Jehoväta kuyaqkunapaqqa “manam imapis ishkitseqnin kantsu”

1. ¿Imanötaq rikätsikurqan juk shipash cörreq kanqanta mana dejarinampaq kaqta?

ATSKAQ nunakunam pensayarqan, 1984 watachö, Mary Decker jutiyoq shipash juk carrërachö cörrir öropita rurashqa medällata gänanampaq kaqta. Tsënö kaptimpis, tsë junaqqa manam último kaq señalman charqantsu, porque cörreq mayimpa chakinwan trensakärirmi ishkirirqan, y tsënöpam cörrinqampita jorqariyarqan. Tsënö kaptimpis, cörritaqa manam dejarirqantsu, 1985 watachömi, jatun carrërachö yapë cörrirqan.

2. ¿Ima carrërachötaq cristiänokuna cörrikantsik, y mëman chëtataq alläpa munëkuntsik?

² Tsë cuentam cristiänokunapis espiritual kaq carrërachö cörrikantsik, y imëkanöpapis chänantsikpaq kaq señalmanmi chëta munantsik. Kë carrërachöqa manam alläpa ras cörrinantsiktsu precisan. Pero tsënö karpis, manam munanqantsik hora jamar jamar kakunapaqtsu nikantsik. Tsëpa rantinqa, kë carrërataqa igualatsishwan, despaciolla mana pärëta cörritawanmi, pero tsëchö gananapaqqa alläpam precisan alli aguantanantsik. Corinto markachö këkaq cristiänokunaman apóstol Pablu punta kaq cartanta mandanqanchömi juk carrërapaq parlarqan, porque tsë markaqa tsënö carrërakunata ruratsinqampitam reqishqa kaq. Kënömi nirqan: “Allim musyayanqui corir llallinacoqcunacho jucllella llallenqanta, y tse llalleqllam premiuta chasquin. Qamcunapis tse corir llallinacoq cuenta cayë” (1 Cor. 9:24).

3. ¿Pikunataq mana wanushpa kawakï premiota ganëta puëdiyan?

³ Bibliam nimantsik tsë carrërachö cörrinapaq (lea 1 Corintios 9:25-27). Premioqa mana wanushpa kawëmi: ciëlopaq akrashqa kaqkunapaqqa ciëlochö tärë; y wakin cörreq kaqkunapaqnam, kë Patsachö tärë. Kë carrërachöqa alli tsarakur ushananyaq llapan cörreqkunam premiota chaskiyan (Mat. 24:13). Ley mandakunqanta mana wiyakoqkuna y ushananyaq mana cörreqkakunallam perdiyan. Y mana wanushpa kawëta tarinapaqqa, tsë carrërallam yanapakun; manam jukqa kantsu.

4. ¿Imanirtaq cörrikanqantsikchö cörriqa fäciltsu?

⁴ Ushananyaq cörriqa manam fäciltsu, gananapaqqa mana alli munënintsikkunatam alli tsaränantsik, y gananapaqqa aguantanantsik alläpa precisanqanmanmi markäkunantsik. Kë carrërachöqa, jukllaqllam mana pantëpa ganashqa, pëqa karqan Jesucristum. Pero discïpulon santiäguqa kënö nirmi qerqallqan: “Llapantsicmi imanopapis mana allicunata rurecantsic” (Sant. 3:2). ¡Tsëqa rasun kaqllam! Piraq, “noqaqa manam imachöpis pantätsu” ninman. Höraqa karamunmanmi, imallapis ishkinätsimaqnintsik o ishkitsimaqnintsik, pero tsënö kaptimpis, sharkurmi cörrir sïguita puëdintsik. Wakin cristiänokunaqa alläpa mana allikunamanmi ishkiyashqa y cörrita sïguiyänampaqqa juk yanapanantaran necesitäyashqa. Tsëmi rikätsimantsik, noqantsikpaqpis ishkitsimënintsikta munaqqa imallapis kanampaq kaqta, o itsa ishkiratsimäshumpis (1 Rey. 8:46).

