38 KAQ YACHAKUNËKIPAQ
Vïdantsikpita Jehoväta agradecikushun
Kawarmi imëkata rurantsik: rikantsik, wiyantsik y kushishqa kantsik. Problëmakunapa pasarpis kushishqa këtaqa puëdintsikmi. ¿Imanötan vïdantsikpita Jehoväta agradecikushwan?
1 KAQ: ¿Imanirtan vïdantsikta cuidanantsik?
Vïdantsikqa Jehoväpa qarëninmi, tsëmi imëpis cuidanantsik. Jehovälla llapantapis kamashqa kaptinmi pë kawatsimashqalla llapantsikpis kawantsik (Salmus 36:9). “Pëmi nunakunata kawëkaqta katsin, shütayänanta permitin y imëkampis faltatsintsu” (Hëchus 17:25, 28). Teytantsik Jehovämi kawanapaq y kushishqa kanapaq imëkata ruramun (leyi Hëchus 14:17).
2 KAQ: ¿Imanötan vïdantsikpita Jehoväta agradecikushwan?
Mamëkipa pachanchö rurakar qallanqëki hörapitam Jehoväqa qampaq yarpachakurqan. Tsëmi gobernanti David Jehoväman mañakur kënö nirqan: “Mamänïpa pachanchö formakar qallëkanqäta rikämurqëkim” (Salmus 139:16). Jehoväpaqqa, vïdëki alläpa väleqmi (leyi Mateu 10:29-31). Teytantsik Jehoväqa alläpam llakikun pitapis wanutsiyaptin o kikinkuna wanutsikuyaptin (Exodu 20:13).a Llakikunmi mana shumaq cuidakur vïdantsikta peligruman churashqa, o jukkunapa vïdankunata peligruman churashqa. Peru alli cuidakur y jukkunatapis alli cuidarqa vïdantsiktam valorantsik.
MASLLA YACHAKUSHUN
Vïdantsikta valoranqantsikta imanö rikätsikunapaq kaqtam yachakushun.
3 KAQ: Mana qeshyanapaq cuidakushun
Jehoväta sirweqkunaqa pë munanqannö kawayänampaqmi änikuyashqa. Tsëmi Jehoväta alli sirwiyänampaqqa sänu kayänampaq cuidakuyänan. Leyiyë Romänus 12:1, 2 ima ninqanta y këkunapaq parlayë:
¿Imanirtan mana qeshyanëkipaq cuidakunkiman?
¿Imatataq rurankiman saludnikita cuidanëkipaq?
4 KAQ: Accidentikunapita cuidakushun
Bibliachöqa nin imëka peligrukunapita cuidakunapaqmi. VIDEUCHÖ rikäyë accidentikuna mana kanampaq imakunachö cuidakunapaq kaqta.
Leyiyë Proverbius 22:3 ima ninqanta, y parlayë accidentikuna mana kanampaq...
... wayichö imata ruranapaq kaqta.
... trabäjuchö imata ruranapaq kaqta.
... pukllarnin imata ruranapaq kaqta.
... cärruchö viajar o manejar imata ruranapaq kaqta.
5 KAQ: Manaraq yureq wamrapa vïdampis alläpa väleqmi
Mamankunapa pachanchö wamrakuna imanö rurakanqanta Jehovä rikanqanta y pëkunapaq yarpachakunqantam gobernanti David qellqarqan. Leyiyë Salmus 139:13-17 ima ninqanta y këpaq parlayë:
Jehoväpaqqa pipis kawar qallan, ¿yurikurir-raqku o maman qeshyaq tikranqanllachöku?
Moises qellqanqan Leychöqa Jehovä mandakurqan imëka accidentikunapita qeshyaq warmikunata cuidayänampaqmi. Leyiyë Exodu 21:22, 23 ima ninqanta y këkunapaq parlayë:
Mamampa pachanllachöraq këkaq wamrata accidentipa wanutsiyaptinqa, ¿wanutseqta imata rurayänampaqtan Jehovä mandakurqan?
¿Imanöraq Jehoväqa sientikun manaraq yurishqa wamrakunata ardëpa wanutsiyaptin?b
¿Imanötan sientikunki manaraq yurishqa wamrakunapa vïdanta Jehovä valoranqanta musyar?
Abortë mana alli kanqanta musyëkarpis capazchi juk warmi abortëta pensarinman. Leyiyë Isaïas 41:10 ima ninqanta y këpaq parlayë:
¿Imataraq juk warmi ruranman abortanampaq obligayaptin?
WAKIN IMA NIYANQAN: “Cada warmim decidinan abortanampaq o mana abortanampaqpis”.
¿Qeshyaq warmipa vïdanta valoranqannöllatsuraq manaraq yureq wamrapa vïdantapis Jehovä valoran? ¿Imanötan tsëta musyantsik?
KËTAM YACHAKURQUNKI
Vïdantsikqa Jehoväpa qarëninmi. Tsëmi Bibliachö ninqannö respetanantsik, cuidanantsik y valoranantsik, peru manam kikintsikpa vïdantsikllatatsu, sinöqa llapankunapatam.
¿Yarpankiku?
¿Imanirtan nintsik Jehoväqa nunakunapa vïdanta alläpa valoranqanta?
¿Imanötan Jehovä Diosqa sientikun nunakuna kikinkuna wanutsikuyaptin o pitapis wanutsiyaptin?
Vïdantsikta Jehovä qaramanqantsikpitaqa, ¿imata yachakunqëkitaq masqa gustashunki?
MASTA YACHAKUY
Vïdantsikpita Jehoväta agradecikunqantsikta, ¿imanötan rikätsikushwan?
Bibliata manaraq estudiarnin abortashqa warmita, ¿Jehovä perdonanmantsuraq?
“¿Imatataq Bibliachö nin abortëpaq?” (jw.org päginachö yarqamoq)
Vïdantsikta peligruman churaq pukllakunapaq Jehovä ima ninqanta leyi.
Kikinkuna wanutsikuyta munaqkuna, tsëman mana pensayänampaq Bibliachö consëjukuna yanapanqanta leyi.
“¿Wanutsikuyta munaptï Bibliachö consëjukuna yanapamanmantsuraq?” (jw.org päginachö yarqamoq)
a Jehoväqa alläpam yarpachakun llakishqa këkaqkunapaq (Salmus 34:18). Tsëmi kikinkuna wanutsikuyta munaqkuna imanö sientikuyanqanta entiendin y yanapëta munan. Jehoväpa consëjunkuna imanö yanapakunqanta musyanëkipaq, “Masta yachakuy” neqchö “¿Wanutsikuyta munaptï Bibliachö consëjukuna yanapamanmantsuraq?” neqta leyi.
b Jehoväta manaraq reqir abortashqa kaqkunaqa manam llakishqallaqa kawakuyänantsu, Jehoväqa pëkunata perdonanmi. “Masta yachakuy” neqchö “¿Imatataq Bibliachö nin abortëpaq?” neqta leyi.