Jehoväpa amïgun këta puëdinkim

Jehoväqa alli reqinëkitam munan, tsënöpa pë imanö kanqanta y änikunqankunata musyar amïgun kanëkipaq. ¿Rasuntsuraq Dioswan amïgu këta puëdishwan? (Leyi Salmus 25:14). ¿Dioswan amïgu kanëkipaqqa imatataq ruranëki? Këchömi Bibliapita yachakunki imata ruranëkipaq kaqta y Jehoväwan amïgu këqa imëkapitapis mas alli kanqanta.

1 KAQ: ¿Imata ruranëkitataq Jehovä munan?

“Diosman witiyë, y pëqa qamkunamanmi witimunqa” (Santiägu 4:8). Kë textuchö ninqannöpis, pëman witinëkita y amïgun kanëkitam Jehoväqa munan. Tsënö kaptimpis, Diosnintsik mana rikäna kaptinmi wakinqa niyan pëwan amïgu këta mana puëdinqantsikta. Peru Palabran Bibliachömi Diosnintsik imanö kanqanta y amïgun kanapaq imata ruranapaq kaqta yachakuntsik. Jehovä Diosta rikëta mana puëdirpis, Palabran Bibliata leyirmi puëdintsik pëta maslla reqita y amïgun këta.

2 KAQ: ¿Imanirtan Jehoväpa amïgun kanëki?

Jehovänöqa manam pipis kuyashunkitsu. Pëqa munan kushishqa kanëkita y pëman imëpis mañakunëkitam. Bibliachömi kënö nin: “Llapan yarpachakuyanqëkita pëman churarkuyë. Pëqa qamkunapaqmi alläpa yarpachakun” (1 Pëdru 5:7). Jehoväqa listum këkan amïgunkuna pëman mañakuyaptin wiyanampaq, yanapanampaq y shoqanampaq (leyi Salmus 94:18, 19).

3 KAQ: ¿Imatataq ruranantsik Jehoväpa amïgun kanapaq?

Jehoväqa llapan nunakunatam kuyan, peru pëta “respetaqkunallam pëwanqa alli amïgu kayanqa” (Salmus 25:14). Jehoväqa munan amïgunkuna pëta cäsukuyänanta y chikinqankunata mana rurayänantam. Capazchi wakinqa pensayan Jehovä mandakunqankunata cäsukuyqa alläpa difïcil kanqanta. Peru Jehoväqa musyanmi imallachöpis pantarinqantsikta, tsëmi amïgun këta munar kallpachakoqkunataqa kuyan (Salmus 147:11; Hëchus 10:34, 35).

MASLLA YACHAKUSHUN

4 KAQ: Abrahanqa Jehoväpa amïgunmi karqan

Abrahanpaq (o Abranpaq) Bibliachö willakunqanmi yachatsimantsik, Jehoväwan amïgu kanapaq imata ruranantsikpaq kaqta. Leyiyë Genesis 12:1-4 Abrahanpaq ima ninqanta y këkunapaq parlayë:

• ¿Jehoväqa imatataq Abrahanta mandarqan?

• ¿Jehoväqa imatataq Abrahanta änirqan?

• ¿Abrahanqa imatataq rurarqan?

5 KAQ: Amïgunkuna cäsukuyänantam Jehoväqa munan

Llapantsikpis munantsik amïguntsikkuna cäsukoq kayänantam.

• Qamqa, ¿amïguykikuna imanö kayänantataq munanki?

Leyiyë 1 Juan 5:3 ima ninqanta y këpaq parlayë:

• ¿Amïgunkuna imanö kayänantataq Jehovä munan?

Jehovä munanqannö kawanapaqqa mana allikunata rurëta o pensëtam chipyëpa dejanantsik. Leyiyë Isaïas 48:17, 18 ima ninqanta y këpaq parlayë:

• ¿Imanirtan Jehoväqa munan pë mandakunqannö amïgunkuna imatapis rurayänanta?

6 KAQ: Jehoväqa amïgunkunata yanapanmi

VIDEU: Jehovämi yanapamaqnï shamurqan (3:20)

• Videuchö rikanqantsik warmi mana alläpa llakikunampaq, ¿imanötan Jehovä yanaparqan?

Leyiyë Isaïas 41:10, 13 ima ninqanta y këkunapaq parlayë:

• ¿Jehoväqa imatataq amïgunkunata änin?

• Ima ninkitan, ¿Jehoväqa alli amïgutsuraq?

7 KAQ: Jehoväwanmi imëpis parlanantsik

Amïguntsikkunawan mas parlapänakurqa masmi reqinakuntsik y kuyanakuntsik. Leyiyë Salmus 86:6, 11 ima ninqanta y këkunapaq parlayë:

• ¿Imanötan Jehoväwan parlantsik?

• ¿Imanötan Jehoväqa parlapämantsik?

KËTAM YACHAKURQUNKI

Jehoväqa amïguyki këtam munan. Pëmi yanapashunki pëta mas reqinëkipaq y kuyanëkipaq.

¿Yarpankiku?

• ¿Jehoväqa imanötan amïgunkunata yanapan?

• ¿Imanirtan Jehoväqa munan, amïgunkuna pë mandakunqannö imatapis rurayänanta?

• ¿Amïgunkuna ni imachöpis mana pantayänantaku Jehoväqa shuyaran?

MASTA YACHAKUY

Diospa amïgun kanqëki imanö yanapashunqëkita yachakuy.

“Teyta Jehoväta reqinqantsikqa yanapamantsikmi” (Täpakoq, 15 de febrëru 2003)

Dioswan mas amïgu kanëkipaq ima yanapashunëkipaq kaqta yachakuy.

“¿Imataraq ruräman Teyta Diosta mas reqinäpaq y kuyanäpaq?” (Jövinkuna musyëta munayanqan [2 kaq], 35 yachatsikuy)

Jehoväpita yachakunqan juk warmita imanö yanapanqanta leyi.

“Wanïtam alläpa mantsarqä” (Täpakoq, 1 kaq 2017)

Atskaq jövinkuna Jehoväpaq ima niyanqanta wiyë.

¿Ima ninantan Jehoväwan amïgu këqa? (1:46)

6 KAQ: Bautizakurirqa Jehoväpa familiannam kantsik

Bautizakurirqa entëru Patsachö Jehoväpa sirweqninkunawanmi juk familianöllana kantsik. Jehoväta sirweqkunaqa mëpita karpis o imanö kashqa karpis Jehovä munanqannömi sirwintsik y llapan mandamanqantsiktam cäsukuntsik. Leyi Salmus 25:14 y 1 Pëdru 2:17 ima ninqanta y këpaq parlayë:

• Kë versïculukunachö ninqannöpis, ¿bautizakunqantsikqa imanötan yanapamantsik?

2 KAQ: ¿Imatataq ruranantsik kushishqa kawanapaq?

Jehoväqa pë yanapamänata necesitaqtam kamamarquntsik, tsëmi pëta reqita y adorëta munantsik (leyi Mateu 5:3-6). Jehoväqa munan pëwan amïgu kanantsikta, pë ‘munanqannö kawanantsikta’, pëta kuyanantsikta y llapan shonquntsikwan sirwinantsiktam (Deuteronomiu 10:12; Salmus 25:14). Jehoväwan amïgu kar y pëta sirwirqa imëka problëmakuna kaptimpis manam alläpa llakikushuntsu, y kushishqam kawakushun.