IMA ISHKITSISHUPTIKIPIS, CÖRRITAQA AMA JAQITSU

5, 6. a) ¿Imanirtaq nintsik cristiänokunapaqqa imapis ishitseqnin mana kanqanta, y imanötaq ishkirirpis sharkuyan? b) ¿Imanirtaq wakinkunaqa ishkiyanqampita sharkuyantsu?

⁵ Itsa juk cristiano Diospa kaqchö mana allinö këkaqta rikarninqa, iskitseqninmi kashqa o ishkishqam nirquntsik. Rasunmi, Bibliachö tsë ishkan palabrakuna ima ninan kanqanqa casi igual-llam significan, pero höraqa manam tsënötsu. Rikärishun Proverbios 24:16 ninqanta: “Alli kaq nunaqa qanchis kuti ishkirirpis sharkurinqam, pero mana alli nunakunapaqqa desgraciam ishkitseqnin kanqa”.

⁶ Jehoväqa manam permitinqatsu pëman markäkoqkunata imapis ishkiratsiptin o ishkiriyaptin tsëllachöna quedakuyänanta. Alleqmi musyantsik pëta llapan shonquntsikwan sirwir sïguinapaqqa sharkatsimänapaq kaqta. Rasunmi, Jehoväpa sirweqninkunapaqqa këta musyëqa alläpa kushikïpaq. Pero mana alli nunakunaqa, ishkiyanqampita manam sharkïta munayantsu ni Diospa espiritumpa yanapakïninta ni markampa yanapakïninta ashiyantsu; y wakinkunaqa tsë yanapakïta hasta despreciayanmi. ¡Imanö jukläyam kayan Diospa leyninta kuyaqkunaqa! “Pëkunapaqqa manam imapis ishkitseqnin kantsu”, juk parlakïchöqa kawëta ganayänampaq cörrikäyanqampitaqa manam imapis jorqëta puëdintsu (lei Salmo 119:165a).

7, 8. ¿Imanötaq pipis trensakar ishkirirpis Diospa aprobacionninta chaskir sïguikanmanlla?

⁷ Wakin cristiänokunaqa mana alli munëninkunarëkurmi, ichik jutsakunata rurayan, höraqa hasta atska kutikunapam tsëta rurayan. Pero ishkiyanqampita sharkurqa, o rasumpa arrepentikur sirwiyänampaq yapë sinchikurqa Jehoväpa aprobacionnintam chaskita puëdiyan. Tsëtam rikantsik unë Israel markanta Diosnintsik imanö tratanqanta yarparnin (Is. 41:9, 10). Proverbios 24:16 textoqa rikätsikun, llakipäkoq Diosnintsik yanapamashqa sharkunapaq kaqtam (lei Isaías 55:7b). Jehoväwan Jesucristum sharkunantsikpaq animamantsik, tsëwanmi rikätsimantsik noqantsikman markäkuyanqanta (Sal. 86:5; Juan 5:19).

⁸ Juk cörreq nuna imawampis trensakar ishkirirnimpis, raslla sharkur cörrir sïguirqa, capaz ushananyaq chärinman. Mana wanushpa kawëta tarinapaq cörreqkunaqa, manam musyantsiktsu “ime öra o ime junaq” kë carrera ushanampaq kaqta (Mat. 24:36). Tsënö kaptimpis, imawampis alläpa mana trensakarqa, manam qepapäshuntsu y chanqantsikyaqmi cörrikäshunlla. Tsëqa, ¿imatataq ruranantsik imawampis mana trensakänapaq?

ISHKITSIMAQNINTSIKKUNA

9. ¿Ima ishkitsimaqnintsikkunapitataq yachakurishun?

