¿Imatataq Bibliachö nin imatapis qarakuypaq?
Bibliachö yachatsikunqan
Bibliachömi nimantsik kapamanqantsikpita imatapis qarakurqa, puëdinqantsikta alli shonquwan qarakunapaq. Tsënö qarakunqantsikqa manam chaskeq nunallatatsu yanapan, sinöqa noqantsiktapis yanapamantsikmi (Proverbius 11:25; Lücas 6:38). Jesusmi kënö nirqan: “Imatapis chaskir kushikunqantsikpitaqa, imatapis qarakurmi masqa kushikuntsik” (Hëchus 20:35).
¿Imëtan imatapis qarakunqantsik alli kanman?
Imatapis puëdinqantsikta qarakunqantsikqa allipaqmi kanqa. Bibliachömi kënö nin: “Teyta Diosqa kushi kushilla qarakoqtam kuyan, tsëmi cada ünu shonqunchö decidinqannö ruratsun, peru ama mana munëkar o obligashqanöqa” (2 Corintius 9:7).
Teyta Diosqa munan pëta sirweqkunaqa imatapis shonqupita qarakunantsiktam (Santiägu 1:27). Faltapakoq nunakunata yanaparqa, Diosta yanapaq cuenta o prestëkoq cuentam rurëkantsik (Proverbius 19:17). Bibliachömi nimantsik, tsënö qarakoq kanqantsikpitaqa Dios bendicimänapaq kaqta (Lücas 14:12-14).
¿Imëtan imatapis qarakunqantsik mana alli kaman?
Kikintsikllaman pensar qarakushqa. Këkunarëkur qarakushqa:
Jukkuna alli rikämänantsikta munarlla (Mateu 6:2).
Imatapis chaskita munarlla (Lücas 14:12-14).
Salvakuyta munarlla (Salmus 49:6, 7).
Teyta Dios chikinqankunata rurayänampaq imatapis qarakushqa. Pitapis apostanampaq, washkuta upyanampaq o drogakunampaq qellëta qarëqa manam allitsu kanman (1 Corintius 6:9, 10; 2 Corintius 7:1). Trabajëta puëdikar trabajëta mana munaq nunata qellëta qarëpis manam allitsu kanman (2 Tesalonicensis 3:10).
Diospita chaskinqantsik cargukunata cumplinantsikta michämashqa. Bibliachömi nin familianta dirigeq nunaqa, familian llapan wananqanta procuranampaq kaqta (1 Timoteu 5:8). Manam allitsu kanman familiampaqpis faltëkaptin jukkunata imatapis qaranqan. Unë witsanqa, kayäpunqankuna ‘Teyta Diosta qarëtanö entregayänampaq’ kanqanta nirmi, wakin nunakunaqa edäyashqa papäninkunata yanapëta munayaqtsu, peru Jesusqa tsënö rurayanqan mana alli kanqantam nirqan (Marcus 7:9-13).