¿Imanötan alläpa llakikurnin qeshyëkaqkunata yanapashwan?

¿Ima ninantan tsëqa?

Mëqan amïguntsikpis alläpa llakikur qeshyaptinqa manam imanö yanapëta puëdintsiktsu. Peru tsënö kaptimpis, alläpa kuyanqantsikta rikänampaqmi imëkata rurëta puëdintsik.

¿Imanötan yanapashwan?

“Llapëkim pitapis ras o sas wiyayänëki” (SANTIÄGU 1:19).

Amïguntsiktaqa yanapëta puëdintsik, parlakuyta munayaptin shumaq wiyarninmi. Y manam llapan nishunqëkita contestëta puëdinkitsu. Peru amïguykiqa rikänanmi shumaq wiyanqëkita y pëpaq rasumpa yarpachakunqëkita. Imanö sientikunqanta entiendinëkipaq kallpachakuy y ama juzguëtsu. Yarpänëkim höraqa amïguyki cuentata mana qokushpa imatapis parlanqanwan llakitsishunëkipaq kaqta, peru tsëpitaqa capaz nishunqëkipita mana alli sientikunqa (Job 6:2, 3).

“Llakishqa këkaqkunata shoqayë” (1 TESALONICENSIS 5:14).

Capaz amïguykiqa llakishqa këkanqa o mana imapaqpis sirwinqanta pensanman. Tsëmi pëpaq yarpachakunqëkita rikätsinëki. Tsënöpam ima nïta mana puëdirpis amïguykitaqa shoqanki y animanki.

“Rasumpa amïgu karqa, imëpis kuyakoqllam këkanqa” (PROVERBIUS 17:17).

Amïguykita yanapanëkipaq nï. Imata necesitanqanta nishunëkita shuyänëkipa rantinqa tapuy imanö yanapanëkita munanqanta. Capaz amïguykiqa imata necesitanqanta imanö nishuynikita puëdintsu. Tsënö kaptinqa juntu imallatapis rurayänëkipaq nï, capaz mëllatapis pureq o pasiaq ëwayankiman. Rantipakoq ëwanëkipaq y wayinta pitsapakur o jukkunata rurar yanapanëkipaqpis ninkimanmi (Gälatas 6:2).

“Pacienciayoq kayë” (1 TESALONICENSIS 5:14).

Capaz amïguykiqa höraqa qamwan parlëta munanqatsu. Peru parlakuyta munaptinqa qamwan parlëta puëdinqanta niri. Yarpë, llakikuy qeshyawan këkaq amïguykiqa imapis ruranqanwan o ninqanwanmi llakitsishunkiman, imatapis rurayänëkipaq patsätsiyanqëkita rurëta munanmannatsu, o illaqpita cölerashqa këkanman. Amïguykitaqa pacienciawanmi yanapanëki y allim entiendinëki (Proverbius 18:24).

Amïguntsikkunataqa yanapëta puëdintsikmi

Farrahm kënö nin: “Alli amïga kanäpaqmi kallpachakü. Manam llapan problëmankunachö amïgäta yanapëta puëdïtsu, peru tsënö karpis parlakuyta munaptinqa imëpis wiyämi. Höraqa tsënö shumaq wiyanqällawanmi amïgäqa allina sientikun” (Farrahpaa juk amïganmi depresión clínica y trastornos alimentarios y de ansiedad niyanqan qeshyawan qeshyan).

Ha-eunmi kënö nin: “Imatapis kushishqa ruraq y kuyakoq amïgämi kan. Juk kutim wayinman invitamarqan, y noqapaq cocinamunqanqa alläpam gustamarqan. Pëwan alli sientikurmi llapan pasamanqanta willarqä. ¡Alläpa kushishqam ëwakurqä!” (Ha-eunqa depresión clínica qeshyawanmi qeshyan).

Jacobmi kënö nin: “Pacienciayoq kanqantsikqa alläpam yanapakun. Imatapis mana gustamanqanta warmï ruraptinqa, yarpämi qeshyanqanrëkur imatapis ruranqanta. Tsëmi yanapaman pëwan mana cölerakunäpaq y mas pacienciakoq kanäpaq” (Jacobpa warminqa depresión clínica qeshyawanmi qeshyan).

Enrïcum kënö nin: “Warmïqa llapan necesitanqächömi yanapamashqa. Llakikurnin alläpa yarpachakunqä höraqa manam gänasnï kantsu, tsëmi warmïqa obligamantsu imatapis ruranäpaq. Noqarëkurmi höraqa gustanqantapis rurantsu. Alläpa kuyakoq karmi noqarëkur imëkata ruran. ¡Pëqa alläpa alli warmim!” (Enrïcuqa trastorno de ansiedad qeshyawanmi qeshyan).