⁹ Ishkitsimaqnintsikkunata pitsqallata rikärishun: kikintsik mana tsarakunqantsikta, mana allikunata rurëta munanqantsikta, cristiano mayintsikkuna mana allita ruramanqantsikta, chikishqa kanqantsikta y wakinkuna pantayanqankunata. Ishkishqa karqa, Jehová pacienciakoq kanqanman yarpäshun. Pëqa manam jaqirishqana kanqantsiktatsu pensanqa.

10, 11. ¿Imatataq David vencinan karqan?

¹⁰ Imachö mana tsarakunqantsikkunataqa igualaratsishwan cörrinqantsik nänichö tarinqantsik rumikunatawanmi. Rey Davidpa y apóstol Pedrupa kawëninkunaman yarparqa, ishkë “rumitam” tarintsik, tsëqa David alleq mana tsarakur raslla imatapis rurarinqan, y Pedru pëpaq imatapis mana allita parlayänanta mantsapakunqanmi.

¹¹ Rey Davidqa, Bat-seba warmita rikëkurqa manam tsarakurqantsu, jina tsënöllam Nabal nuna ofendiriptimpis wanuratsita munarqan. Pero tsënö mana tsarakoq karpis, Jehoväta kushitsinampaqqa imëpis sinchikurqanmi. Wakin nunakunapa yanapakïninwanmi, mana tsarakoq këninta vencirqan (1 Sam. 25:5-13, 32, 33; 2 Sam. 12:1-13).

12. Ishkishqa karpis, ¿imanötaq Pedru carrërachö cörrir sïguirqan?

¹² Pedruqa mantsarqanmi pipis mana allita pëpita pensayänanta, y Jesusllapaq y Jehovällapaq kanqanta rikätsikushqa karpis, höraqa jatun jutsakunatam rurarqan. Këllaman pensarishun, nunakunapa nöpanchömi Jesusta reqïkarpis kima kutipa negarqan (Luc. 22:54-62). Tiempowannam, penqakïninchö señalakushqa judío cristiänokunata precisaqpaq churarnin, mana judío kaq cristiänokunataqa mana allipa tratarqan. Pero apóstol Pabluqa manam tsënötsu rikarqan, pëpaqqa manam congregacionchö kaqkunata rakinampaq ni imapis karqantsu. Awmi, Pedruqa pantashqam këkarqan. Tsëmi, mana alli portakïninwan cristiano mayinkunata mana allikunaman manaraq chätsiptin, Pabluqa sinchipa consejarirqan (Gal. 2:11-14). ¿Pedruqa orgulloso kartsuraq consejanqanta chaskikurqantsu y kawëta tarinampaq cörrikanqampita yarqukurirqan? Manam; pëqa Pablu consejanqanmanmi yarpachakurqan y wiyakurqan, y carrërachöqa cörrirllam sïguirqan.

13. ¿Imanötaq juk qeshya ishkitsimaqnintsik tikrarinman?

¹³ Jina imachö mana tsarakoq kënintsikchöqa, qeshyapis ishkiratsimashwanmi. Diospa kaqta ruranatam qepapätsimashwan, utikäratsimashwan y ima rurëtapis mana puedeqtanömi katsimashwan. Këllaman pensarishun, Japón nacionpita juk panipam, bautizakunqampita 17 watakuna pasariptin, saludnin mana alli tikrarirqan. Tsënö qeshyanqanman yarpachakurninmi, Diospa kaqchö rurapakunampaq gänasninnaq tikrarirqan y manana yachatsikoqpis yarqurqannatsu. Ishkë anciänokunam visitayarqan, y animariyaptinmi reunionkunaman yapë ëwar qallëkurqan. Pëmi kënö willakun: “Cristiano mayïkuna shumaq chaskiyämanqanmi alläpa kushitsimarqan”. Panintsikqa yapëmi carrërachö këkan.

14, 15. ¿Imatataq rurashwan pasëpa mana alli munëkuna chämuptin? Juk wawqi ruranqanta willakaramï.

