Congregacionchö imëkata rurar yanapakuy

Jehoväpa testïgunkunaqa entëru Patsachömi mëtsika congregacionkunachö Jehoväta kushishqa sirwiyan. Pëkunaqa, yachakuyanqankunata alläpam valorayan y kushishqam congregacionchö imëkata rurar yanapakuyan. Y qamqa, ¿imanötan congregacionchö sientikunki?

1 KAQ: ¿Imanötan tiempuykiwan y kallpëkiwan congregacionchö yanapakunkiman?

Congregacionchöqa llapantsikmi imallachöpis yanapakuyta puëdintsik. ¿Këkanqëki congregacionchö kanku edäna o qeshyëkaq wawqi panikuna? ¿Imanöraq pëkunata yanaparinkiman? Capazchi reunionkunaman apankiman, rantipakoq ëwaptin yanaparinkiman o wayinchö imakunata rurarllapis yanaparinkiman (leyi Santiägu 1:27). Reunionnintsikta rurana wayita limpiapakur y altsapakurpis yanapakuyta puëdintsikmi. Peru yanapakunapaqqa manam pipis obligamantsiktsu, sinöqa Teytantsik Jehoväta y wawqi panintsikkunata kuyarmi yanapakuntsik (Salmus 110:3).

Bautizakushqana kaqkunaqa masraqmi yanapakuyta puëdiyan. Wakin wawqikunaqa siervu ministerial kayänampaq y tiempuwanqa anciänu kayänampaqmi kallpachakuyan. Wakin wawqi panikunaqa llapan tiempunkunawan Diospita yachatsikur yanapakuyänampaqmi precursor regular kayan. Wakinkunanam Diosta adoranapaq localkuna rurëchö yanapakuyan. Y mëtsikaqmi Diospita yachatsikoqkunata necesitäyanqan sitiukunaman yanapakoq ëwayan.

2 KAQ: ¿Imanötan qellënintsikwan o cösasnintsikkunawan congregacionchö yanapakushwan?

Bibliachömi kënö nin: “Teyta Jehoväta respetarqa, väleq cösasnikikunapita [...] mas allin kaqkunata pëpaq rakinki” (Proverbius 3:9). Congregacionchö gastukunapaq y entëru Patsachö Diospita yachatsikur sïguiyänampaqmi qellënintsikwan y juk cösasnintsikkunawan kushishqa yanapakuntsik (leyi 2 Corintius 9:7). Yanapakunapaq churanqantsik qellëqa, wawqi panikuna faltapakuyaptin o ima desgraciapapis pasayaptin yanapayänampaqmi sirwin. Tsëmi wakin wawqi panikunaqa qellëninkunata ‘ëkallatapis rakiyan’ yanapakuyänampaq (leyi 1 Corintius 16:2). Yanapakunapaq rakinqantsik qellëtaqa Diosta adorana wayichö qellëta churakunapaq cäjamanmi winëta puëdintsik o Internetpam donate.jw.org päginapa apatsita puëdintsik. Teytantsik Jehoväqa munan pëta kuyar qellënintsikwan yanapakunatam.

MASLLA YACHAKUSHUN

3 KAQ: Qellënikiwan yanapakuy

Jehoväwan Jesusqa qellëninkunawan kushishqa yanapakoqkunatam kuyayan. Tsëmi Jesusqa alläpa valorarqan qellënin mana këkaptimpis, juk viuda ichikllawampis yanapakunampaq churanqanta. Leyiyë Lücas 21:1-4 ima ninqanta y këkunapaq parlayë:

• ¿Jehoväqa munan atska qellëwan yanapakunataraqku?

• ¿Imanötan Jehoväwan Jesus sientikuyan qellënintsikwan kushishqa yanapakushqa?

Yanapakunapaq churanqantsik qellëta imanö utilizäyanqanta musyanëkipaq VIDEUTA rikäyë y këpaq parlayë:

VIDEU: Jehoväpaq qarëkunawan makintsikta juntatsishun (4:47)

• ¿Imanötan entëru Patsachö congregacionkunata yanapan qellënintsikwan yanapakunqantsik?

