37 KAQ YACHAKUNËKIPAQ
¿Bibliachöqa ima nintaq trabäjupaq y qellëpaq?
Imëllaqa yarpachakurqunkiku trabäju o qellëniki mana kaptin. Llapantsikmi qellëtaqa necesitantsik familiantsikta manteninapaq y Jehoväta sirwinapaq. Këchömi yachakunki trabäjupaq y qellëpaq mana alläpa yarpachakunëkipaq Bibliachö ima ninqanta.
1 KAQ: Bibliachöqa, ¿ima nintan trabäjupaq?
Diosnintsikqa kushishqa trabajanatam munan. Tsëmi Bibliachöqa kënö nin: “Alli trabajanqampita juk nuna [...] kushishqa kanqanmi mas alliqa” (Eclesiastes 2:24). Jehovätaqa trabajë alläpam gustan, tsëmi noqantsikpis alli trabajaq karqa pë gustanqanta rurëkantsik y kushishqa sientikuntsik.
Llapantsikmi trabäjutaqa necesitantsik, peru Jehoväta sirwinapaqmi masqa kallpachakunantsik (Juan 6:27). Jehoväqa, pëta mas puntaman churashqaqa yanapamäshunmi.
2 KAQ: Bibliachöqa, ¿ima nintan qellëpaq?
Qellë yanapamänapaq kaqta Bibliachö nirpis, manam nintsu qellëyoq kar-raq kushishqa kanapaq kaqtaqa (Eclesiastes 7:12). Bibliachöqa clärum nin qellëta mana kuyanapaq, sinöqa kapamanqantsikllawan kushishqa kanapaqmi nimantsik (leyi Hebrëus 13:5). Kapamanqantsikllawan kushishqa karqa, manam mas qellëyoq këta munar tsëllaman yarparäkushuntsu, ni manam pipapis jaqan kashuntsu (Proverbius 22:7). Y manam qellërëkur ima pukllatapis pukllashuntsu ni rïcuyëta munar imakunamampis mëtikushuntsu.
3 KAQ: ¿Imanötan qellënintsikwan yanapakushwan?
Jehoväqa alläpa alli y imëkata qarakoq Diosmi. Tsëmi noqantsikpis pënö këta munarqa, nuna mayintsikwan alli kanantsik y kapamanqantsikkunata qaranantsik (1 Timoteu 6:18). Qellënintsikwanqa yanapakuyta puëdintsik congregacionchö gastukunata pagakuyänampaq churar, y pishipakuykaq wawqi panikunata yanaparmi. Jehoväqa manam mëtsikataraq churanantsiktatsu shuyaran, pëqa voluntäwan yanapakushqam kushikun. Llapan puëdinqantsikwan yanapakurqa kushishqam kashun, y Jehovä Diosnintsikpis kushikunqam (leyi Hëchus 20:35).
MASLLA YACHAKUSHUN
Trabäjupaq Bibliachö ninqanta cäsukunqantsik y kapamanqantsikllawan kushishqa kanqantsik yanapamanqantsiktam yachakushun.
4 KAQ: Alli trabajaq kashqaqa Jehovämi alabashqa kanqa
Imachö trabajarpis Jehovätam cuentachö katsinantsik. VIDEUTA rikäyë y këkunapaq parlayë:
¿Trabäjunchö Josë imanö portakunqantaq masqa gustashurqunki?
¿Imatataq Josëqa rurarqan trabajanan kaptimpis Jehoväta puntaman churanampaq?
Leyiyë Colosensis 3:23, 24 ima ninqanta y këpaq parlayë:
¿Imanirtan ‘llapan kallpantsikwan’ trabajanantsik?