¹⁴ Mana allikunata rurëta munëmi atskaq cristiano mayintsikkunata ishkitsishqa. Mana alli munënintsikkuna tentamashqaqa, alleqmi sinchikunantsik pensënintsikchö, portakïnintsikchö y Diosta adoranqantsikchö limpio kanapaq. Jesusmi nirqan imapis ishkitsimaqnintsik kaptinqa, nawitsik kaptin o rikrantsik kaptimpis, raslla jorqurinapaq. Tsënö kaptinqa, ¿manaku carrërapita jorqamaqnintsik mana alli pensënintsikkunata o mana alli portakïnintsikkunata jaqirishwan? (Lei Mateo 5:29, 30.)

¹⁵ Juk wawqim nirqan, cristiano familiachö winashqa karpis, joven kanqampita patsë ollqu mayinwan punukï munëyoq kanqanta. Pëmi kënö nir willakun: “Mëchö këkarpis mana allim sientikurqä”. 20 watayoq këkarmi precursor regular y siervo ministerial karqan. Pero tsënö këkarmi jutsallakurirqan, y tsëta ruranqampitam piñapashqa karqan y anciänokunapa yanapakïnintam chaskirqan. ¿Imanötaq sharkurirqan jutsaman ishkinqampita? Diosman mañakur, Palabranta estudiar y wakinkunata yanaparmi. Watakuna pasariptinmi kënö nirqan: “Hora höraqa tsë mana alli munëqa yapëmi chäramun, pero manam vencimänantaqa jaqïtsu. Tsarakïta mana puëdinqantsikkamayaq tentashqa kanata Jehová mana permitinqantam yachakurqö. Tsëmi noqaqa crei, tentacionkunata vencita puëdinqäta Jehová pensanqanta”. Jina kënömi nirqan: “Mana allikunata pasar tsarakunqäpitam mushoq Patsachö bendicionkunata tarishaq. ¡Tsëtam alläpa munëkö! Y tsë junaq chämunqankamayaqmi tsarakïkäshaqlla”. Awmi, pëqa manam carrërapitaqa witikurita munantsu.

16, 17. a) Mana alli tratayanqanta pensanqanta jaqinampaq, ¿imataq juk wawqita yanaparqan? b) ¿Pitataq qatinantsik trensakar ishkita mana munarqa?

¹⁶ Cristiano mayintsikkuna mana alli tratamanqantsikpis ishkitsimaqnintsikmanmi tikrarinman. Këllaman pensarishun, anciänonö yanapakoq Francia nacionpita juk wawqim, pëta mana alli tratayanqanta pensar, alläpa piñakurqan. Tsëmi, reunionkunaman ni Diospita yachatsikoqpis ëwarqannatsu. Ishkë anciänokunam visitayarqan, shumaq wiyayarqan y manam piñapäyarqantsu. Pasanqankunata willakuptinqa imatapis mana nïllapam shumaq wiyayarqan. Animariyarqanmi tsë problëmata Jehoväpa makinchö jaqirinampaq y rikätsiyarqanmi Jehoväta kushitsi más precisaq kanqanta. Tsë wawqiqa yanapayanqanta chaskikurmi yapë cörrir sïguirqan. Y congregacionchöpis yapëmi yanapakïkan.

¹⁷ Llapan cristiänokunam congregacionpa Pushaqnin Jesucristuta qatinantsik y manam nunakunatatsu. Jesusqa, ‘imeca nina rupecaqno’ nawiyoq karmi, noqantsik rikëta mana puëdinqantsikkunata, llapanta alleq rikëta puëdin (Apoc. 1:13-16). Pëqa musyanmi pipis mana alli tratamanqantsikta pensanqantsikqa rasumpa o mana rasumpa kanqanta, y congregacionchö problëmakuna kaptimpis tiemponchömi altsarin. Tsënö këkaptinqa, ama cristiano mayintsikkuna pantayanqanrëkur noqantsikpis ishkishuntsu.

18. ¿Imanötaq tsarakushwan tukï mana allikunapa pasarnin?

