita, Diospa willakoqnin Danielpita y Jesuspita tantiaq këta yachakushun.
b Creikoqkunata rikaq wawqim jövin wawqita kushishqa yachëkätsin. Tsëpitaqa imanö ruranqanman mana yarparäkushpam, jövin wawqiman markäkun o yärakun.
c Juk iglesiachö casëman invitayaptinmi, juk paniqa creikoqkunata rikaq wawqita tapupëkan. Kë wawqiqa kikin pensanqanta mana nishpam, Bibliachö ninqanwan yanapëkan.