Llapantsikmi trabäjutaqa necesitantsik, peru tsënö kaptimpis, Jehovätam mas puntamanqa churanantsik
5 KAQ: Kapamanqantsikkunallawan kushishqa kashun
Mëtsikaq nunakunam atska qellëyoq këta munar imëkata rurayan, peru Bibliachöqa mana tsënö ruranapaqmi nin. Leyiyë 1 Timoteu 6:6-8 ima ninqanta y këpaq parlayë:
Qellëpaq parlar, ¿imatataq Bibliachö consejamantsik?
Qellënintsik wallkalla kaptimpis kushishqa këtaqa puëdintsikmi. VIDEUTA rikäyë y këpaq parlayë:
Videuchö rikanqantsik familiakunaqa, ¿imanirtan kushishqa kayan qellëninkuna mana kaptimpis?
Atska qellëyoq këkar masta munëqa peligrösu kanqantam Jesusqa nirqan. Leyiyë Lücas 12:15-21 ima ninqanta y këpaq parlayë:
Jesus ninqampitaqa, ¿imatataq yachakunki? (Rikäyë 15 kaq versïculuta).
Leyiyë Proverbius 10:22 ima ninqanta y igualatsiyë 1 Timoteu 6:10 ima ninqanwan, y këkunapaq parlayë:
Imatan mas alli kanman, ¿atska qellëyoq kanqantsikku o Jehoväwan amïgu kanqantsikku? ¿Imanir?
¿Imanirtan allitsu kanman qellëllapaq yarparäkunqantsikqa?
6 KAQ: Jehovämi yanapamäshun
Trabäjunnaq o qellëninnaq kanqantsik höram Jehoväman markäkunqantsikta o yärakunqantsikta rikätsikuntsik. VIDEUCHÖ rikäyë trabäjunnaq o qellëninnaq kanqëki höra ima yanapashunëkipaq kaqta, y këkunapaq parlayë:
Videuchö rikanqantsik wawqiqa, ¿ima problëmakunapatan pasarqan?
¿Imatataq rurarqan mana alläpa yarpachakunampaq y familianta yanapanampaq?
Leyiyë Mateu 6:25-34 ima ninqanta y këpaq parlayë:
¿Imatataq Jehoväqa ruranqa pëta sirwiyänanrëkur kallpachakoqkunapaq?
WAKIN IMA NIYANQAN: “Familiäta manteninäpaqmi trabajanä. Tsëmi cada semäna reunionkunaman ëwëtaqa puëdïtsu”.
¿Bibliachö ima ninqantan rikätsimantsik sirwinapaq kallpachakushqaqa Jehovä yanapamänapaq kaqta?
KËTAM YACHAKURQUNKI
Trabäjuta y qellëta necesitarpis Teytantsik Jehovätam imëkapitapis mas puntamanqa churanantsik.
¿Yarpankiku?
¿Imanötan yanapamantsik trabäjupaq Bibliachö ninqanta cäsukunqantsik?
¿Imanötan yanapamantsik kapamanqantsikllawan kushishqa kanqantsik?
¿Imanötan rikätsikunkiman sirweqninkunata Jehovä yanapanampaq kaqman markäkunqëkita o yärakunqëkita?
MASTA YACHAKUY
Qellëpaq Bibliachö ima ninqanta musyanëkipaq leyi.
“¿Qellëpa culpanrëkurtsuraq imëka mana allikuna kan?” (jw.org päginachö yarqamoq)
¿Imatataq cuentachö katsinantsik imata qarakurpis Jehovä munanqannö kanampaq?
“¿Imatataq Bibliachö nin imatapis qarakuypaq?” (jw.org päginachö yarqamoq)
¿Allitsuraq kanman qellëpaq pukllëqa?
“¿Imatataq Bibliachö nin qellëpaq pukllëpaq?” (¡Musyatsikoq!, marzu 2015)
Suwakuyta y qellëpaq pukllëta dejanampaq juk nunata ima yanapanqanta leyi.
“Cawallukuna gananakur cörreqta rikëmi gustamaq” (Täpakoq, 1 de noviembri 2011)