¹⁸ Chikishqa kanqantsik y wakinkuna pantayanqankuna llakitsimanqantsikpis ishkitsimaqnintsikmanmi tikrarinman. Juk igualatsikïwan yachatsikunqanchömi Jesus nirqan “alli willaquirecur tuqui sufrimientucunata pasarnin, y nuna mayincuna chiquiyaptin” wakinkuna ishkiriyänampaq kaqta. Wakinkunaqa, kastankuna, vecïnonkuna o gobiernokuna chikiyaptinmi “creyiquinincunacho mana alleqpa patsacashqa” kar o markäkïninkunachö débil kar ishkiriyan (Mat. 13:21). Pero Jehoväpa lädompita mana witikurishqaqa, Diospa Gobiernompita alli willakïmi markäkïnintsikta sinchiyätsinqa, y tsënöpam alli patsakashqa plantanö sinchi tsarakushun. Tukï mana allikuna llakitsimashqaqa, Diosman mañakushun y “allita ruranqantsikrecur alabashqa quellapaq” yarpachakushun (lei Filipenses 4:6-9). Jehoväpa kallpanwanmi sasa o aja tiempokunapa pasëkarnimpis alli tsarakushun y imapis ishkitsimänataqa jaqishuntsu.

19. ¿Imatataq rurashwan wakinkuna pantayanqanrëkur mana ishkinapaq?

¹⁹ Pero alläpa llakikïpaqqa, jukkuna pantayanqanrëkur, cörrikäyanqan carrërapita wakinkuna witikuriyanqanmi. Jukpa concienciankunarëkur y imatapis akrakuyanqanrëkurmi ishkiyashqa (1 Cor. 8:12, 13). Pipis ofendiramashqaqa, ¿noqantsiktsuraq tsë problëmata más miraratsishun? Cristiänokunatam Biblia consejan wakinkunata mana juzgayänampaq, y imatapis akrakuyanqanmam mana mëtikuyänampaq, tsëpa rantinqa perdonanakuyänampaq (Luc. 6:37). Wakinkunapa portakïnin mana gustamashqaqa, kënömi tapukurishwan: “¿Munanqänö rurayänanta munarku wakinkunata juzgä? ¿Cristiano mayïkuna jutsasapa kayanqanta musyëkartsuraq, pantayanqanrëkur cörrikanqäpita yarqukurishaq?”. Jehoväta kuyanqantsikmi yanapamäshun, wankinkuna rurayanqanta cuentaman mana churashpa, ushananyaq cörrinapaq.

CÖRRIKANQËKITA AMA JAQIRITSU

20, 21. Kawëta tarinëkipaq, ¿mëyaq cörrinëkipaqtaq churapakarqunki?

²⁰ ¿‘Cumplinqëquiyaq’ cörrinëkipaqku churapakarqunki? (2 Tim. 4:7, 8.) Tsëqa, ishkitsishoqniki ima kanqanta cuentata qokunëkipaqqa Bibliata y wakin publicacionkunata alleq estudië y yachakunqëkiman alli yarpachakï. Diospa santo espïritunta mañakï llapanchö yanapashunëkipaq. Yarpäri, cörreqkunaqa manam ishkirinqanllapitaqa perdiriyantsu. Sharkurirmi cörrir sïguita puëdiyan. Hasta imapis tsapaqninkunapitam más yachakïta puëdiyan.

²¹ Mana sinchikurqa, kawëman apakoq cörrichö mana gananapaq kaqtam Bibliaqa nin. Tsëmi alliraq sinchikunantsik. Manam cärroman lloqarkur, imatapis mana rurashpa ëwënötsu. Kikintsikmi tsë carrërachöqa kallpachakunantsik. Cörrir avanzanqantsikmannömi Diospita shamoq “kushishqa kawakïqa” yanapamäshun (Sal. 119:165). Segürom kantsik, ushananyaq cörreyänampaq churapakashqa këkaqkunataqa kanan y imëyaqpis Jehová bendecinampaq kaqta (Sant. 1:12).