4 KAQ: Patsätsiyanqan trabäjukunachö yanapakuy

Jehoväpa unë witsan sirweqninkunaqa manam qellëllawantsu yanapakuyaq, sinöqa Jehoväpa templunta limpiapakur y altsapakurpis kushishqam yanapakuyaq. Leyiyë 2 Crönicas 34:9-11 ima ninqanta y këpaq parlayë:

• ¿Imatataq llapan israelïtakuna rurayarqan Teytantsik Jehoväpa templunta cuidayänampaq?

Israelïtakuna templuta cuidayanqannölla, Jehoväpa testïgunkunapis reunionninkunata rurayanqan wayita imanö cuidayanqanta musyanëkipaq VIDEUTA rikäyë y këkunapaq parlayë:

VIDEU: Diosta adoranantsik wayita cuidashun (3:31)

• ¿Imanirtan reunionnintsikta ruranantsik wayiqa imëpis limpiu y alli kanan?

• Reunionta ruranä wayi imëpis limpiu y alli kanampaqqa, ¿imanötan qampis yanapakunkiman?

5 KAQ: Bautizakushqa ollqukunaqa mas cargukunata chaskiyänampaqmi kallpachakuyänan

Congregacionchö cargukunata chaskir mas yanapakuyänampaq ollqu kaqkuna kallpachakuyänampaqmi Bibliachöqa nin. Congregacionchö mas yanapakuyta munar juk wawqi imata ruranqanta VIDEUCHÖ rikäyë y këpaq parlayë:

VIDEU: Wawqikuna, alli rurëpaq kallpachakïqa allim (5:23)

• ¿Imatataq Ryan rurarqan Jehoväta mas sirwinampaq y congregacionchö mas yanapakunampaq?

Bibliachömi nin siervu ministerial o anciänu këta munarqa juk wawqi imata ruranampaq kaqta. Leyiyë 1 Timoteu 3:1-13 ima ninqanta y këkunapaq parlayë:

• ¿Imakunatataq rurayänan siervu ministerial o anciänu kayänampaq?

• ¿Imanötan familiankuna kayänan? (Rikäyë 4 y 11 kaq versïculukunata).

• Bibliachö ninqanta wawqikuna cumpliyaptinqa, ¿imanötan wawqi panikuna sientikuyan siervu ministerial o anciänu kayänampaq churayaptin?

KËTAM YACHAKURQUNKI

Teytantsik Jehoväqa alläpam valoran congregacionchö yanapakunapaq tiempuntsikta, kallpantsikta y llapan kapamanqantsikta utilizanqantsikta.

¿Yarpankiku?

• ¿Imanötan tiempuntsikwan y kallpantsikwan congregacionchö yanapakushwan?

• ¿Imanötan qellënintsikwan y llapan kapamanqantsikwan congregacionchö yanapakushwan?

• Qamqa, ¿imanötan congregacionchö yanapakunkiman?

MASTA YACHAKUY

Sirweqninkunata Diosnintsik diezmuta imanir manana mañanqanta yachakuy.

“¿Ima nintaq Bibliachö diezmupaq?” (jw.org päginachö yarqamoq)

Bautizakushqa ollqukuna imëka cargukunachö yanapakuyänampaq kaqtam Bibliachöqa nin. Peru juk pani ima cargullachöpis yanapakurqa, ¿imatataq ruranman?

Creikoqkunapa dirigeqninkuna (Täpakoq, febrëru 2021)

Mana fäcil kaptimpis, wawqi panikuna publicacionkunata chaskiyänampaq wawqikuna imata rurayanqanta rikë.

Congu nacionchö publicacionkunata qarakuyan (4:25)

Jehoväpa testïgunkuna qellëta mana mañakuyanqanta musyanëkipaq leyi.

“¿Ima qellëwantan Jehoväpa testïgunkunaqa imëkata rurayan?” (jw.org päginachö yarqamoq)